لۋكاشەنكو بۋچاداعى قىرعىنعا كىم كىنالى ەكەنىن ايتتى

نۇر-سۇلتان. قازاقپارات - بەلارۋس پرەزيدەنتى الەكساندر لۋكاشەنكو ۋكراينانىڭ بۋچا قالاشىعىنداعى بەيبىت جۇرتتى ورىس اسكەرى ەمەس، اعىلشىنداردىڭ بارلاۋ قىزمەتى قىردى دەپ مالىمدەدى. ياعني، بەلارۋس پرەزيدەنتى بۇل تراگەدياعا ۇلى بريتانيا بيلىگىن كىنالاپ وتىر.

بۇگىن، 12- ءساۋىر كۇنى، رەسەيدىڭ «ۆوستوك» عارىش ايلاعىندا بريفينگ ءوتىپ، لۋكاشەنكو مەن پۋتين ءسوز سويلەدى. جوعارىداعى تسيتاتانى لۋكاشەنكو وسى بريفينگتە ايتقان ەكەن.

«سوعىستى رەسەي باستاماسا، ۋكراينا رەسەيگە باسىپ كىرەر ەدى. ءدال بۋچاداعىداي جاعداي رەسەيدە دە بولار ما ەدى، كىم بىلەدى؟! مۇنىڭ ارتىندا اعىلشىندار تۇر، ءبارىبىر. ولار بىزگە قارسى پسيحولوگيالىق «سپەتسوپەراتسيا» ۇيىمداستىرىپ جاتىر. رەسەي شامالى كەشىككەندە، مىنا تۇرعان كورشى وبلىستار (رەسەيدىڭ - رەد.) اعىلشىندار باستاعان اسكەري وپەراتسيانىڭ وتىندە قالار ەدى...»، - دەپ ءتۇسىندىردى ويىن لۋكاشەنكو.

ال پۋتين بولسا، ۋكرايناعا قارسى سوعىس اشۋدان باسقا امالدىڭ قالماعانىن تاعى ايتتى.

«ۋكراينادا كۇش العان انتيرەسەيلىك كوڭىل-كۇي بىزگە قاراي سوعىس بوپ باس سالار ەدى. بۇل سوعىستىڭ ايتەۋىر باستالارى انىق ەدى. ەرتە مە، كەش پە، ءبارىبىر تەكەتىرەس بولار ەدى. سوندىقتان دونباستى ازات ەتۋ ءۇشىن باستاعان «ارنايى وپەراتسيامىز» جەڭىسكە جەتەدى. رەسەي اسكەرى جانقيارلىقپەن ۇرىس جاساپ جاتىر»، - دەدى پۋتين بريفينگتە.

bugin.kz