مەديتسينا سالاسىندا ءىرى كولەمدە بيۋجەت قاراجاتىن جىمقىرعاندار سوتتالدى

كوكشەتاۋ. قازاقپارات - اقمولا وبلىسىندا مەديتسينالىق جابدىقتاردى ساتىپ الۋ ءۇشىن بولىنگەن بيۋجەت قاراجاتىن جىمقىرعاندار سوتتالدى، دەپ حابارلايدى قازاقپارات ءتىلشىسى.
None
None

اقمولا وبلىستىق سوتى باسپا ءسوز قىزمەتىنىڭ مالىمەتىنشە، كوكشەتاۋ قالالىق سوتىندا قىلمىستىق كودەكستىڭ 189-بابى 4-بولىگى 2-بولىمشەسى بويىنشا قىلمىس جاسادى دەپ ايىپتالعان ءۇش ادامعا قاتىستى قىلمىستىق ءىس قارالدى.

«سوت انىقتاعانداي، اقمولا وبلىسى دەنساۋلىق ساقتاۋ باسقارماسىنىڭ بۇرىنعى باسشىسى مەن ونىڭ سىبايلاسى - ج ش س ديرەكتورى ەلدە جاريالانعان توتەنشە جاعداي كەزەڭىندە ءوزارا الدىن الا ءسوز بايلاسىپ، جەكە مەديتسينالىق جابدىقتار (2 ناركوز-تىنىس الۋ اپپاراتى، 7 مەديتسينالىق توسەك-ورىن جانە 1 وكپەنى جاساندى جەلدەتۋ اپپاراتى) ساتىپ الۋعا بولىنگەن بيۋجەت قاراجاتىن جىمقىرعان. ولاردىڭ بۇرىن قولدانىستا بولعان، وندىرىستەن الىنعان جانە دايىنداۋشى زاۋىتتاردان كەپىلدىكسىز جابدىقتار ساتىپ العانى انىقتالدى. بۇل قولدانىستاعى زاڭنامادا قويىلاتىن تالاپتارعا سايكەس كەلمەيدى. سول سەبەپتى، وسى ەكى سوتتالۋشى تاراپىنان جاسالعان قىلمىستىق ارەكەتتەرمەن مەملەكەتكە 86 ميلليون 895 مىڭ تەڭگە - اسا ءىرى كولەمدە ماتەريالدىق زالال كەلتىرىلدى. ال، اقمولا وبلىستىق تۋبەركۋلەزگە قارسى ديسپانسەردىڭ باس دارىگەرى بولىپ ىستەگەن ق. تاشمەتوۆ بولسا، قىزمەتىنەن بوساتىلعانىنا قاراماستان، جەكە قۇجاتتارعا قول قويعان. سونىڭ سالدارىنان مەملەكەتكە 25 ميلليون تەڭگەدەن استام سومادا ماتەريالدىق زالال كەلتىرىلدى»، - دەدى ۆەدومستۆودان.

وبلىستىق سوتتىڭ باسپا ءسوز قىزمەتى اتاپ وتكەندەي، پروكۋرور سوتتان سوتتالۋشىلاردىڭ ۇشەۋىنە 10-8 جىل مەرزىمگە باس بوستاندىعىنان ايىرۋ جازاسىن سۇرادى. جابىرلەنۋشىنىڭ وكىلى - اقمولا وبلىسىنىڭ دەنساۋلىق ساقتاۋ باسقارماسى دا زاڭنىڭ بارلىق قاتاڭدىعى بويىنشا جازا تاعايىنداۋدى سۇرادى. سوتتالۋشىلار كىناسىن مويىندامادى.

«سوت ۇكىمىمەن اقمولا وبلىسى دەنساۋلىق ساقتاۋ باسقارماسىنىڭ بۇرىنعى باسشىسى مەن ونىڭ سىبايلاسى - ج ش س ديرەكتورى قىلمىستىق كودەكستىڭ 189-بابى 4-بولىگى 2-بولىمشەسى بويىنشا جازاسىن ورتاشا قاۋىپسىز قىلمىستىق-اتقارۋ جۇيەسى مەكەمەسىندە وتەۋمەن، مەملەكەتتىك قىزمەتتە جانە كۆازيمەملەكەتتىك سەكتوردا لاۋازىمدارعا ورنالاسۋعا ءومىر بويىنا تىيىم سالۋمەن 8 جىلعا باس بوستاندىعىنان ايىرۋ جازاسىنا كەسىلدى. ال، اقمولا وبلىستىق تۋبەركۋلەزگە قارسى ديسپانسەردىڭ باس دارىگەرى بولىپ ىستەگەن ق. تاشمەتوۆ قىلمىستىق كودەكستىڭ 195-بابىنىڭ 4-بولىگىمەن جەكە ەپيزود بويىنشا (الداۋ نەمەسە سەنىمگە قيانات جاساۋ جولىمەن مۇلىكتىك زالال كەلتىرۋ) كىنالى دەپ تانىلدى.

ول «ق ر تاۋەلسىزدىگىنىڭ 30 جىلدىعىنا بايلانىستى راقىمشىلىق جاساۋ تۋرالى» ق ر زاڭىنىڭ قولدانىلۋىنا بايلانىستى قىلمىستىق جاۋاپتىلىقتان بوساتىلدى. اتالعان ءىس بويىنشا زالال تولىق كولەمدە وتەلدى»، - دەپ تولىقتىردى ۆەدومستۆودان.

سونىمەن بىرگە، ق. تاشمەتوۆتى «پاراسات» مەملەكەتتىك ناگراداسىنان ايىرۋ تۋرالى ۇسىنىس ەنگىزىلدى.

بۇدان بولەك، سوتتالۋشى ج ش س ديرەكتورىنىڭ قىمبات اۆتوكولىگى مەملەكەت كىرىسىنە الىندى.

پروكۋرور مەن جابىرلەنۋشىنىڭ ازاماتتىق تالاپ-ارىزى قاناعاتتاندىرىلدى، سوتتالعانداردان جابىرلەنۋشىنىڭ پايداسىنا 86,8 ميلليون تەڭگە سوماسىنداعى ماتەريالدىق زالالدى وتەۋ ورتاق تارتىپپەن ءوندىرىپ الىندى. سوت ۇكىمى زاڭدى كۇشىنە ەنگەن جوق.

ايتا كەتسەك، اقمولا وبلىسىندا اياقتالماعان قۇرىلىس نىساندارى بويىنشا بيۋجەت قاراجاتى نەگىزسىز تولەنگەنى انىقتالعان ەدى.

سوڭعى جاڭالىقتار