تەستىلەۋ كەزىندە قايتىس بولعان مۇعالىم جۇرەك اۋرۋىمەن ەسەپتە تۇرعان

«بۇگىن، 14- ساۋىردە الماتىداعى جەكەمەنشىك مەكتەپتەردىڭ بىرىندە 1973-جىلى تۋعان مۇعالىم تەستىلەۋ كەزىندە قايتىس بولدى. ەر ادام گيپەرتەنزيالىق (گيپەرتونيالىق) اۋرۋىنا بايلانىستى ەمحانادا ەسەپتە تۇرعان. قازىرگى ۋاقىتتا سوت-مەديتسينالىق ساراپتاما جۇرگىزىلىپ جاتىر» دەلىنگەن حابارلامادا.
مۇعالىمدەر ۇلتتىق بىلىكتىلىك تەستىن 2018-جىلدان بەرى تاپسىرىپ كەلەدى. ورتالىق اقپاراتى بويىنشا، بۇل - وسى 4 جىلداعى العاشقى قايعىلى جاعداي. تەستىلەۋ ورتالىقتارىندا العاشقى كومەك كورسەتۋ ءۇشىن دارىگەرلەردىڭ جۇمىسىن باقىلاۋ كۇشەيتىلمەك.
«بەكىتىلگەن ساناتىنا بايلانىستى 230 مىڭنان استام ادام جىل سايىن جالاقىسىنىڭ %30-50 مولشەرىندە قوسىمشا تولەمدەر الادى. وسى رەتتە اتتەستاتسيانىڭ ءوزى ەرىكتى سيپاتقا يە ەكەنىن اتاپ وتەمىز. پەداگوگتەر جالاقىلارىنا تاعى قوسىمشا اقى الۋ ءۇشىن تەستىلەۋگە جازىلىپ، وسى پروتسەدۋرادان وتەدى. ەگەر تەست تاپسىرۋشى ءوزىن ناشار سەزىنسە، تەستىلەۋ كۇنىن وزگەرتۋ مۇمكىندىگى بەرىلەدى»، - دەپ حابارلادى ۇلتتىق تەستىلەۋ ورتالىعى.
سونداي-اق، الماتى قالالىق ءبىلىم باسقارماسى مارقۇمنىڭ وتباسىنا كوڭىل ايتقانى، بارلىق قاجەتتى كومەك كورسەتىلەتىنى مالىمدەنگەن.
بۇعان دەيىن الماتىدا ۇلتتىق بىلىكتىلىك تەستىن تاپسىرىپ جاتقان مۇعالىمنىڭ قايتىس بولعانى تۋرالى جازعان ەدىك.