تۇركىستان وبلىسىنىڭ شارۋالارى كاليفورنيالىق قىزىل قۇرتتاردى وسىرۋدە

ورداباسى اۋدانى ءبورجار اۋىلدىق وكرۋگىنە قاراستى قاينار ەلدى مەكەنىنىڭ تۇرعىنى باقىتجان اسەمبەكوۆ كاليفورنيالىق قىزىل قۇرتتاردىڭ باسىن كوبەيتىپ، بيوگۋمۋس وندىرۋدە. ياعني، ورگانيكالىق تازا تىڭايتقىشتى تابيعي جولمەن جاساپ جاتىر.
«بۇگىندە بيوگۋمۋسقا قاجەتتى شيكىزات اۋىل تۇرعىندارىنىڭ اۋلاسىنان كوپتەپ تابىلادى. ەندى سونى كادەگە جاراتىپ، ءتورت تۇلىكتىڭ كوڭىنە شىلاۋشىن قوسىپ، قاراشىرىككە، ياعني، ورگانيكالىق تىڭايتقىشقا اينالدىرۋ ارقىلى ەگىستىك جەردىڭ قۇنارىن ارتتىرۋعا بولادى. جەردىڭ قۇنارلىعى ارتىپ، ول 3 جىلعا ساقتالادى. بۇل، ءبىرىنشى كەزەكتە شەتتەن كەلەتىن حيميالىق تىڭايتقىشتارعا تاۋەلدىلىكتى ازايتادى»، - دەيدى ول.
كاليفورنيالىق قىزىل قۇرتتاردىڭ ءومىر ءسۇرۋ ۇزاقتىعى - 15 جىل. وتە ءتوزىمدى ءارى تەز كوبەيەدى، ءوسىمتال. كەز كەلگەن ادام ءۇي اۋلاسىندا وسىرە الادى. قازىرگى تاڭدا بۇل كاسىپپەن ورداباسى اۋدانىندا 15 كە جۋىق ازامات شۇعىلدانىپ كەلەدى.
كەشەگى كۇنى ءبورجار اۋىلدىق وكرۋگىنە قاراستى قاينار ەلدى مەكەنىندە اۋدان شارۋالارىنا بيوگۋمۋس ورگانيكالىق تىڭايتقىشىن ءوندىرۋدىڭ قىر- سىرىن ۇيرەتۋگە ارنالعان سەمينار- كەڭەس ءوتتى. كەزدەسۋگە الماتى، اقتوبە قالالارى مەن تۇركىستان وبلىسىنا قاراستى بارلىق اۋدان- قالالاردان 100-دەن استام شارۋا قاتىستى.
كەزدەسۋدە سالا ماماندارى بيوگۋمۋس بيزنەسى بويىنشا تاجىريبەمەن ءبولىسىپ، قاتىسۋشىلارعا كاسىپتى قالاي باستاۋ كەرەكتىگىن ەگجەي- تەگجەيلى بايانداپ، ونىڭ قىر- سىرى بويىنشا تولىق اقپارات بەردى.
اۆتور: قايرات زاينيشيەۆ