ەلوردادا ءىرى كولەمدەگى ەسىرتكىمەن ەر ادام ۇستالدى
ەلوردانىڭ پاترۋلدىك پوليتسيا قىزمەتكەرلەرى كەزەكشىلىك كەزىندە قاراعاندى تاسجولىنىڭ بويىنداعى اعاشتاردىڭ اراسىنان بەلگىسىز ەر ادامدى بايقاعان.
«كۇدىكتى ماڭايىن ۇيالى تەلەفون كامەراسىنا ءتۇسىرىپ جۇرگەن. پوليتسەيلەر ونى توقتاتىپ، ورماندا قانداي ماقساتپەن جۇرگەنىن سۇراعاندا، زيرات باسىنان كەلە جاتقانىن ايتقان. ءبىراق، ەر ادامنىڭ قاتتى قوبالجىپ تۇرعانى كۇدىك تۋدىرعان. تەكسەرە كەلە پوليتسيا قىزمەتكەرلەرى اعاش تۇبىنەن مۇقيات قاپتالعان سينتەتيكالىق ەسىرتكى تاۋىپ الدى. پاكەتتە «مەفەدرون» جانە «الفا- РVР « سينتەتيكالىق ەسىرتكىسىنىڭ بارى انىقتالدى. الىنعان پرەپاراتتىڭ جالپى سالماعى 1,25 كەلىدەن اسادى»، - دەلىنگەن حابارلامادا.
پوليتسيانىڭ حابارلاۋىنشا، ەسىرتكىنى ەلورداعا جەتكىزگەن 27 جاسار الماتى قالاسىنىڭ تۇرعىنى بولىپ شىقتى.
«كۇدىكتى ەسىرتكىنى نۇر-سۇلتان قالاسىنىڭ اۋماعىندا ساتپاق بولعان. قازىرگى ۋاقىتتا سوتقا دەيىنگى تەرگەپ-تەكسەرۋ ءجۇرىپ جاتىر. 6 مىڭنان استام ءبىر رەتتىك دوزانىڭ قۇنى «قارا» نارىقتا 25 ميلليون تەڭگەنى قۇرايدى. جىل باسىنان بەرى ەلوردا اۋماعىندا زاڭسىز اينالىمنان 30 كەلىدەن استام سينتەتيكالىق ەسىرتكى تاركىلەندى»، - دەيدى ۆەدومستۆودان.
وسى ورايدا پوليتسيا دەپارتامەنتى سينتەتيكالىق ەسىرتكىنىڭ ادام اعزاسىنا تيگىزەتىن جانە تاۋەلدىلىككە اكەلەتىن زيانى تۋرالى ەسكەرتەدى.
«پرەپارات مي مەن جۇلىننىڭ فۋنكتسيالارىنا كەرى اسەر ەتىپ، قوزعالىس پروتسەستەرى، ەستە ساقتاۋ، ەموتسيالاردى قالىپتاستىرۋ سەزىمىن بۇزادى. سونداي-اق، يممۋندىق جانە رەپرودۋكتيۆتى جۇيەلەردىڭ جاسۋشالارىنا تەرىس ىقپال ەتىپ، ينتەللەكت بۇزىلادى»، - دەگەن ەسكەرتۋ جاسالدى.
«ەسىرتكى قىلمىسىمەن كۇرەستە ەسىرتكىنى ساتۋ، جارنامالاۋ جانە ەلوردا ارقىلى وتكىزۋ فاكتىلەرىن انىقتاۋعا باسا نازار اۋدارىلۋدا. ءبىز 2022-2025-جىلدارعا ارنالعان «نۇر-سۇلتان - ەسىرتكىسىز قالا» جاڭا باعدارلاماسىن ازىرلەدىك، وندا ەسىرتكىگە قارسى ءىس - قيمىلدى كۇشەيتۋ بويىنشا ءبىرقاتار ءىس-شارا كوزدەلگەن»، - دەيدى قالالىق پوليتسيا دەپارتامەنتىنىڭ باسشىسى، گەنەرال- مايور مارات تولەبايەۆ.
وسىعان دەيىن قازاقستاندا 8 ەسىرتكى زەرتحاناسى جويىلعانىن حابارلاعانبىز.
