الەم ەلدەرىنەن قازاقستان تاريحىنا قاتىستى سيرەك كىتاپتار جينالادى

بۇل تۋرالى قولجازبالار جانە سيرەك كىتاپتار ۇلتتىق ورتالىعىنىڭ ديرەكتورى جاندوس بولدىقوۆ ءمالىم ەتتى، دەپ حابارلايدى قازاقپارات ءتىلشىسى.
«ءبىزدىڭ ورتالىقتىڭ قۇرىلعانىنا 5 جىل بولدى. بولاشاققا جوسپار كوپ. سونىڭ ءبىرى - الداعى 3 جىل ىشىندە ەل ءىشىن ارالاپ، ءتول تاريحتان حابار بەرەتىن سيرەك كەزدەسەتىن كىتاپتاردى ىزدەۋ. وبلىس، اۋدانداردا كوپكە بەيمالىم قۇندى دۇنيەلەر بار. ماقسات - سولاردى جيناپ، زەرتتەۋ، وڭدەۋ جانە كوپشىلىك نازارىنا ۇسىنۋ. ودان ءارى ەل تاريحىنا قاتىستى سيرەك كەزدەسەتىن كىتاپتاردى ىزدەۋ ماقساتىندا شەتەلگە شىعۋدى كوزدەپ وتىرمىز. جوسپار بويىنشا 20 عا جۋىق ەلدى ارالايمىز. تابىلعان دۇنيەلەردى ەلگە الىپ كەلەمىز. وسىلايشا كەلەشەك ۇرپاققا قالدىراتىن مادەني مۇرانىڭ سانى ارتا تۇسپەك»، - دەدى جاندوس بولدىقوۆ.
بۇعان دەيىن قازاق حاندىعىنا قاتىستى الەمدە بالاماسى جوق 19 قولجازبانىڭ جينالعانى ايتىلعان ەدى. ۇلتتىق ورتالىق مامانىنىڭ ايتۋىنشا، جينالعان قولجازبالار الداعى ۋاقىتتا كورمەگە قويىلىپ، كوپشىلىك نازارىنا ۇسىنىلماق.
ايتا كەتەيىك، بۇگىن ەلورداداعى ۇلتتىق مۋزەيدە ءتول تاريحتان سىر شەرتەتىن سيرەك كەزدەسەتىن قولجازبالار كورمەگە قويىلدى .