بۇگىنگى عاشىقتار كۇنىندە نە سىيلاۋعا بولمايدى؟
كوپشىلىگى سىيلىق الۋدى ۇناتقانمەن، سىيلىق تاڭداۋدا قيىندىققا ۇشىراپ جاتادى.
بۇل اتاۋلى مەرەكەگە وراي قانداي سىيلىق جاساۋعا بولادى؟ كاسىبي ماركەتولوگتار ساۋلە ءشىنادىلوۆا جانە سارا بولات سىيلىقتار ءتىزىمىن جاساپ كوردى.
قۇمىرا، تاتتىلەر، جۇرەك پىشىنىندەگى بۇيىمدار سەكىلدى ادەتتەگى سىيلىقتار ساننەن شىققانى بەلگىلى.
كاسىبي ماركەتولوگ ساۋلە ءشىنادىلوۆا ەڭ ءبىرىنشى ادامنىڭ قالاۋى مەن تالعامى ەسكەرىلۋى قاجەت ەكەنىن ايتتى.
«سىيلىق بەرۋدەگى ەڭ باستى قاعيدا - سۇيىكتىڭىزدىڭ كوڭىلىنەن شىعۋ. سوندىقتان سىيلىق بەرەر الدىندا سۇيىكتىڭىزدىڭ قالاۋىن، نە جاقسى كورەدى، نە جاقسى كورمەيدى، قانداي قالاۋى بار - ءبارىن ەسكەرگەن ءجون. ويتكەنى نارىقتا سانگە اينالعان، ترەند بولعان قانشاما بۇيىم، زات ءسىزدىڭ ەكىنشى جارتىڭىزعا مۇلدەم قاجەت بولماۋى مۇمكىن»، - دەپ ءتۇسىندىردى مامان.
ول نەگە ءمان بەرۋ كەرەگىن سانامالاپ بەردى:
سۇيىكتىڭىزدىڭ قالاۋى
قىزىعۋشىلىقتارى
كوپتەن ايتىپ جۇرگەن وتىنىشتەرى نە ءوزى ۇناتىپ جۇرگەن دۇنيەسى
مامان بۇدان كەيىن سىيلىق تاڭداۋ ساتىسىنا وتۋگە بولاتىنىن ايتتى.
«سىيلىق ەڭ الدىمەن ۋاقىتقا، نيەتكە، ارينە، بيۋدجەتكە تىكەلەي بايلانىستى بولادى. سىيلىق، توسىنسىي دايىندار الدىندا وسى شارتتارعا نازار اۋدارىڭىز»، - دەدى ول.
ساۋلە ءشىنادىلوۆانىڭ ايتۋىنشا، پسيحولوگيا، ءوزىن تانۋ تاقىرىبىنا بايلانىستى ماحابباتتىڭ 5 ءتىلى بار.
«پسيحولوگيا، ءوزىن تانۋ تاقىرىبىن قاراستىرىپ جۇرگەندەر ماحابباتتىڭ 5 ءتىلى بار ەكەنىن بىلەدى. سىيلىقتاردى دا وسى ماحابباتتىڭ 5 تىلىنە قاراي لايىقتاپ بەرگىم كەلىپ تۇر. سۇيىكتىڭىزدىڭ ماحاببات ءتىلىن انىقتاۋ ارقىلى قاجەت سىيلىقتى ءدال تاۋىپ، كوڭىلىنەن شىعا الاسىز»، - دەدى ماركەتولوگ.
ماحابباتتىڭ 5 ءتىلى بويىنشا كاسىبي ماركەتولوگتان ۇسىنىس:
1. قولداۋ كورسەتۋ، جىلۋلىقتى جاقسى كورەتىندەر ءۇشىن: ادەمى تىلەكتەر جازىلعان اشىقحات، ءوز قولىڭىزدان العىس، جاقسى تىلەك كىتاپشاسىن دايىنداپ بەرۋ.
2. بىرگە ۋاقىت وتكىزۋدى، كوڭىل بولگەندى قالايتىندار ءۇشىن: بىرگە تەاترعا، كينوعا، كەشكى اسقا، ادەمى ەموتسيا سىيلايتىن جەرلەرگە بارۋ، ت. ب.
3. سىيلىق العاندا ءوزىن ەرەكشە سەزىنەتىندەر ءۇشىن: سۇيىكتىڭىزدىڭ قالاۋى مەن ءسىزدىڭ بيۋدجەتىڭىزگە قاراي: سۇيىكتى اۆتورىنىڭ كىتابى، ەرەكشە وزىنە ارناپ جاسالعان بلوكنوت، ادەمى كويلەك، جەيدە، زەرگەرلىك بۇيىمدار، اشەكەيلەر، ەرەكشە بوكستار، كوسمەتيكا، ءاتىر، تەحنيكالىق بۇيىمدار (ناۋشنيك، تەلەفون، ت. ب.)
4. كومەك كورسەتكەندى، قولداۋدى ەرەكشە باعالايتىن جاندار ءۇشىن: بىرگە جوبالار ويلاستىرىپ، ورىنداۋ، كوپتەن ويلاپ جۇرگەن ءىسىن جۇزەگە اسىرۋعا ماتەريالدىق، مورالدىق تۇرعىدا كومەكتەسۋ (دەمەۋشىلىك كورسەتۋ، قاجەت ارەكەتتەردى جاساۋعا ىقپال ەتۋ، ت. ب.). مىسالى، ارمانى شەتەلدە وقۋ بولسا، شەتەلگە وقۋعا تۇسۋگە كومەكتەسەتىن كومپانياعا اقىلى كونسۋلتاتسياعا اپارۋ، ءتىل كۋرستارىنا جازىلۋىنا كومەكتەسۋ، ت. س. س.
ماحابباتتىڭ 5-ءتىلى - فيزيكالىق بايلانىس. بۇل جاعدايدا ىلعي ءسىزدىڭ قۇشاقتاعانىڭىز، جانىندا بولعانىڭىز ماڭىزدى. سۇيىكتىڭىزدى قانداي دا ءبىر فيزيكالىق ارەكەتتەردى بىرگە ورىندايتىن جەرلەرگە شاقىرا الاسىز. مىسالى، بىرگە بيگە بارۋ، بىرگە پاراشيۋتتەن سەكىرۋ، بىرگە كونكي تەبۋدى ۇيرەنۋ دەگەن سەكىلدى.
«ارينە، مۇنىڭ ءبارى ۇسىنىسىمىز عانا. ءدال ءسىزدىڭ سۇيىكتىڭىزگە نە ۇنايتىنىن ءسىز عانا انىق بىلەسىز. ەڭ باستىسى كوڭىلىنەن شىعىپ، ماحابباتتارىڭىزدىڭ لاۋلاي بەرۋىنە تىلەكتەسپىن. عاشىقتار كۇنى قۇتتى بولسىن!» - دەدى ول.
ماركەتولوگ سارا بولاتتىڭ ايتۋىنشا، 15-ءساۋىر - جاي عانا مەرەكە ەمەس، ەكى جاستىڭ ەسىندە قالاتىن مەرەكە. سوندىقتان ءمانى بار سىيلىق جاساعان دۇرىس.
«قىزدار قاۋىمىنا زاتتاي سىيلىق، گۇل الىپ بەرۋ 15-ساۋىردە عانا ەمەس، باسقا كەزدە دە جاسالۋى قاجەت. ويتكەنى بۇل - كوڭىل ءبولۋ. ال 15 -ساۋىردە ەرەكشە كوڭىل ءبولۋ قاجەت. ەڭ باستىسى - اسەر سىيلاۋ»، - دەپ ءتۇسىندىردى مامان.
ماركەتولوگ سارا بولات ەرەكشە سىيلىقتار ءتىزىمىن اتادى.
«مىسالى، قىزدىڭ بارعىسى كەلىپ جۇرگەن جەرىنە اپارۋ. سونىمەن قاتار، قالا سىرتىنا شىعۋ، تاۋعا شىعۋ، پيكنيك ۇيىمداستىرۋ - ەڭ ۇتىمدى تاسىلدەر. شەتەلگە تۋر اپەرۋگە بولادى»، - دەدى ول.
قازىرگى تاڭدا ستيليستەردىڭ كومەگىنە جۇگىنۋ سانگە اينالعان.
«ستيليستتىڭ كومەگىنە جۇگىنۋگە بولادى، ال ستيليست سۇيىكتىڭىزگە لۋك الۋعا كومەكتەسەدى»، - دەدى مامان.
سونىمەن قاتار، ەرەكشە جەرلەرگە اپارۋ نازىك جاندارعا ەموتسيا سىيلايتىنى ءسوزسىز.
«سپا- سالوندارعا، شوپپينگكە، قۇمىرا، سۋرەت سالاتىن جەرلەرگە سەرتيفيكات الىپ بەرۋگە بولادى»، - دەدى سارا بولات.
سارا بولات 15-ساۋىردە مەيرامحاناعا اپارۋ، گۇل سىيلاۋ، كينوعا اپارۋ دۇرىس ەمەس ەكەنىن ايتتى. ونىڭ ايتۋىنشا، بۇل قالىپتى كۇندە دە جاسالادى. سوندىقتان ەستە قالماۋى مۇمكىن. كەرىسىنشە جىگىت قانداي دا ءبىر فۋتبول كلۋبىنىڭ جانكۇيەرى بولسا، وعان سول قۇرامانىڭ كيىمىن اپەرۋگە بولاتىنىن جەتكىزدى.
«قازىر دامىعان زامان. سوعان وراي جىگىتكە ءوزى قىزىعىپ جۇرگەن ونلاين كۋرس بولسا، سونى ساتىپ الىپ بەرۋگە بولادى. ول ءبىر جاعىنان دامۋ، ءبىر جاعىنان پايدالى سىيلىق»، - دەدى ول.
جىگىتتەر قاۋىمىنا سۇيىكتىسىنە سىيلاۋعا بولاتىن سىيلىقتار ءتىزىمى:
ەر ازاماتتار سىيلىق باستى نارسە ەمەس ەكەنىن، باستىسى كوڭىل ەكەنىن ۇمىتپاۋى قاجەت. ويتكەنى ول قارىم- قاتىناستىڭ بەرىك بولۋىنا ىقپال ەتەدى. سوندىقتان ەرتەرەك جوسپارلاۋ، ۋاقىتىن بەلگىلەۋ، قامقورلىق، جىلۋلىق كورسەتۋ، توسىنسىي جاساۋ وتە ماڭىزدى. ايەلدەر قاۋىمى ادەمى جۇرگەندى ۇناتاتىنى، سۇلۋلىقتى سۇيەتىنى اقيقات. سوندىقتان بەلگىلى برەندتىڭ، تانىمال دۇكەندەردىڭ كومەگىنە ساپالى بوياۋ ءۇشىن جۇگىنۋگە بولادى. ال تاڭداۋ جاعىنان قينالساڭىز، كەز كەلگەن دۇكەندەگى كومەكشىلەر كەڭەس بەرەدى. سپورتقا بەيىم بولسا، سپورتتىق كيىم نەمەسە فيتنەسكە، بيگە سەرتيفيكات اپەرۋگە بولادى. قازىر 1 جىلعا ارنالعان تولىق كۋرس تۇرلەرى وتە كوپ. بۇيىمدار مەن اشەكەيلەر ەشقاشان ساننەن قالمايدى. ويتكەنى قازىر ەرەكشە ستيلدەگى، تالعامعا ساي اشەكەي تاڭداۋعا مۇمكىندىك كوپ. تەحنيكالىق جابدىقتار دا ءدال وسىنداي. ايەل ادامنىڭ جەكە قاجەتىنە وراي، تەحنيكالىق قۇرال تاڭداۋعا بولادى.
قىزدار قاۋىمىنا سۇيىكتىسىنە سىيلاۋعا بولاتىن سىيلىقتار ءتىزىمى:
ەر ادامعا سىيلىق الۋ قىزدارعا قاراعاندا الدەقايدا قيىن. الايدا ەرلەر قاۋىمىنا سىيلىق الاردا، ونىڭ جاسى، جىنىسى، قىزىعۋشىلىعى مەن تالعامى، كاسىبى، ۇناتاتىن ءتۇسى ەسكەرىلۋى قاجەت.
بۇل ورايدا ساعات - جىگىتتەرگە ارنالعان باستى سىيلىقتاردىڭ ءبىرى. سونداي- اق، ونىڭ تالعامىنا ساي سۇيىكتى دۇكەنىنە سەرتيفيكات ۇسىنۋعا بولادى.
قىزدار قاۋىمى دا، ەرلەر دە سىيلىق تاڭداردا، سىيلىق الاردا شىنايى بولۋى قاجەت جانە قىزدارعا اقشا سىيلاماعان دۇرىس. ويتكەنى بۇل ونىڭ كوڭىلىن قالدىرىپ، «كوڭىل بولمەدى، ۋاقىت تاپپادى» دەگەن تەرىس وي قالىپتاستىرادى. سونىمەن قاتار، سىيلىقتى ۇسىنار كەزدە دە ەرەكشە تاسىلمەن بەرۋ كوپ ماسەلەنى شەشەدى. ويتكەنى رومانتيكا ەشقاشان ارتىق ەتپەيدى.
