التىن بەلگىنىڭ التىننان جاسالۋى ماڭىزدى ەمەس - مينيسترلىك وكىلى

نۇر- سۇلتان. قازاقپارات - مەكتەپ تۇلەكتەرىنە بەرىلەتىن «التىن بەلگىنىڭ» قۇرامىندا التىن جوق بولعاندىقتان، ونى سونشا بۇلداۋدىڭ نە قاجەتتىگى بارىن سۇراعان قازاقستاندىققا مينيسترلىك وكىلى جاۋاپ بەردى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

ەربولات باحتياروۆ ەسىمدى ازامات «التىن بەلگى» يەگەرلەرىنە ەشقانداي ارتىقشىلىق پەن جەڭىلدىكتەر بولماسا، وعان تالپىنىپ، تىرىسۋدىڭ قاجەتى نەدە ەكەنىن سۇراعان. «وعان قوسا، ەستۋىمشە، بىلاي بۇلدايتىنداي «التىن بەلگىدە» ايتارلىقتاي التىن دا جوق ەكەن؟!» دەگەن پىكىر قالدىرىپتى ول جەلىدە.

ق ر ب ع م مەكتەپكە دەيىنگى جانە ورتا ءبىلىم بەرۋ كوميتەتىنىڭ ءتوراعاسى گۇلميرا كارىموۆانىڭ ايتۋىنشا، «ءبىلىم تۋرالى» زاڭعا سايكەس «التىن بەلگى» يەگەرلەرى جوعارى وقۋ ورنىنا ءتۇسۋ كەزىندە ارتىقشىلىققا يە. مىسالى، كونكۋرس كەزىندە ۇمىتكەرلەردىڭ جيناعان بالدارى تەڭ بولعان جاعدايدا «التىن بەلگى» يەگەرىنە باسىمدىق بەرىلەدى.

«مەنىڭ تۇسىنىگىمدە، التىن دەگەنىمىز - العان ءبىلىم. «التىن بەلگى» كىمگە بەرىلەدى؟ 11 جىل بويى ءوزىنىڭ وزات ءبىلىمىن كورسەتە العان وقۋشىعا عانا بەرىلەدى. سوندىقتان، وسى ەڭبەكتى مەن التىنعا تەڭەيمىن. سونىمەن بىرگە، «التىن بەلگى» - وقۋشىنى ىنتالاندىرۋدىڭ ءبىر ءادىسى. وقۋشىنىڭ ۇلكەن جەتىستىكتەرگە جەتۋ جولىنداعى العاشقى باسپالداعى»، - دەيدى گۇلميرا كارىموۆا.

بۇعان دەيىن «التىن بەلگىگە» ۇمىتكەر تۇلەكتەرگە قويىلاتىن تالاپ كۇشەيتىلەتىنى ايتىلعان بولاتىن.