شەكاراشىلاردىڭ تۇرمىستىق-الەۋمەتتىك جاعدايى سىن كوتەرمەيدى – دەپۋتات

نۇر-سۇلتان. قازاقپارات - پارلامەنت ءماجىلىسىنىڭ دەپۋتاتى جاناربەك ءاشىمجان شەكاراشىلاردىڭ اۋىر تۇرمىسىن سىنعا الىپ، قورعانىس ءمينيسترى رۋسلان جاقسىلىكوۆقا ساۋال جولدادى، دەپ حابارلايدى قازاقپارات ءتىلشىسى.

«شەكارا - تاۋەلسىزدىكتىڭ باستى سيمۆولى. قازاقستان بارلىق تاراپپەن قۇرلىقتاعى جانە تەڭىزدەگى شەكارا سىزىعىن حالىقارالىق شارتپەن بەكىتىپ الدى. دەليميتاتسيا، دەماركاتسيا پروتسەسى ءساتتى جۇزەگە استى. الايدا سوڭعى ۋاقىتتاعى الەمدىك گەوساياسي كەڭىستىكتەگى ءتۇرلى قۇبىلىستار كىم-كىمدى دە ويلاندىرماي قويمايدى. وسى ورايدا، مەن ۇكىمەت نازارىن ەلىمىزدەگى شەكارا بولىمشەلەرىنە اۋدارعىم كەلەدى»، - دەدى ج. ءاشىمجان ءماجىلىستىڭ جالپى وتىرىسىندا.

تاياۋدا دەپۋتات الماتى وبلىسى پانفيلوۆ اۋدانىنداعى شەكارا باسقارماسى، نارىنقول-ۇيعىر اۋدانىنداعى «رايىمبەك» شەكارا زاستاۆاسى، كەگەن اۋدانىنداعى «ساتى»، «رابات» شەكارا بولىمشەلەرىن باستان اياق ارالاپ، ساربازداردىڭ الەۋمەتتىك جاعدايلارىمەن تانىسقان. وعان قوسا، «قاستەك»، «جامبىل»، «قارعالى»، «قاسكەلەڭ»، «الما اراسان» شەكارا بولىمشەلەرى بار.

ونىڭ ايتۋىنشا، شەكاراشىلاردىڭ تۇرمىستىق-الەۋمەتتىك جاعدايى سىن كوتەرمەيدى. ارنايى ماقساتتاعى نىسانداردىڭ دەنى كۇيرەپ تۇر.

شەكاراشىلار تۇراتىن عيماراتتار كۇردەلى جوندەۋدى، كوگىلدىر وتىنمەن قامتۋدى، جارىقتاندىرۋدى، بەينەباقىلاۋ مەن ەلەكتر جۇيەسىن جابدىقتاۋدى تالاپ ەتەدى.

«ماڭىزدى نىسانداردى سالۋ مەن كۇردەلى جوندەۋ بويىنشا الماتى وبلىسى اكىمدىگىمەن ورتاق كەلىسىم بار. شەكارا بولىمشەلەرىنىڭ ينفراقۇرىلىمىن رەتتەۋ جونىندەگى جول كارتاسىنا دا ەنگەن، ءبىراق ماسەلە ءالى شەشىمىن تاپپاي وتىر. ال سوڭعى 5 جىلدا قاۋىپسىزدىك سالاسىنا بولىنگەن قارجىدا ەسەپ جوق. اششى دا بولسا ايتايىن، «ساتى»، «رابات» زاستاۆاسىنىڭ شەكاراشىلارى 90-جىلدارداعى ەسكى مونشا مەن ەسىك-تەرەزەسى اڭعال-ساڭعال بالاباقشادا تۇرىپ جاتىر. پانفيلوۆ اۋدانىنداعى شەكارا باسقارماسى 1892-جىلى سالىنعان عيماراتقا ورنالاسقان. شونجىداعى «رايىمبەك» زاستاۆاسىنىڭ اسكەريلەرى تۇراتىن تۇرعىن-ۇيلەر مەن سپورتزال، كىتاپحانا، ءماجىلىس زالىنىڭ توبەسىنەن سۋ اعىپ، قابىرعالارى سەتىنەپ تۇر. ءتۇرلى قارۋ-جاراق ساقتالعان شەكارا زاستاۆالارىنىڭ قورشاۋلارىن جاياۋ ادام جاپىرىپ، اتتى ادام وپىرىپ وتەدى. وسىدان كەيىن شەكارالىق وڭىرلەرگە وتباسىمەن بارىپ قىزمەت ەتىپ جۇرگەن وفيتسەرلىك قۇرام مەن اسكەري بورىشىن وتەيتىندەرگە «شەكارامىزدى قاس قاقپاي كۇزەتىڭدەر» دەپ قالاي تالاپ ەتەمىز؟ بولاشاق شەكاراشىلاردى قالاي ىنتالاندىرامىز؟»، - دەدى ج. ءاشىمجان.

وسى ورايدا، دەپۋتات جەدەلدەتىپ مىنا شارالاردى قولعا الۋدى ۇسىندى.

«ءبىرىنشى، مەملەكەتىمىزدىڭ قۇرلىقتاعى جانە تەڭىزدەگى بارلىق شەكارا قىزمەتتەرىنىڭ ماتەريالدىق-تەحنيكالىق بازاسى مەن الەۋمەتتىك نىساندارىن ارنايى ۇكىمەتتىك كوميسسيا شىعارىپ تەكسەرۋدى؛

ەكىنشى، مەكتەپتەردە وتان سۇيگىشتىكتى ناسيحاتتايتىن باعدارلامالاردى كۇشەيتۋدى؛

ءۇشىنشى، تاۋ اسىپ، تاس باسىپ جۇرگەن الماتى وبلىسىنداعى شەكاراشىلاردىڭ الەۋمەتتىك-تۇرمىستىق جاعدايىن جەدەلدەتىپ شەشۋدى ۇسىنامىن»، - دەدى ءماجىلىس دەپۋتاتى.