قىزداردىڭ كوكپار تارتقانى دۇرىس پا؟

نۇر- سۇلتان. قازاقپارات - قازاقتىڭ ۇلتتىق ويىنى كوكپارعا قىزداردىڭ ارالاسقانى دۇرىس پا، الدە بۇرىس پا؟ بۇل ساۋال توڭىرەگىندەگى پىكىرلەر ەكىگە جارىلدى. بەلگىلى كوكپارشىلار مەن جاتتىقتىرۋشىلاردىڭ ءبىرازى «قىز بالانىڭ كوكپار تارتقانى دۇرىس ەمەس» دەپ ەسەپتەيدى.

ەندى ءبىرى وندا تۇرعان ەش سوكەتتىك جوق دەگەن پىكىردە. داۋدىڭ باسى الماتى وبلىسىنىڭ تۋماسى ەۆا جيگالينا ەسىمدى شاباندوزدىڭ كوكپارعا ارالاسۋىنان باستالعانىن ايتا كەتەيىك.

قاسكەلەڭدىك ەۆا جيگالينا 6 جاسىنان اتقا ءمىنىپ وسكەن اككى شاباندوزدىڭ ءبىرى. ونى ورىس قىزى دەپ جۇرگەندەر قاتەلەسەدى. ەۆانىڭ ۇلتى كازاك. اتا- باباسى كادىمگى دون كازاكتارىنان تارايدى. جاستايىنان ات قۇلاعىندا ويناپ وسكەن قىز بۇگىندە قازاقتىڭ ۇلتتىق ويىنى بايگە مەن كوكپارعا ات دايىنداۋمەن اينالىسىپ ءجۇر.

ەۆا جيگالينا، كوكپارشى:

- مەن كوكپارعا اتتى جەر- جەردەن ىزدەپ ءجۇرىپ تاڭدايمىن. دونچاك پەن قوستاناي تۇقىمى كوكپار تارتقانعا وتە قولايلى. مىنا سامسون ەسىمدى اتىمدى 3 جاسىنان باپتادىم. قازىر ول توپقا بۇزىپ جارىپ كىرەتىن كاسىبي ويىنشىعا اينالدى. وزىمە كەلەر بولسام، مەن جىلقىعا بار عۇمىرىمدى ارناۋعا بەل بۋعان جانمىن. اتقا وتىرسام قاناتتانىپ شىعا كەلەمىن. ال كوكپاردا ءوزىمدى سۋدا جۇزگەن بالىقتاي سەزىنەمىن.

قاراساي اۋدانىنىڭ كوكپارشىلارى ەۆا جيگالينانى «امازونكا» لاقاپ اتىمەن جاقسى تانيدى. ونىڭ ونەرىنە ءتانتى بولعان اۋىل اقساقالدارىنىڭ ەۆا پالۋانعا اق باتاسىن بەرگەن كەزدەرى دە از ەمەس.

سامات جۇماعاليەۆ، اتبەگى:

- ءوزىمنىڭ انام دا قويشىنىڭ قىزى بولعان، وسى كوكپار تارتىپ وسكەن. ەندى بۇل قىزدىڭ دا تالابى بار، تارتا بەرگەنى دۇرىس. وعان ەشكىم شەكتەۋ قويا المايدى عوي «تارت- تارتپا» دەپ. تارتقانى دۇرىس. تالاي ەر ادامنان جاقسى تارتادى.

ەۆا جيگالينا مەن ونىڭ جۇبايى تەلمان مۋسايەۆ وسى اتبەگىلىك ونەردىڭ ارقاسىندا تانىسىپ، تابىسقان. ەكەۋى 2015 -جىلدان بەرى جامبىل اۋدانىنداعى «كوكباستاۋ» اتشابارىنىڭ ىرگەسىنەن جىلقى فەرماسىن اشىپ، كوكپار اتتارىن باپتاۋمەن اينالىسىپ كەلەدى.

جالپى ات باپتاۋ وڭاي ەمەس جانە ول ەكىنىڭ ءبىرىنىڭ قولىنان كەلە بەرمەيدى. قازىر كوكپارعا دايىندالعان اتتاردىڭ قۇنى نارىقتا 10 ميلليون تەڭگەگە دەيىن تۇرادى. ال ەۋروپا ەلدەرى مەن بىرىككەن اراب امىرلىكتەرىندەگى اسىل تۇقىمدى سايگۇلىكتەردىڭ باعاسى بۇدان بىرنەشە ەسە قىمبات. شىنىن ايتۋ كەرەك، ءبىزدىڭ بۇگىنگى جاپپاي كوكپار توڭىرەگىندەگى ويىمىزدىڭ ءوزى كوكپارعا تۇسكەن سەركەدەي بولدى. «ونى دامىتۋ ءۇشىن الدىمەن ەرەجەسىن جوندەسىن، سالىمعا كوڭىل ءبولسىن! قىز بالا كوكپار تارتسىن، تارتپاسىن!» دەپ ءالى داۋرىعىپ ءجۇرمىز. ءسوز سوڭىندا ەۋروپا ەلدەرىنىڭ قىزدار كومانداسىن جاساقتاپ، قازاقتىڭ ۇلتتىق سپورت ءتۇرى رەتىندە پاتەنتتەلگەن كوكپار ويىنىن جان- جاقتى دامىتۋعا كوشكەنىن دە ايتا كەتەيىك...

ارداق ايبار ۇلى، جەڭىس ابدىرەشيەۆ

www.24.kz