سەمەي يادرولىق قاۋىپسىزدىك ايماعى قۇرىلادى
- مينيستر «پروبلەمالاردى شەشۋ ماقساتىندا «سەمەي يادرولىق قاۋىپسىزدىك ايماعى تۋرالى» زاڭ جوباسى ازىرلەنىپ، ءتيىستى ۇسىنىستار جاسالىپ وتىر. وسى ورايدا بۇرىنعى سەمەي يادرولىق سىناق پوليگونىنداعى جۇمىستاردىڭ ورىندالۋىنا جاۋاپتى ۇيىمدى تاعايىنداۋ، كەشەندى ەكولوگيالىق تەكسەرۋ جانە مەملەكەتتىك ەكولوگيالىق ساراپتاما ناتيجەلەرى بويىنشا نورماتيۆتەن تىس رادياتسيالىق لاستانعان اۋماقتاردىڭ جانە شارتتى تازا جەرلەردىڭ شەكارالارى مەن اۋدانىن ايقىنداۋ ەسكەرىلگەن»، - دەدى ب. اقشولاقوۆ.
زاڭ جوباسىندا نورماتيۆتەن ارتىق راديواكتيۆتى لاستانۋعا ۇشىراعان اۋماقتاردا ارنايى قۇقىقتىق رەجيمى بار سەمەي يادرولىق قاۋىپسىزدىك ايماعىن (س يا ق ا) قۇرۋ جانە ولاردى ۋاكىلەتتى ۇيىمعا پايدالانۋعا بەرۋ كوزدەلەدى. مۇنىمەن قوسا، بۇرىنعى پوليگوننىڭ لاستانعان ۋچاسكەلەرىن وڭالتۋ، ايماق اۋماعىندا رادياتسيالىق جاعدايعا مونيتورينگ جۇرگىزۋ، بۇرىنعى پوليگوننىڭ شارتتى تازا جەرلەرىن شارۋاشىلىق اينالىمعا بەرۋدى قاراستىرعان.
«پوليگوننىڭ نورماتيۆتەن تىس لاستانعان جەرلەرىن باسقارۋ جونىندەگى ۋاكىلەتتى ۇيىم رەتىندە ەنەرگەتيكا مينيسترلىگىنىڭ ۆەدومستۆولىق باعىنىستى ۇيىمى - قازاقستان رەسپۋبليكاسىنىڭ ۇلتتىق يادرولىق ورتالىعىن تاعايىنداۋ بولجانىپ وتىر. بۇل ۇيىم 1992 -جىلى تۇڭعىش پرەزيدەنتتىڭ جارلىعىمەن بۇرىنعى سەمەي يادرولىق سىناق پوليگونى كەشەنى جانە ءتيىستى عىلىمي ۇيىمدار مەن وبەكتىلەر نەگىزىندە قۇرىلعان. كاسىپورىن 30 جىل بويى اتوم ەنەرگياسىن بەيبىت ماقساتتا پايدالانۋ، راديوەكولوگيا جانە يادرولىق ينفراقۇرىلىم وبەكتىلەرىن جويۋ سالاسىندا اعىمداعى قىزمەتىن جۇزەگە اسىرىپ كەلەدى جانە جوعارى بىلىكتى پەرسونالى، مامانداندىرىلعان جابدىقتارى، دامىعان ينجەنەرلىك- تەحنيكالىق ينفراقۇرىلىمى مەن قاجەتتى رۇقسات بەرۋ قۇجاتتارى بار»، - دەدى مينيستر.
بۇدان بۇرىن حابارلانعانداي، بۇرىنعى سەمەي پوليگونى ماڭىندا لاستانعان جانە تازا اۋماقتاردىڭ اراجىگى اجىراتىلماعاندىقتان، جارامدى جەرلەردىڭ ەداۋىر بولىگى پايدالانۋسىز قالىپ وتىر.
اۆتور: رۋسلان عابباسوۆ
