مۇحتار اۋەزوۆتىڭ «قيلى زامان» پوۆەسى بويىنشا تەلەحيكايا تۇسىرىلەدى

بۇل تۋرالى ق ر پرەمەر- ءمينيسترىنىڭ ورىنباسارى ەرالى توعجانوۆتىڭ توراعالىعىمەن مۇحتار اۋەزوۆتىڭ 125 جىلدىق مەرەيتويىن مەرەكەلەۋگە دايىندىق جونىندەگى جۇمىس توبىنىڭ وتىرىسىنان ءمالىم بولدى، دەپ حابارلايدى قازاقپارات.
قازاقتىڭ زاڭعار جازۋشىسىنىڭ مەرەيتويىن اتاپ ءوتۋ جونىندەگى جالپى رەسپۋبليكالىق جوسپارعا سايكەس بيىل 4 باعىت بويىنشا 82 ءىس- شارا ۇيىمداستىرىلادى. ونىڭ ىشىندە، م. اۋەزوۆتىڭ ادەبي- مەموريالدىق ءۇي- مۇراجايى عيماراتىنا عىلىمي- رەستاۆراتسيالاۋ جۇمىستارى جۇرگىزىلىپ، شولپان- اتادا جازۋشىنىڭ ءبيۋستى ورناتىلادى.
مەكتەپ وقۋشىلارىنا ارنالعان «اۋەزوۆ تانۋ» بەينەدارىستەر تسيكلى ازىرلەنىپ، ادەبي پودكاستتار جاسالادى. حالىقارالىق تەاتر فەستيۆالى وتكىزىلىپ، «اقان- زايرا» تراگەدياسى العاش رەت ساحنالاناتىن بولادى. سونداي- اق، «قيلى زامان» پوۆەسى بويىنشا تەلەحيكايا ءتۇسىرۋ قولعا الىنباقشى. شەتەل ارحيۆتەرىندە م. اۋەزوۆكە قاتىستى قۇجاتتار زەردەلەنىپ، تىڭ ماتەريالدار ىزدەستىرۋ قاراستىرىلعان. بۇدان بولەك، جوسپاردان تىس وڭىرلىك دەڭگەيدە 500 دەن اسا مەرەكەلىك شارا وتكىزۋ كوزدەلىپ وتىر. وسى رەتتە ە. توعجانوۆ جازۋشىنىڭ مەرەيتويىن اتاپ وتۋگە بارلىق وڭىرلەر لايىقتى دەڭگەيدە اتسالىسۋ قاجەتتىگىن اتاپ ءوتتى.
كەڭەس بارىسىندا ادەبيەتتانۋشىلار مەن جازۋشىلار تاراپىنان مەرەيتويدى وتكىزۋگە قاتىستى ءبىرقاتار ۇسىنىستار ايتىلىپ، ولاردى ءىس- شارالار جوسپارىنا ەنگىزۋ جۇمىس توبىمەن ماقۇلداندى. ۆيتسە- پرەمەر قوعامدىق ماڭىزى بار مادەني- بۇقارالىق، اقپاراتتىق- يميدجدىك، عىلىمي زەرتتەۋ، اعارتۋشىلىق ءىس- شارالارىنىڭ جوعارى دەڭگەيدە ورىندالۋى ءۇشىن ءبىرقاتار تاپسىرمالار بەردى. اتاپ ايتقاندا، مادەنيەت جانە سپورت مينيسترىلىگىنە جوسپار مەن مەرەيتوي لوگوتيپىن بارلىق مەملەكەتتىك ورگاندارعا ۋاقىتىلى جولداۋدى جانە ونىڭ ىسكە اسىرىلۋى تۋرالى ەسەپتىك اقپاراتتى توقسان سايىن ۇكىمەتكە ەنگىزىپ وتىرۋدى تاپسىردى. سونداي- اق مۇددەلى مەملەكەتتىك ورگاندار مەن ۇيىمدارعا جوسپاردىڭ ساپالى ورىندالۋىن قامتاماسىز ەتۋ قاجەتتىگىن ەسكەرتتى.
«وتىرىسقا ءبىرقاتار مەملەكەتتىك ورگان وكىلدەرى مەن ءوڭىر اكىمدەرى، قازاقستان جازۋشىلار وداعى مەن م. اۋەزوۆ اتىنداعى ادەبيەت جانە ونەر ينستيتۋتىنىڭ باسشىلىعى، تانىمال تاريحشىلار مەن ادەبيەتتانۋشىلار قاتىستى»، - دەلىنگەن حابارلامادا.