ەلوردا جۇرتشىلىعى «كوڭىل سازى» اتتى كۇي كەشىن تاماشالادى

نۇر- سۇلتان. قازاقپارات - كۇيدىڭ كاۋسار بۇلاعىنان سۋسىنداعانداي بولدىق. مادەنيەت قايراتكەرى، كۇيشى، كومپوزيتور، ديريجەر نۇرلان بەكەنوۆتىڭ «كوڭىل سازى» اتتى شىعارماشىلىق كەشىن تاماشالاعان كورەرمەندەر وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
None
None

«قازاقستان» ورتالىق كونسەرت زالىنىڭ كامەرالىق زالىنا جينالعان جۇرتشىلىق مۋزىكالىق تۋىندىلاردى تىڭداۋمەن قاتار قازاق كۇيىنىڭ شىعۋ تاريحى، دومبىرانىڭ قاعىستارى مەن بۇراۋلارى تۋرالى مول ماعلۇمات الدى.

كەشتىڭ شىمىلدىعى اشىلعان سوڭ، ساحناعا كوتەرىلگەن نۇرلان بەكەنوۆ حالىق كۇيى «سال كۇرەڭدى»، سۇگىردىڭ «شالقىماسىن»، قۇرمانعازىنىڭ «تورەمۇراتىن»، داۋلەتكەرەيدىڭ «اقبالا قىز» كۇيلەرىن ورىنداپ بەردى.


بۇدان كەيىن ول كورەرمەندەر نازارىن دومبىرانىڭ بەس ءتۇرلى بۇراۋىنا اۋداردى. ونەر سۇيەر قاۋىم تاتتىمبەتتىڭ «بەس تورە» كۇيىن تەرىس بۇراۋدا، اسانقايعىنىڭ «جەلماياسىن» شالىس بۇراۋدا، حالىق كۇيى «قوس كەلىنشەكتى» تەل بۇراۋدا تاماشالاپ، قوشەمەت ءبىلدىردى. ن. بەكەنوۆ ءوزىنىڭ «ساعىنىش» كۇيىن قالىس بۇراۋدا تارتىپ بەردى.

وسى كەشكە شاقىرىلعان قوناقتار اراسىندا قازاقستاننىڭ ەڭبەك سىڭىرگەن قايراتكەرى امانتاي جۇماشيەۆ ونەر جولىنداعى ىنىسىنە تابىس تىلەپ، «اقتوعايىم» اتتى انمەن شاشۋ شاشتى. كۇيشى، مۋزىكا زەرتتەۋشىسى ءۋالي بەكەنوۆتىڭ «جەڭگەم سۇيەر» كۇيىن وسى ءۋاليدىڭ نەمەرەسى سەرىك بەكەنوۆ ورىنداپ بەردى. قازاقستاننىڭ ەڭبەك سىڭىرگەن قايراتكەرى انار مۇزداحانوۆا مەن «قۇرمەت» وردەنىنىڭ يەگەرى جانار ءجۇسىپوۆا ونەر كورسەتتى. دانيار مۇقان، كۇنسۇلۋ تۇرىكپەن، اسقار مۇقيات ءان شىرقادى.


سونداي- اق اۆتوردىڭ «قۇلتۋمانىڭ تولعاۋى»، «تالپىنىس»، «اقىن ارمانى»، «كوڭىل سازى»، «وراقتى باتىر»، «التاي سازى» كۇيلەرى ورىندالدى. ن. بەكەنوۆتىڭ شىعارعان اندەرى دە از ەمەس. سونىڭ ءبىرى اقىن نۇرلان قالقانىڭ ولەڭىنە جازىلعان «تۋعان جەر» ءانىن تالانتتى ءانشى ايگەرىم امانجولوۆا شىرقاپ، قوشەمەتكە بولەندى.

جانار قاسىموۆا جەتەكشىلىك ەتەتىن «بويتۇمار» قوبىزشىلار كۆينتەتى، قارلىعا نيحانبايەۆا جەتەكشىلىگىمەن «جاس ورەن» بالالار ءانسامبلى جانە «اقجانبەك- ارىس» دومبىراشىلار ءانسامبلى ءوز شەبەرلىكتەرىن تانىتىپ، كۇي كەشىنىڭ كوركىن اشا ءتۇستى. كەش سوڭىندا ءسوز العان ق ر ەڭبەك سىڭىرگەن قايراتكەرى، كومپوزيتور، پروفەسسور ايتقالي جايىموۆ:

«نۇرلاننىڭ ۇلكەن وركەسترگە ارناپ جازعان كۇردەلى ءارى كولەمدى شىعارمالارى بار. تۋىندىلارى رەسپۋبليكالىق بايقاۋلاردا جۇلدەگە يە بولدى. جاستارعا قامقورلىق جاساپ ءجۇر. ءوزىنىڭ بالالارىن دا ونەر مەن بىلىمگە باۋلىپ كەلەدى. ءبىز سوعان قۋانامىز. ونەر جولىنداعى شاكىرتىمىزگە ۇلكەن تابىستار تىلەيمىز!» - دەدى.

كەلەسى كەزەكتە فيلولوگيا عىلىمدارىنىڭ دوكتورى، پروفەسسور، اكادەميك ديحان قامزابەك ۇلى: «ونەر، مۋزىكا تابيعاتپەن تىكەلەي بايلانىستى عوي. نۇرلان كىم دەسەك، جىلدىڭ ءتورت مەزگىلىندە جاقسى كۇندەر قانداي بولسا، نۇرلان سونداي. بارشا جانعا جارقىن كوڭىل- كۇي سىيلاپ جۇرەدى. ەكىنشى قىرى - سونشالىقتى ۇلتشىل. تۋا بىتكەن قاسيەتى مە، الدە مەكتەپتەگى جانە كەيىنگى ۇستازدارى سولاي تاربيەلەگەن بە، ۇلتتىق مۇددەنى بارىنەن جوعارى قويادى. كۇي شىعارۋ ءۇشىن تاريحتى تەرەڭ ءبىلۋ كەرەك. نۇرلان ءوزى زەرتتەپ جۇرگەن تاقىرىپتارعا دەگەن ىزدەنىسى مول. قاي عالىم قانداي سالانى زەرتتەپ جۇرسە، سودان كوبىرەك ماعلۇمات الۋعا تىرىسادى. سونىڭ ءبارى جيناقتالىپ، سۇرىپتالا كەلە، ىشكى تولقىنىسىنان بارىپ كۇي شىعادى ەكەن. وسى قىرىنا بۇگىن كوزىمىز جەتتى، كوڭىلىمىز تولدى. رامازان ايىنداعى كونتسەرتى بىزگە كاۋسار سۋىنداي بولدى. الار اسۋلارى بيىك بولسىن!»، - دەپ تىلەگىن ايتتى.

ەسكە سالا كەتەيىك، بۇدان بۇرىن ەلوردادا كۇيشى- كومپوزيتور نۇرلان بەكەنوۆتىڭ «كوڭىل سازى» شىعارماشىلىق كەشى وتەتىنىن جازعان بولاتىنبىز.

اۆتور: ەلجان ەرالى

سوڭعى جاڭالىقتار