قازاقستان ءجۇن وڭدەيتىن كاسىپورىن سالاتىندارعا سۋبسيديا بەرىلمەك
بۇل تۋرالى ق ر پرەمەر- ءمينيسترى ءاليحان سمايىلوۆتىڭ سەنات دەپۋتاتتارى ساۋالىنا جولداعان جاۋابىندا ايتىلعان، دەپ حابارلايدى قازاقپارات ءتىلشىسى.
«قازىرگى ۋاقىتتا ينۆەستيتسيالىق سالىمدار كەزىندە اگروونەركاسىپتىك كەشەن سۋبەكتىسى شەككەن شىعىستاردىڭ ءبىر بولىگىن وتەۋ بويىنشا سۋبسيديالاۋ قاعيدالارى شەڭبەرىندە جاڭا كاسىپورىنداردى سالۋ جانە جۇمىس ىستەپ تۇرعاندارىن جاڭعىرتۋ كەزىندە بىلعارى جانە ءجۇن جۋۋ كاسىپورىندارىنىڭ شىعىندارىن وتەۋ كوزدەلگەن. ءجۇن وڭدەيتىن كاسىپورىندار ءۇشىن قۇرىلىس كەزىندە شىعىنداردى وتەۋدىڭ ەڭ جوعارى سوماسى 868 ميلليون تەڭگەنى، كەڭەيتۋ كەزىندە - 430 ميلليون تەڭگەنى قۇرايدى. بىلعارى كاسىپورىندارى ءۇشىن بۇل سوما 661 ميلليون تەڭگەنى، كەڭەيتۋ كەزىندە - 300 ميلليون تەڭگەنى قۇرايدى»، - دەپ جازادى ۇكىمەت باسشىسى.
دەپۋتاتتىق ساۋالدا شاعىن جانە ورتاشا قۋاتتى جاڭا وندىرىستەردى اشۋ جانە قولدانىستاعىلارىن كەڭەيتۋ جانە جاڭعىرتۋ جوبالارىنا سالىنعان ينۆەستيتسيانى وتەۋ ۇلەسىن ۇلعايتىپ، وندىرىستىك قۋاتتاردىڭ ەڭ تومەنگى دەڭگەيىنە قويىلاتىن تالاپتاردى ءالى دە تومەندەتۋدى ۇسىنعان بولاتىن.
«ءوز كەزەگىندە ءجۇن مەن تەرىنى تەرەڭ وڭدەۋ كاسىپورىندارىنا ينۆەستيتسيالىق سالىمدار كەزىندە شىعىستاردى وتەۋ بولىگىندە كورسەتىلگەن سۋبسيديالاۋ قاعيدالارىنا وزگەرىستەر ەنگىزۋ بويىنشا ۇسىنىستار جالپى قولداۋ تابادى. تەرى مەن ءجۇندى تەرەڭ وڭدەۋ ءوندىرىسىن سۋبسيديالاۋ، سونداي- اق ينۆەستيتسيالىق سالىمداردى وتەۋ ۇلەسىن ۇلعايتۋ جانە وندىرىستىك قۋاتتاردىڭ ەڭ تومەنگى دەڭگەيى بويىنشا تالاپتاردى تومەندەتۋ ماسەلەلەرى اگروونەركاسىپتىك كەشەندى مەملەكەتتىك قولداۋدىڭ تيىمدىلىگىن ارتتىرۋ جونىندەگى جۇمىس توبىنىڭ وتىرىستارى شەڭبەرىندە قارالادى»، - دەپ جازىلعان جاۋاپتا.
بۇعان دەيىن ءاليحان سمايىلوۆتىڭ ءماجىلىس وكىلدەرىنىڭ دەپۋتاتتىق ساۋالىنا جولداعان جاۋابىندا ديقاندار ءۇشىن تىڭايتقىش باعاسىن ارزانداتۋعا رەسپۋبليكالىق بيۋجەتتەن قوسىمشا قارجى ءبولۋ ماسەلەسى قاراستىرىلىپ جاتقانىن ايتتى.
