قىسقى كيىمدەردى قالاي دۇرىس ساقتايمىز؟

كەلەسى قىسقا دەيىن كيىمدەر جاقسى كۇيدە بولۋى ءۇشىن ولاردى دۇرىس تازارتۋ جانە ساقتاۋ ماڭىزدى. جاڭا ماۋسىم الدىندا قىسقى گاردەروبتى رەتتەۋگە كىرىسكەن بولساڭىز، سىزگە قاجەت بولاتىن بىرنەشە بازالىق ەرەجە ۇسىنامىز.
1. ماۋسىم سوڭىندا سۇيىكتى پالتوڭىزدا ۇساق اقاۋلار بار-جوعىن تەكسەرىڭىز. مىسالى، ىلگەكتەرى بوساپ قالعان نەمەسە قالتانىڭ ءىشى جىرتىلعان بولۋى مۇمكىن. ولاردى كيىمدى سالىپ تاستار الدىندا جوندەپ نەمەسە تىگىپ قويعان ءجون. ەگەر ماۋسىم بويى پالتونى ءجيى كيگەن بولساڭىز، ونى حيميالىق تازالاۋعا تاپسىرۋعا بولادى. ال ەگەر كيىمىڭىز جاقسى كۇيدە بولسا، ونى شامالى سۋلاپ ۇتىكتەپ، كەپتىرۋ جەتكىلىكتى.
2. پالتونى بۇكتەپ جيناماي، كيىم ىلگىشكە ءىلىپ ساقتاعان دۇرىس. پالتو ءپىشىنىن جوعالتپاس ءۇشىن وعان اۋا وتەتىن ماتا قاپ پەن ۇشتارى دوڭگەلەكتەلگەن جالپاق كيىم ىلگىش العان جاقسى.
3. كەدىر - كۇيە كوبەلەكتەن قۇتقاراتىن ەڭ جاقسى زات. سىرتقى كيىم سالىنعان قاپتارعا جانە تريكوتاج كيىمدەر سالىنعان جاشىكتەرگە ارنايى كەدىر شارلارىن، كەدىر جوڭقاسى بار قاپشانى نەمەسە كەدىر ەفير مايىنا مالىنعان ماقتا ديسكىسىن سالىپ قويىڭىز.
4. قىسقى كۇرتكەنى سالىپ تاستار الدىندا مىندەتتى تۇردە ونى جۋىپ الۋ كەرەك. كۇرتكە زات تاڭباسىنداعى كۇتىمگە قاتىستى اقپاراتتى زەرتتەڭىز. سەبەبى كەي كۇرتكەلەردى كىر جۋعىش ماشيناعا جۋۋ ۇسىنىلمايدى. كۇرتكەنى كىر جۋعىش ماشيناعا سالعاندا سىقپايتىن رەجيمدى تاڭداڭىز جانە جۋاتىن سۇيىق قۇرال پايدالانىڭىز. سودان سوڭ كۇرتكەنى تولىقتاي كەپتىرۋ ماڭىزدى: وعان 48 ساعاتتاي كەتۋى مۇمكىن.
كيىم كەپكەنشە ونى اراسىندا سىلكىپ الىپ تۇرىڭىز، ايتپەسە، مامىق ءبىر جەرگە جينالىپ قالۋى مۇمكىن. كۇرتكەلەردى بۇكتەپ جيناپ ساقتاۋعا بولادى، ءبىراق قاتتى تىعىزداپ تاستاۋ ۇسىنىلمايدى. كۇرتكەلەردى دە اۋا كىرەتىن ماتا قاپتا ساقتاعان ءجون.
5. جۇننەن توقىلعان جەمپىرلەردى ءار كيگەننەن كەيىن جۋۋدىڭ قاجەتى جوق. ونى كيىمگە ارنالعان شەتكامەن تازارتىپ، بالكونعا جەلدەتىپ الۋ جەتكىلىكتى. توقىلعان كيىمدەردى ءجيى جۋساڭىز، ولار جىلدام توزىپ، تۇكتەنىپ، ءپىشىنىن جوعالتىپ الادى.
6. كۇيە كوبەلەك كيىمدەرىڭىزدى بۇلدىرمەس ءۇشىن 2-3 ايدا ءبىر شكافتىڭ ءىشىن شاڭ سورعىشپەن سورىپ، ىلعال شۇبەرەكپەن ءسۇرتىڭىز. سودان سوڭ شكافتىڭ ەسىكتەرىن اشىپ قويىڭىز: جاندىكتەر كۇننىڭ كوزىنەن قورقادى.
7. اياق كيىمدى سالىپ تاستاماس بۇرىن ونى جاقسىلاپ تازارتۋ كەرەك: تابانىن سۋدىڭ استىندا جۋىڭىز، ۇلتاراقتى ىلعال شۇبەرەكپەن ءسۇرتىڭىز جانە اياق كيىمنىڭ ۇستىنە ارنايى تازارتاتىن كوبىك جاعىڭىز. اياق كيىمدى تازارتىپ بولعان سوڭ، ونى جاقسىلاپ كەپتىرىپ، كرەم نەمەسە ماي جاعىڭىز.
8. بىلعارى ەتىكتە قىرتىس نەمەسە تىلىكتەر پايدا بولماۋعا قالىپ ۇستاعىش كومەكتەسەدى. ارينە، بۇل ماقساتتا ونىڭ ىشىنە بۇكتەلگەن قاعاز سالۋعا بولادى. ءبىراق سۇيىكتى اياق كيىمىڭىزگە كەدىردەن جاسالعان ەتىك قالىپ ساتىپ العان ارتىق ەتپەيدى: اعاش ىلعالدى جاقسى سورادى جانە اياق كيىمدى ىشتەي يىسسىزدەندىرەدى.
massaget.kz