بازار يەلەرىنە جەكە جاۋاپكەرشىلىك جۇكتەلمەك

نۇر-سۇلتان. قازاقپارات - ەلىمىزدەگى كەيبىر بازار باسشىلارى ساۋداگەرلەرگە ءوز تالاپتارىن قويىپ، باعانى دا وزدەرى بەلگىلەيتىنى انىقتالدى.

بۇل تۋرالى ق ر ساۋدا جانە ينتەگراتسيا مينيسترلىگى ساۋدا كوميتەتى ءتوراعاسىنىڭ ورىنباسارى ايدار ابىلدابەكوۆ ءمالىم ەتتى، دەپ حابارلايدى قازاقپارات ءتىلشىسى.

«ەل اۋماعىنداعى 114 ساۋدا بازارىنىڭ قىزمەتىنە تەكسەرۋ ءجۇردى. ناتيجەسىندە ءبىرقاتار زاڭبۇزۋشىلىق انىقتالدى، ونىڭ ىشىندە سالىق زاڭناماسىنىڭ بۇزىلۋى دا بار. ساۋدا سالاسىنداعى تاعى ءبىر پروبلەما - كاسسا اپپاراتىنىڭ بولماۋى جانە سانيتارلىق تالاپتاردىڭ ءتيىستى دەڭگەيدە ساقتالماۋى. بازارلار قىزمەتىن تەكسەرۋدىڭ ناتيجەسى ساۋدا سالاسىنا قاتىستى زاڭناماعا وزگەرىس ەنگىزۋ تالاپ ەتىلەتىنىن كورسەتتى. بۇل شارا ەلىمىز بويىنشا ساۋدا سالاسىن ءبىر تارتىپكە كەلتىرۋ ماقساتىندا جۇرگىزىلمەك. سونىمەن قاتار، بازار يەلەرىنە جەكە جاۋاپكەرشىلىك جۇكتەمەكپىز. سەبەبى، كوپ جاعدايدا بازار يەلەرى: «مەن ساۋدا ورنىن جالعا بەرۋشىمىن، باعاعا قاتىسىم جوق»، - دەيدى. مىنە، وسى ورايدا جاۋاپكەرشىلىك كەرەك»، - دەدى ايدار ابىلدابەكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، الەۋمەتتىك ماڭىزى بار تاۋارلاردىڭ باعا تۇراقتىلىعىن ساقتاۋ جولىندا 2022-2024-جىلدارعا 67 ءىس-شارا قاراستىرىلعان. سونىڭ ىشىندە ازىق-تۇلىك قاۋىپسىزدىگىن قامتاماسىز ەتۋگە ارنالعان 31 شارا بار.

«وتكەن اپتادا وڭىرلىك اكىمدىكتەر ازىق-تۇلىك باعاسىن قولدان وسىرگەن 231 فاكتىنى انىقتادى. كەيبىر ساۋدا ورىندارىندا الەۋمەتتىك ماڭىزى بار تاۋارلاردىڭ باعاسى 40 پايىزعا دەيىن قىمباتتاپ جاتادى. ءتۇسىندىرۋ جۇمىستارىنان سوڭ كەيبىر ساۋدا نۇكتەلەرى باعانى بىردەن تۇسىرەدى. جالپى، ازىق-تۇلىك باعاسىن وسىرمەي، تۇراقتىلىقتى ساقتاۋ ءۇشىن ۇكىمەت بەكىتكەن ءبىرقاتار شارا اتقارىلىپ جاتىر»، - دەيدى ايدار ابىلدابەكوۆ.

بۇعان دەيىن مينيسترلىك وكىلى كەيبىر ءىرى بولشەك ساۋدا بازارلارى نارىق باعاسىمەن ساناسپايتىنىن العا تارتقان ەدى. ودان بولەك، رەسەيگە سالىنعان سانكسيالار ازىق-تۇلىك داعدارىسىنا الىپ كەلگەنى ايتىلدى.