ديپلوممەن اۋىلعا باعدارلاماسىنا شاعىن قالالاردى دا قوسۋ كەرەك – دەپۋتات

نۇر- سۇلتان. قازاقپارات - ءماجىلىس دەپۋتاتى مەيرامبەك تولەپبەرگەن «ديپلوممەن اۋىلعا» باعدارلاماسىنا مونو جانە شاعىن قالالاردى دا ەنگىزۋدى ۇسىندى، دەپ حابارلايدى قازاقپارات.

«جاقىندا وڭىرلەردە سايلاۋشىلار مەن ءتۇرلى ساناتتاعى الەۋمەتتىك توپتارمەن، جاس ماماندارمەن بولعان كەزدەسۋلەردە ۇكىمەتكە ايتىلعان ۇسىنىستار از بولعان جوق. اسىرەسە، «ديپلوممەن اۋىلعا» باعدارلاماسىنىڭ تيىمدىلىگىن ارتتىرۋ جايىندا وزەكتى ماسەلە قوزعالدى. ەلىمىزدە 2009 -جىلدان بەرى جۇرگىزىلىپ كەلە جاتقان «ديپلوممەن اۋىلعا» باعدارلاماسىنىڭ ماقساتى - ديپلومدى مامانداردى اۋىلدىق جەردە تۇراقتاندىرۋ»، - دەدى دەپۋتات ءماجىلىستىڭ جالپى وتىرىسىندا.

2009-2020 -جىلدارى وسى جوبانى جۇزەگە اسىرۋعا 77 مىڭنان استام مامان 11,5 ميلليارد تەڭگە سوماسىندا كوتەرمە جاردەماقى السا، 36 مىڭنان استام مامان تۇرعىن ءۇي ساتىپ الۋ ءۇشىن 105,3 ميلليارد تەڭگە بيۋدجەتتىك كرەديت العان. وتكەن 2021 -جىلى 18,2 ميلليارد تەڭگە يگەرىلگەن. ال بيىل تاعى دا 4,3 مىڭ مامان تۇرعىن ءۇي الۋى ءۇشىن بيۋدجەتتىك كرەديت بەرۋگە 20 ميلليارد تەڭگە جوسپارلانعان.

«دەي تۇرعانىمەن، باعدارلامانىڭ قابىلدانعانىنا 13 جىل وتسە دە اۋىلدىق جەرلەردە كادر تاپشىلىعى ءالى دە وزەكتىلىگىن جويعان جوق. ەڭ وزەكتى ماسەلە، اۋدان ورتالىعى بولىپ وتىرعان مونو جانە شاعىن قالالار دا بۇل جوبانىڭ يگىلىگىن كورە الماي وتىر. اۋىلعا مامان تارتۋ ماسەلەسىن شەشەمىز دەپ، اۋدانداعى قالالار شەتتە قالۋدا. ايتالىق، جامبىل وبلىسىنداعى تالاس اۋدانىنىڭ ورتالىعى قاراتاۋ قالاسىنداعى ورتالىق اۋرۋحاناسىندا 10 نان استام مامان- دارىگەر جەتىسپەيدى. سونداي- اق مەكتەپتەر مەن بالاباقشالارعا 20 ءمۇعالىم مەن تاربيەشىگە سۇرانىس بار. جاڭاتاس پەن شۋ قالالارىندا دا ءدال وسىنداي جاعداي ورناعان. بۇل پروبلەما جىلدان- جىلعا شەشىلمەي كەلە جاتىر»، - دەدى م. تولەپبەرگەن.

ونىڭ ايتۋىنشا، ەلىمىزدەگى 42 شاعىن قالانىڭ 32 ءسى اۋىلدىق اۋدانداردىڭ اكىمشىلىك ورتالىعى بولىپ بەلگىلەنگەن.

«سوندىقتان مەملەكەتتىك قامقورلىق تۇرعىسىنداعى قىرۋار قارجىنىڭ تيىمدىلىگىن ارتتىرۋ ءۇشىن اۋداندارداعى مونو جانە شاعىن قالالاردى دا جوباعا ەنگىزۋ قاجەت. ەكىنشىدەن، بۇل جوبانىڭ تيىمدىلىگى بويىنشا ۆەدومستۆوارالىق جۇمىستىڭ جۇيەسىن قايتا قاراپ، جەتىلدىرۋ قاجەت. كوتەرىلگەن ماسەلەلەردىڭ قاراۋ ناتيجەلەرى تۋرالى جاۋاپتى ءتيىستى زاڭ تالابىنا سايكەس بەلگىلەنگەن مەرزىمدە بەرۋىڭىزدى سۇرايمىز»، - دەدى ءماجىلىس دەپۋتاتى.