قاراعاندىدا جاياۋ ادامدى قاعىپ ءولتىرىپ، قاشىپ كەتكەن جۇرگىزۋشى ۇستالدى

قاراعاندى. قازاقپارات - قاراعاندىدا جاياۋ جۇرگىنشىنى قاعىپ، وقيعا ورنىنان قاشىپ كەتكەن كولىك جۇرگىزۋشىسى ۇستالدى، دەپ حابارلايدى قازاقپارات.

9- ءساۋىر كۇنى ساعات 22.00 شاماسىندا قاراعاندى قالالىق پوليتسيا باسقارماسىنا قاراستى تەمىرجول پوليتسيا بولىمىنە اۋماققا قاراستى ءدامحانا ماڭىندا جول- كولىك وقيعاسى بولعانى تۋرالى حابارلاما ءتۇستى. وقيعا ورنىنا جەدەل- تەرگەۋ توبى جىبەرىلدى.

بولجام بويىنشا، بەلگىسىز جۇرگىزۋشى كولىك رۋلىنە يە بولا الماي قالىپ، 44 جاستاعى جاياۋ جۇرگىنشىنى قاعىپ كەتكەن. جابىرلەنۋشى وقيعا ورنىندا كوز جۇمسا، كولىك جۇرگىزۋشى ول جەردەن ءىزىن سۋىتقان.

جەدەل ىزدەستىرۋ شارالارى بارىسىندا «ءىزىن سۋىتپاي» جول- كولىك وقيعاسىن جاساعان 20 جاستاعى ازامات ۇستالدى. ول ىستەگەن ءىسىن مويىندادى. كۇدىكتىنىڭ كولىك جۇرگىزۋ كۋالىگىنىڭ جوق ەكەنى انىقتالدى. اتالعان فاكتى بويىنشا قىلمىستىق كودەكستىڭ 345-بابىنىڭ 3-تارماعى جانە 347-بابى بويىنشا قىلمىستىق ءىس قوزعالدى. تەرگەۋ امالدارى جۇرگىزىلىپ جاتىر.