قايىزعاق نە ءۇشىن پايدا بولادى؟

قايىزعاقتان ارىلۋ ءۇشىن الدىمەن ونىڭ پايدا بولۋ سەبەبىن ءتۇسىنۋ كەرەك. قانداي پروبلەمالار قايىزعاقتىڭ شىعۋىنا سەبەپشى بولۋى مۇمكىن ەكەنىن قاراستىرايىق.
زات الماسۋدىڭ بۇزىلۋى
زات الماسۋ بۇزىلسا، ماي بەزدەرى جۇمىسى جاڭىلادى. سونىڭ سالدارىنان قايىزعاق پايدا بولادى. ول اعزانى كەز كەلگەن اۋرۋ تۋدىراتىن فاكتورلارعا ءالسىز ەتەدى. اعزاداعى زات الماسۋ پروتسەستەرىن رەتكە كەلتىرۋ ءۇشىن ءبىرىنشى كەزەكتە، راتسيوندى دۇرىستاۋ كەرەك. كۇنىنە كەم دەگەندە 3 رەت، ءبىراق از-ازدان تاماقتانۋعا تىرىسىڭىز. قۇرامىندا ءتيىمدى مەتابوليزم ءۇشىن قاجەتتى بارلىق ەلەمەنتتەرى بار دۇرىس تاماقتار جەڭىز. مۇنداي ونىمدەرگە جۇمىرتقا، مايسىز ەت، جاڭعاقتار، بالىق، كوكونىستەر جانە ءسۇتتى ونىمدەر جاتادى.
گورموندى وزگەرىس
جۇكتىلىك، ىشكە قابىلدايتىن كونتراتسەپتيۆتەر جانە گورموندى دارىلەر قايىزعاقتىڭ پايدا بولۋىنا سەبەپشى بولۋى مۇمكىن. ەگەر ەمدەلىپ جۇرگەندە قايىزعاق پايدا بولسا جانە سوڭعى كەزدەرى گورموندى وزگەرىستەردى بايقاپ جۇرسەڭىز، ول تۋرالى دارىگەرگە حابارلاۋ كەرەك جانە تريحولوگ ماماننىڭ كەڭەسىن العان ءجون.
كۇيزەلىس
كۇيزەلىسكە شالدىققان ادامدار ءجيى قايىزعاقپەن قينالادى. مازاسىز كۇيدە جۇرگەن كەزدە جاعداي ودان سايىن ۋشىعادى. ونىڭ سەبەبى كۇيزەلىس اعزانىڭ قورعانىش مەحانيزمىن السىرەتەدى. سوندىقتان كۇيزەلىسپەن كۇرەسۋدى ۇيرەنۋ ماڭىزدى. مەديتاتسيالىق جاتتىعۋلاردىڭ تۇرلەرىن زەرتتەپ، ءوزىڭىز ءۇشىن ءتيىمدىسىن انىقتاڭىز.
تەرى سەزىمتالدىعى
ۋاقىت وتە تەرى سەزىمتالدىعى وزگەرۋى مۇمكىن. ول ۇيرەنشىكتى نەمەسە جاڭا كۇتىم قۇرالدارىنا باسقاشا اسەر بەرىپ باستايدى. قايىزعاق شاشقا ارنالعان كۇتىم قۇرالدارىنىڭ سەبەبىنەن پايدا بولىپ تۇرعانىن انىقتاۋ ءۇشىن ۋاقىتشا سۋسابىن مەن كونديتسيونەردى اۋىستىرىپ كورىڭىز. ەگەر قۇرالدى وزگەرتۋ قايىزعاقتان ارىلۋعا كومەكتەسسە، ەسكى ءارى جاڭا كۇتىم قۇرالدارىڭىزدىڭ قۇرامدارىن زەرتتەپ، پروبلەمانى تۋىنداتىپ تۇرعان مۇمكىن نارسەنى انىقتاۋعا تىرىسىڭىز. سودان سوڭ كەلەسىدە قۇرامى ۇقساس قۇرالدى ساتىپ الماڭىز.
اۆيتامينوز
اعزاعا A، B، C، E دارۋمەندەرى، مىس، كالتسي جانە مىرىش جەتىسپەسە، قايىزعاق پايدا بولادى. سەبەبى ا دارۋمەنى ماي بەزدەرىنىڭ قىزمەتىن رەتكە كەلتىرەدى جانە باس تەرىسىنىڭ قايتا قالپىنا كەلۋ پروتسەسىنە قاتىسادى. ۆ توبىنىڭ دارۋمەندەرى شاش ساۋلىعى مەن ونىڭ وسۋىنە جاۋاپ بەرەدى جانە باس تەرىسىن قاجەتتى قىشقىلدارمەن قامتاماسىز ەتەدى.
يممۋنيتەتتى ارتتىرۋ ءۇشىن جانە ۇيقىشىلدىقپەن كۇرەسۋ ءۇشىن راتسيوندى تۇرلەندىرىڭىز. تازا اۋادا سەرۋەندەۋ، پوزيتيۆتى ەموتسيالار جانە دۇرىس ۇيقى ومىرلىك كۇشتى قالىپقا كەلتىرۋگە كومەكتەسەدى.
تەرشەڭدىك
شاش گيگيەناسىن دۇرىس ساقتاماۋ جانە تەرشەڭدىك تە قايىزعاقتىڭ پايدا بولۋىنا سەبەپشى بولا الادى. بۇل جاعدايدا ول ادەتتە ىستىق كۇندەرى نەمەسە باس كيىمدى ۇزاق كيەتىن ۋاقىتتا - قىس مەرزىمىندە پايدا بولادى. بۇل پروبلەمانى جەڭۋ ءۇشىن قاراما-قارسى دۋش قابىلداۋ كەرەك جانە قاجەتتىلىك تۋىنداعان بويدا شاشتى جۋىپ العان دۇرىس. سونداي-اق، اۋاسى قۇرعاق بولمەدە ۇزاق وتىرماۋعا تىرىسىڭىز نەمەسە اۋا ىلعالداندىرعىش قۇرال قولدانىڭىز.
اسقازان-ىشەك جولى اۋرۋلارى
كوليت، ديسباكتەريوز، ءجيى ءىش قاتۋ جانە باۋىر اۋرۋلارى سەبەبىنەن Malassezia ساڭىراۋقۇلاعىنىڭ بەلسەندىلىگى ارتۋى مۇمكىن. ال ونىڭ سەبەبىنەن قايىزعاق پايدا بولادى. اسقازان-ىشەك جولى پروبلەمالارىنىڭ سەبەبىنەن اعزا قورەكتىك زاتتاردى ءسىڭىرۋدى توقتاتادى جانە قالىپتى جۇمىس ءۇشىن قاجەتتى دارۋمەندەردى، مينەرالداردى جانە مايلى قىشقىلداردى المايدى.
اسقازان-ىشەك جولى جۇمىسىنىڭ بۇزىلۋى باسقا ورگاندار مەن جۇيەلەردىڭ قىزمەتىنە جاعىمسىز اسەر ەتەدى. تەرىنىڭ بەتكى قاباتى قابىرشاقتانىپ، جارىلادى جانە قابىنا باستايدى. ەگەر زياندى تاماقتى جانە الكوگولدى ءجيى ىشسەڭىز، اعزا كانتسەروگەندەر بولەدى. سوندىقتان، ەگەر جوعارىداعى سەبەپتەردىڭ ەشقايسىسى سىزگە كەلمەسە، گاستروەنتەرولوگتىڭ كومەگىنە جۇگىنىپ كورىڭىز.
ول زەرتتەۋلەر جۇرىگىزىپ، قايىزعاقتىڭ اسقازان-ىشەك جولى ورگاندارىمەن بايلانىسىنىڭ بار-جوعىن انىقتاپ بەرەدى.
massaget.kz