پاندەميا كەزىنەن بەرى شىمكەنتتە بالا تۋۋ كورسەتكىشى كۇرت وسكەن
قالالىق دەنساۋلىق ساقتاۋ باسقارماسىنىڭ مالىمەتىنشە، وتكەن جىلى 5 مىڭنان اسا ءسابي جىلداعىدان كوپ دۇنيەگە كەلگەن. ياعني ءبىر جىلدا مەگاپوليستە 33 مىڭنان استام بالا تۋعان. سالا ماماندارى نارەستەلەردىڭ كوبەيۋىنە پاندەميا دا اسەر ەتكەنىن ايتادى.
«پاندەميا كەزىنەن بەرى اي سايىن بوسانۋعا كەلەتىن انالار سانى كوبەيىپ وتىر. ءبىر كۇندە ءبىزدىڭ پەرزەنتحانادا 50-60-قا جۋىق بالا ومىرگە كەلەدى. بيىل دا بۇل ءۇردىس جالعاسىن تاپتى»، - دەيدى مەديتسينا قىزمەتكەرى گۇلميرا قوڭىربايەۆا.
قازىر شىمكەنتتە 4 پەريناتالدىق ورتالىق بار. الايدا نارەستەلەردىڭ كوبەيۋىنە بايلانىستى بۇل ورتالىقتاردا ورىن تاپشىلىعى بايقالۋدا. سوندىقتان جاڭا بوسانعان انالار ۇيلەرىنە ەرتە شىعارىلادى. ءبىراق قالالىق دەنساۋلىق ساقتاۋ باسقارماسى بۇل ماسەلەنىڭ شەشىمى ەمەس دەيدى. سەبەبى، مەگاپوليسكە تاعى ءبىر پەريناتالدى ورتالىق سالۋ قاجەتتىلىگى تۋىنداپ وتىر.
«قازىر بىزدە اكۋشەرلىك توسەك- ورىن جەتپەيدى. بولاشاقتا جاڭا پەريناتالدىق ورتالىق قۇرىلىسىن باستاۋ جوسپارلانىپ وتىر. سونداي- اق، قازىر سالىنىپ جاتقان كوپبەيىندى اۋرۋحانالاردان بوساندىرۋ بولىمشەلەرىن اشۋ كوزدەلىپ وتىر»، - دەيدى قالالىق دەنساۋلىق ساقتاۋ باسقارماسى باسشىسىنىڭ ورىنباسارى ساۋلە دۇيسەنبايەۆا.
ستاتيستيكالىق مالىمەتتەرگە سۇيەنسەك، دەموگرافيالىق ءوسىم جاعىنان شىمكەنت قازاقستاندا الدىڭعى ورىندا تۇر. دەموگرافيالىق ءوسىم ءبىرىنشى كەزەكتە تۋۋ كورسەتكىشىنىڭ جوعارى بولۋىنا بايلانىستى. ياعني، ءار ون بەس مينۋت سايىن ءبىر شىمكەنتتىك دۇنيە ەسىگىن اشادى دەگەن ءسوز. جىل باسىنان بەرى شىمكەنتتە 100 ەگىز تۋعان. بۇل وتكەن جىلدىڭ سايكەس كەزەڭىندەگى كورسەتكىشتەن شامامەن 20 بالاعا كوپ.
ايتا كەتەيىك، شاھاردا اعىمداعى جىلى 8197 نارەستە دۇنيە ەسىگىن اشسا، ونىڭ ىشىندە 3951 - قىز جانە 4246 - ۇل بالا. ال، ورتاشا ەسەپپەن قالادا جىلىنا وتىز بەس مىڭنان اسا ءسابي دۇنيە ەسىگىن اشادى.