ءبىلىم وشاقتارىن پايدا كوزىنە اينالدىرعانداردى جاۋاپقا تارتۋ كەرەك - دەپۋتات

نۇر-سۇلتان. قازاقپارات - ءبىلىم وشاقتارىن ءوز پايدا كوزىنە اينالدىرعانداردى لاۋازىمىنا قاراماستان جاۋاپكەرشىلىككە تارتۋ كەرەك.
None
None

بۇل تۋرالى ءماجىلىستىڭ جالپى وتىرىسىندا دەپۋتات بەرىك دۇيسەنبينوۆ ايتتى، دەپ حابارلايدى قازاقپارات ءتىلشىسى.

«اق جول» پارتياسى وتكەن جىلى قازاق ءبىلىمىنىڭ قارا شاڭىراعى، قوعامدا زاڭدى رەزونانس تۋدىرعان ءال-فارابي اتىنداعى قازاق ۇلتتىق ۋنيۆەرسيتەتىنىڭ تيەسىلى جەر تەلىمدەرىنىڭ اۋماعى بەلگىسىز سەبەپتەرمەن ازايۋىنا بايلانىستى باس پروكۋرور مەن ءبىلىم مينيسترىنە ساۋال جولداعان بولاتىن.

وكىنىشكە قاراي، ەلىمىزدىڭ ايماقتارىنداعى مەملەكەتتىك جوعارى وقۋ ورىندارىنىڭ جەرلەرى مەن عيماراتتارىنىڭ دا تالان-تاراجعا ءتۇسىپ، «تىستەگەننىڭ اۋىزىندا، ۇستاعاننىڭ قولىندا» كەتىپ جاتقانىن اقپارات قۇرالدارىنان ەستىپ، ءبىلىپ جاتىرمىز. مىسالى، مەن ءوزىم وقىعان شىعىستاعى سارسەن امانجولوۆ اتىنداعى ۋنيۆەرسيتەتتىڭ باس عيماراتىنان بەس قادام جەردە ورنالاسقان وندىرىستىك شەبەرحانا بۇگىندە بىلىمگە ەشقانداي قاتىسى جوق كاراوكە-بارعا اينالعان»، - دەدى بەرىك دۇيسەنبينوۆ ق ر باس پروكۋرورى بەرىك اسىلوۆ پەن ق ر ءبىلىم جانە عىلىم ءمينيسترى اسحات ايماعامبەتوۆتىڭ اتىنا جولداعان ساۋالىندا.

ونىڭ ايتۋىنشا، ءبىلىم جانە عىلىم مينيسترلىگى ءوز جاۋابىندا ۋنيۆەرسيتەتتىڭ (قاز ۇ ۋ) جەر تەلىمىنىڭ 0,779 گەكتارعا ازايعانىن راستاعان.

«ال باس پروكۋراتۋرانىڭ ساۋالىمىزعا بەرگەن جاۋابىندا 2012 -جىلعى 30-قاڭتارداعى الماتى قالاسى اكىمىنىڭ قاۋلىسىنا سايكەس، ۋنيۆەرسيتەتتىڭ جالپى كولەمى 73,26 گەكتار جەر پايدالانۋ قۇقىعىنا بەرىلگەنى جانە وقۋ ورنىنىڭ جالپى جەر كولەمى 1,8 گەكتارعا ازايعانىن ايتا كەلىپ، تەكسەرۋگە باستاماشىلىق ەتۋ تۋرالى ماسەلەلەر پروكۋراتۋرا ورگاندارىنا ناقتى وقۋ ورىندارى تاراپىنان زاڭدىلىقتى بۇزۋشىلىقتىڭ ناقتى فاكتىلەرى تۋرالى مالىمەتتەر تۇسكەن كەزدە قارالاتىنىن بايانداعان ەدى. سوندا بۇگىنگە دەيىن ۋنيۆەرسيتەتكە تيەسىلى جەر نەگە ازايعانى، وعان كىم جاۋاپتى دەگەن سۇراققا وكىلەتتى ورگانداردان ماردىمدى جاۋاپ بولماي، جۇمباق كۇيىندە قالىپ وتىر. مۇنداي جاعدايلار تەك ۇلتتىق ۋنيۆەرسيتەتپەن عانا شەكتەلىپ جۇرگەن جوق. وكىنىشكە قاراي، جوعارعى وقۋ ورىندارىنىڭ جەر تەلىمدەرىنىڭ جەكە مەنشىككە ساتىلىپ جاتقانىن، ستۋدەنت جاستار تۇراتىن جاتاقحانالاردىڭ ازايىپ جاتقانى جاسىرىن ەمەس»، - دەدى دەپۋتات.

ب. دۇيسەنبينوۆ جوعارىداعىنى بايانداي كەلە، مىنا ۇسىنىستاردى جاسادى:

- بىرىنشىدەن، قازاق ۇلتتىق ۋنيۆەرسيتەتىنە تيەسىلى جەر اۋماعىنان جەر ۋچاسكەلەرىنىڭ ءبولىنىپ شىعارىلعانى قانشالىقتى زاڭدى ەكەنىن تەكسەرۋ؛

- ەكىنشىدەن، ەلىمىزدىڭ بارلىق ايماقتارىنداعى مەملەكەتتىك جوعارعى وقۋ ورىندارىنا تيەسىلى جەر تەلىمدەرىنە ارنايى تەكسەرۋ جۇرگىزۋ.

«ۇشىنشىدەن، تەكسەرۋ بارىسىندا زاڭسىزدىق انىقتالعان جاعدايدا، الاياقتاردى، قالا نە ۋنيۆەرسيتەت باسشىسى بولسىن، جالپى كىنالىلەردى، ءبىلىم وشاقتارىن ءوز پايدا كوزىنە اينالدىرعان توعىشارلاردى ەش مانسابى مەن لاۋازىمىنا قاراماستان، قاتاڭ جاۋاپكەرشىلىككە تارتۋدى تالاپ ەتەمىز جانە ناتيجەسىن بىزگە حابارلاۋلارىڭىزدى سۇرايمىز»، - دەدى دەپۋتات.


سوڭعى جاڭالىقتار