ىشكى ىستەر مينيسترلىگى ءوزىن-ءوزى ورتەگەن ايەل وقيعاسىنا قاتىستى پىكىر ءبىلدىردى

نۇر-سۇلتان. قازاقپارات – ق ر ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ قارجى پيراميداسى ءۇشىن ءوزىن-ءوزى ورتەپ جىبەرگەن ايەلدىڭ وقيعاسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

11- ساۋىردە ەلورداداعى ىشكى ىستەر مينيسترلىگى عيماراتىنىڭ الدىندا Mudabarah Capital قارجى پيراميداسىنان زارداپ شەككەن ايەل ءوز-ءوزىن ورتەپ جىبەردى.

وعان العاشقى مەديتسينالىق كومەك كورسەتىلدى جانە اۋرۋحاناعا جاتقىزىلدى.

«قۇقىقبۇزۋشىلاردىڭ ءىس-ارەكەتىنەن شىعىنعا ۇشىراعان ادامدار ءتۇرلى پسيحو-فيزيولوگيالىق قىسىمعا تۇسەدى. كەيبىرى بۇعان شىداي المايدى. وسىلايشا جابىرلەنۋشىلەردىڭ ءبىرى، مەنىڭ ويىمشا، تەرگەۋ ورگاندارىنا قىسىم كورسەتۋ ماقساتىندا وسى قادامعا باردى (ءوزىن-ءوزى ورتەدى - رەد.). وتتى ءسوندىرىپ ۇلگەردى، قازىر ول اۋرۋحانادا جاتىر جانە ومىرىنە ەش قاۋىپ جوق. مەندەگى بار اقپارات وسى»، - دەدى مارات قوجايەۆ ءماجىلىستىڭ جالپى وتىرىسىنان كەيىن تىلشىلەرگە بەرگەن سۇحباتىندا.

اتالعان قىلمىستىق ءىس بويىنشا، 14 ادام جاۋاپقا تارتىلعان، ولاردىڭ التاۋى قاماۋدا وتىر. تەرگەۋ جۇمىستارى اياقتالۋعا جاقىن.

«بىرنەشە ادام ءۇيقاماقتا وتىر. ەكى ادام كەپىلمەن جانە بىرنەشەۋى - ەشقايدا كەتپەۋ تۋرالى قولحاتپەن بوساتىلعان. مۇنداي بۇلتارتپاۋ شارالارىنىڭ جازالاۋ ەمەستىگىن ءتۇسىنۋ كەرەك. ول ءار ادامعا جەكە تاعايىندالادى، تەك ادام جاسىرىنىپ قالماۋى ءۇشىن، جاڭا قىلمىس جاساماۋى ءۇشىن جانە باسقا ادامداردى تەرگەۋگە كەدەرگى كەلتىرۋگە ۇگىتتەمەۋى ءۇشىن جاسالادى. بۇل ءالى جازا ەمەس. الايدا، وسى قىلمىستىق ءىس بويىنشا جابىرلەنۋشىلەر كىمنىڭ قاماۋدا، كىمگە بۇلتارتپاۋ شارالارى قولدانىلۋى كەرەكتىگىن شەشىپ قويعان. وكىنىشكە قاراي، وسىنداي ەموتسيالار بايقالادى، ءبىراق ءبىز بۇل شارالاردى زاڭناماعا سايكەس رەتتەۋىمىز كەرەك»، - دەدى م. قوجايەۆ.

بۇعان دەيىن اتالعان قارجى پيراميداسىنا قاتىستى ەكى ۆاينەر كەپىلمەن بوساعانى، ءۇشىنشىسى شەتەلدە قاشىپ جۇرگەنى تۋرالى حابارلاعان بولاتىنبىز.

ءماجىلىستىڭ جالپى وتىرىسىندا دەپۋتاتتار قارجى پيراميداسىن جارنامالاۋشىلاردى جاۋاپقا تارتۋدى ۇسىندى.