قىتايدىڭ تاعى ءبىر مەگاپوليسى ميللياردەرلەر سانى بويىنشا نيۋ- يوركتى باسىپ وزدى

بەيجىڭ. قازاقپارات - قىتايدىڭ وڭتۇستىگىندەگى گۋاندۋن پروۆينتسياسىنداعى شنجىن قالاسى ميللياردەرلەر سانى بويىنشا نيۋ- يوركتى باسىپ وزدى.

بۇل تۋرالى HuRun Report زەرتتەۋ ينستيتۋتىنىڭ الەمدەگى ەڭ باي ميللياردەرلەر رەيتينگىن جاريالاعان بايانداماسىندا ايتىلعان، دەپ حابارلايدى قازاقپارات ءتىلشىسى.

حابارلاماعا سايكەس، ءبىر جىلدا شنجىندەگى ەڭ باي ادامدار تىزىمىنە سەگىز ميللياردەر قوسىلىپ، قىتاي مەگاپوليسىندەگى ولاردىڭ سانى 113 كە جەتىپ، نيۋ- يوركتى باسىپ وزدى. ميللياردەر تۇرعىندارىنىڭ سانى بويىنشا قالالار ءتىزىمىن قىتايدىڭ مەگاپوليستەرى باستاپ تۇر.

سوڭعى مالىمەتتەر بويىنشا، 144 ميللياردەر بەيجىڭدە، شانحايدا (121)، شنجىندە (113) جانە نيۋ- يوركتە (110)، لوندوندا (101) تۇرادى. HuRun Report شەنچجەندەگى ميللياردەرلەردىڭ كوبەيۋى الداعى جىلداردا مەگاپوليسكە ودان دا كوپ جاس كاسىپكەرلەردى تارتاتىن ءۇردىستى كورسەتەتىنىن اتاپ وتەدى.

شنجىننىڭ ورلەۋى 1980 - جىلى « رەفورمالار مەن اشىقتىق» ساياساتىنىڭ ءبىر بولىگى رەتىندە قىتاي ماتەريگىندەگى العاشقى ارنايى ەكونوميكالىق ايماق اتالۋىنان باستالدى. 1979 - جىلدان 2021 - جىلعا دەيىن شنجىننىڭ جالپى ىشكى ءونىمى 475 ميلليارد دوللارعا دەيىن ءوستى. قالادا قىتايدىڭ ەڭ ءىرى تەحنولوگيالىق كومپانيالارى، سونىڭ ىشىندە تەلەكوممۋنيكاتسيالىق الپاۋىت Huawei جانە ينتەرنەت- كونگلومەرات Tencent ورنالاسقان. جەرگىلىكتى بيلىكتىڭ مالىمەتىنشە، وتكەن جىلى شنجىن قالاسىندا 2500 جاڭا جوعارى تەحنولوگيالىق كومپانيا قۇرىلىپ، ولاردىڭ جالپى سانى 17 مىڭعا جەتكەن.