ماجار ۋنيۆەرسيتەتتەرى قازاقستاندىق ستۋدەنتتەر ءۇشىن باسەكەلەسىپ جاتىر - ەلشى

نۇر-سۇلتان. قازاقپارات - ۆەنگريا ۋنيۆەرسيتەتتەرى قازاقستاندىق ستۋدەنتتەر ءۇشىن باسەكەلەسىپ جاتىر، دەپ حابارلايدى قازاقپارات.

بۇل تۋرالى ماجارستاننىڭ قازاقستانداعى ەلشىسى ءبىلىم جانە عىلىم ءمينيسترى اسحات ايماعامبەتوۆپەن كەزدەسۋىندە ايتتى. وتتو يۆان رونا قازاقستاندىق ستۋدەنتتەر مەن وقۋشىلار تارتىپتىلىگىمەن، اعىلشىن ءتىلىن جوعارى دەڭگەيدە مەڭگەرۋىمەن جانە بىلىمدىلىگىمەن ەرەكشەلەنەتىنىن اتاپ ءوتتى.

ايتا كەتەيىك، ق ر ءبىلىم جانە عىلىم مينيسترلىگى مەن ۆەنگريانىڭ ادام رەسۋرستارى مينيسترلىگى اراسىندا كەلىسىم بار. وسى قۇجات اياسىندا ۆەنگريا تاراپى جىل سايىن قازاقستاندىقتارعا «Stipendium Hungaricum» ستيپەنديالىق باعدارلاماسى بويىنشا 250 ءبىلىم گرانتىن بولەدى.

«ۆەنگر ج و و- لارى ءتىپتى قازاقستاندىق ستۋدەنتتەر ءۇشىن كۇرەسىپ جاتىر. مىسالى، كەشە عانا اۋىل شارۋاشىلىعى عىلىمدارى ۋنيۆەرسيتەتىنىڭ رەكتورىنان حات الدىم. ول ءوز ۋنيۆەرسيتەتىندە وقيتىن ستۋدەنتتەردىڭ سانىن ستيپەنديا اياسىندا 30 ادامعا دەيىن ارتتىرعىسى كەلەدى. قازاقستاندىق ستۋدەنتتەر ءۇشىن وسىنداي باسەكە ۋنيۆەرسيتەتتەرىمىزدىڭ اراسىندا بار. قۋانتارلىق جاعداي، ويتكەنى بۇل پروفەسسورلىق- وقىتۋشىلار قۇرامى مەن رەكتورلاردىڭ ستۋدەنتتەرگە كوڭىلى تولاتىنىن كورسەتەدى. ارينە ءبىز بۇل باعدارلامانى ودان ءارى دامىتۋعا كۇش سالامىز»، - دەدى ۆەنگريانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى وتتو يۆان رونا.

ديپلومات عىلىمي قاۋىمداستىقتىڭ دا سەرىكتەستىككە قىزىعۋشىلىعى بار ەكەنىن ايتتى. ءوز كەزەگىندە اسحات ايماعامبەتوۆ ارحەولوگيا، تاريح جانە يادرولىق فيزيكا سالالارىندا بىرلەسكەن عىلىمي زەرتتەۋلەر جۇرگىزۋ مۇمكىندىكتەرىن اتاپ ءوتتى.