استاناداعى «ل ر ت» جوباسى قانداي بولماق؟
ەلورداداعى ءبىر ل ر ت-نىڭ ءوزى نەگە تۇرادى؟ وسى ل ر ت- نى شاما كەلسە، سالىپ الايىق دەيدى ۋربانيستەر. ويتكەنى سەگىز جىلدان سوڭ ەل استاناسىندا جەڭىل كولىك سانى 2 ەسە ۇلعايادى. سول ۋاقىتا كەپتەلىستە قازىرگىدەن الدەقايدا كوپ ۋاقىت تۇرۋعا تۋرا كەلمەك، دەپ حابارلايدى «حابار 24».
قاڭتار ايىنان باستاپ ۋربانيستەر ورتالىعى حالىق اراسىندا بايقاۋ جاريالاعان. ماقسات - ل ر ت قۇرىلىسىن وڭتايلاندىرىپ، جوبانى ىسكە قوسۋ بويىنشا ۇسىنىستار قابىلداۋ.
داريعا تاشەنوۆا، ءتىلشى:
- ەلوردادا جەڭىل رەلستى كولىك جوباسىنىڭ قۇرىلىسى 2011 -جىلى باستالدى. جوسپار بويىنشا ول 2020 -جىلى اياقتالۋى ءتيىس ەدى. ءبىراق قارجى ماسەلەسىنە بايلانىستى قۇرىلىستى توقتاتۋعا تۋرا كەلدى. ال بۇل كونسترۋكتسيالار حالىق اراسىندا سىبايلاس جەمقورلىقتىڭ ەسكەرتكىشى دەپ اتالىپ كەتتى.
بيىل مەملەكەت باسشىسىنىڭ ءوزى ل ر ت- نىڭ قاتە جوبا ەكەنىن راستادى. دەگەنمەن ونى سوڭىنا دەيىن اياقتاۋ قاجەتتىلىگىن قاداپ ايتتى. وسى ورايدا قالالىق ۋربانيستيكا ورتالىعى بۇكىل ەل بويىنشا بايقاۋ جاريالاپ، ل ر ت- نى سالۋعا قاتىستى ۇسىنىستار قابىلداي باستادى. قازىردىڭ وزىندە 400-دەن استام مامان ءوز كوزقاراسىمەن ءبولىسىپ، جوبانى جالعاستىرۋ جولدارىن ايقىندادى.
ەلنار بازىكەن، قالالىق ۋربانيستيكا ورتالىعىنىڭ باسشىسى:
- ەل تۇرعىندارى بۇل بايقاۋعا ءتۇرلى شىعارماشىلىق جوبالارىن جىبەردى. ءبىرى نيۋ-يورك قالاسىنداعىداي حايلاين سالۋدى ۇسىنسا، باسقالارى ونى جاياۋ جۇرگىنشىلەر ءۇشىن قانداي دا ءبىر كەڭىستىك ۇيىمداستىرۋدى ءجون كورىپ وتىر. تاعى ءبىرى ترامۆاي، اۆتوبۋس نەمەسە اۆتوبان جاساۋعا ۇسىنىس جاسادى. ءبىز ۋربانيست رەتىندە قوعامدىق كولىك يدەياسىنا باسىمدىق بەرىپ وتىرمىز. ويتكەنى قازىردىڭ وزىندە قالادا 400 مىڭنان استام كولىك تىركەلگەن. 8 جىلدان كەيىن ونىڭ سانى 2 ەسەگە ۇلعايادى. سوندا كەپتەلىستىڭ قانداي بولاتىنىن ەلەستەتىپ كورىڭىز.
بايگەگە قاتىسىپ، باعىن سىنايمىن دەگەندەردىڭ ءبىرى - الماتىلىق ەرمەك بەكمۇراتوۆ. ول بايقاۋ جاريالانعاننان كەيىن ارىپتەسىمەن بىرگە 2 اپتا ىشىندە بىرەگەي جوبا ويلاپ تاپتى. كاسىپكەردىڭ پىكىرىنشە، ل ر ت باعانالارىنىڭ ۇستىندە حالىققا قىزمەت كورسەتۋ ورتالىقتارىن اشۋعا بولادى. سالانىڭ قىر-سىرىن جەتىك مەڭگەرگەن ازامات جەڭىل كونسترۋكتسيالاردى قولدانۋ ارقىلى قۇرىلىستى ايتارلىقتاي ارزانداتۋعا بولادى دەپ ەسەپتەيدى. ماسەلەن، ول ءار باعاناعا 5-6 ميلليون تەڭگە جەتىپ قالادى دەگەن پىكىردە.
ەرمەك بەكمۇراتوۆ، قۇرىلىسشى:
- حالىققا تۇرمىستىق قىزمەت كورسەتۋ ورتالىعىن سالسا دەپ ويلايمىن. بيزنەسمەندەرگە بەرسە. ديزاينىن كەڭ دالا ستيلىندە دەپ وتىرمىز. تومەنگى جاعىندا كيوسكتەر بولادى، جوعارىدا پروسترانستۆو، كولىك تۇراقتارى ورنالاسقان.
ەل تۇرعىندارىنىڭ اراسىندا ل ر ت كونسترۋكتسيالارىن مۇلدەم بۇزىپ تاستاۋ كەرەك دەگەن ويلار دا ايتىلىپ جاتىر. ءبىراق ساراپشىلار ول وتە قىمباتقا تۇسەتىنىن العا تارتادى. ودان دا ستانسا سانىن ەداۋىر ازايتىپ، جوبانى اياعىنا دەيىن جەتكىزۋ قاجەت، - دەيدى ولار.
ەلنار بازىكەن، قالالىق ۋربانيستيكا ورتالىعىنىڭ باسشىسى:
- ءبىز ل ر ت جوباسىن قالانىڭ كولىكتىك جۇيەسى رەتىندە قاراستىرىپ وتىرمىز. حالىقارالىق دەڭگەيدە جۇمىس ىستەيتىن ۋربانيستەردى شاقىرىپ، كەڭەستەرىن تىڭدادىق. كوبى، جوبانى مارەسىنە دەيىن جەتكىزۋ قاجەت ەكەنىن ايتادى. بۇل جوبانىڭ ۇزاق ۋاقىتقا سوزىلاتىنىن ەسكەرگەن ءجون. قازىر ستانسا سانىن ازايتساق، كەلەشەكتە جەلىنى ۇزارتۋعا بولادى. ول بۇكىلالەمدىك تاجىريبە. مىسالى، ماسكەۋ قالاسىنداعى مەترونىڭ ستانسالارى 10 جىلدا ءبىر رەت سالىنادى. ميلاندا ل ر ت سالىنعان اۋدانداردا قۇرىلىس قارقىنى ارتىپ، تۇرعىندار كوبەيگەن. الماتى مەتروسىنىڭ قۇرىلىسىنا قاتىستى كوپ سىني پىكىرلەر ايتىلىپ جاتتى. الايدا قازىر قالا تۇرعىندارى سول مەترونىڭ قىزىعىن كورىپ جاتىر.
اتالمىش بايقاۋ ءالى دە جالعاسىپ جاتىر. قالاعاندار ۋربانيستيكا ورتالىعىنىڭ ەلەكتروندى پوشتاسىنا نەمەسە الەۋمەتتىك جەلىدەگى پاراقشالارىنا ءوز ۇسىنىستارىن جازىپ، جىبەرۋىنە بولادى. كەيىن ساراپشىلار اراسىنان ۇزدىگىن تاڭداپ، ەلوردا اكىمدىگىنە ۇسىنادى. الايدا كۇن تارتىبىنە ونى قارجىلاندىرۋ ماسەلەسى قايتا شىعاتىنى انىق.
