قوي ءجۇنىن جينايتىن ۇيىمداردى مەملەكەت قارجىلاندىرماق
ق ر پرەمەر-ءمينيسترى ءاليحان سمايىلوۆ سەنات دەپۋتاتتارىنىڭ ساۋالىنا جولداعان جاۋابىندا وسىنداي مالىمەت ايتتى، دەپ حابارلايدى قازاقپارات ءتىلشىسى.
«يندۋستريا جانە ينفراقۇرىلىمدىق دامۋ مينيسترلىگى مۇددەلى مەملەكەتتىك ورگاندارمەن، اكىمدىكتەرمەن، «اتامەكەن» ۇلتتىق كاسىپكەرلەر پالاتاسىمەن بىرلەسىپ، جەڭىل ونەركاسىپتى دامىتۋدىڭ جۇيەلى شارالارىن پىسىقتادى. ولار قازاقستان رەسپۋبليكاسىنىڭ جەڭىل ونەركاسىبىن دامىتۋدىڭ 2022-2025-جىلدارعا ارنالعان جول كارتاسىنا ەنگىزىلگەن. وسى جول كارتاسى اتالعان حولدينگ ارقىلى اۋىل شارۋاشىلىعى جانۋارلارىنىڭ ءجۇنى مەن تەرىسىن جيناۋ جونىندەگى دايىنداۋشى ۇيىمداردى قارجىلاندىرۋدى كوزدەيدى. بۇل شارالار قوي شارۋاشىلىقتارىنان جانە تۇرعىنداردان ءجۇن ساتىپ الۋدىڭ ورتالىقتاندىرىلعان جۇيەسىن ۇيىمداستىرۋعا باعىتتالعان»، - دەپ جازىلعان ۇكىمەت باسشىسىنىڭ جاۋابىندا.
ال ءجۇن مەن تەرى دايىنداۋمەن اينالىساتىن كاسىپورىندارعا قوي قىرقۋعا ارنالعان ەلەكتر قۇرالداردى ساتىپ العانى ءۇشىن سۋبسيديا تولەنبەك.
«بۇل رەتتە، ينۆەستيتسيالىق سۋبسيديالاۋ شەڭبەرىندە ءجۇن مەن تەرى دايىنداۋ جونىندەگى ۇيىمدارعا مەملەكەتتىك قولداۋ رەتىندە ءجۇن قىرقۋ پۋنكتەرىن، جىلجىمالى قىرقۋ پۋنكتەرىن، قوي قىرقۋعا ارنالعان ەلەكترومەحانيكالىق قۇرالداردى سۋبسيديالاۋ كوزدەلگەنىن اتاپ وتكەن ءجون»، - دەدى ءاليحان سمايىلوۆ.
بۇعان دەيىن ءاليحان سمايىلوۆ سەنات دەپۋتاتتارىنىڭ ساۋالىنا جولداعان جاۋابىندا تەرى مەن ءجۇندى تەرەڭدەتىپ وڭدەۋ ماسەلەسىن اۋىل شارۋاشىلىعى مينيسترلىگىنىڭ قاراماعىنا بەرۋ نەگە مۇمكىن ەمەس ەكەنىن ءتۇسىندىردى.
