قازاقستاندا دارىگەر ماماندارىنىڭ تاپشىلىعى بار

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى ەرالى توعجانوۆ ءماجىلىس وكىلدەرىنىڭ دەپۋتاتتىق ساۋالىنا جولداعان جاۋابىندا اۋرۋحانالارداعى كلينيكالىق دارىگەرلەردىڭ تاپشىلىعى قالاي شەشىلەتىنىن ءتۇسىندىردى، دەپ حابارلايدى قازاقپارات ءتىلشىسى.

«تالداۋلار اۋداندىق اۋرۋحانالاردا عانا ەمەس، قالالىق جانە وبلىستىق دەڭگەيلەردە دە كادر تاپشىلىعى بار ەكەنىن كورسەتتى. جىل سايىن رەزيدەنتۋرادا بىلىكتى ماماندارمەن قامتاماسىز ەتۋ ءۇشىن كلينيكالىق ماماندىقتار بويىنشا كادر دايارلاۋعا مەملەكەتتىك ءبىلىم بەرۋ تاپسىرىسى بولىنەدى. 2021-جىلى سونىڭ اياسىندا 1500 ورىن ءبولىندى. ونىڭ ىشىندە 26 نيەۆرولوگ، 200 انەستەزيولوگ- رەانيماتولوگ، 18 نەيروحيرۋرگ بار»، - دەلىنگەن جاۋاپتا.

ونىڭ ايتۋىنشا، جىل سايىن رەسپۋبليكالىق بيۋدجەتتەن مەديتسينا قىزمەتكەرلەرىنىڭ كاسىبي دەڭگەيىن ارتتىرۋعا قاراجات بولىنەدى.

اتاپ ايتقاندا، 2020-جىلى بىلىكتىلىكتى ارتتىرۋدان 10578 دارىگەر وتكەن. ونىڭ ىشىندە 743 انەستەزيولوگ-رەانيماتولوگ، 269 نيەۆرولوگ، 49 مەديتسينالىق رەابيليتولوگ، 34 نەيروحيرۋرگ بار.

«2021-جىلى جەرگىلىكتى بيۋجەتتەر ەسەبىنەن 161 مامان شەتەلدە وقۋدان ءوتتى. شەتەلدىڭ جەتەكشى ماماندارىنىڭ قاتىسقان ماستەر-كلاستاردا 734 ادام وقىتىلدى. ونىڭ ىشىندە 30 ادام «ينسۋلت العان ناۋقاستاردى وڭالتۋداعى مۋلتيديستسيپلينارلىق ءتاسىل» تاقىرىبىندا (رەسەي فەدەراتسياسى)، 11 ادام «جۇلىن نەيروحيرۋرگياسىنىڭ وزەكتى ماسەلەلەرى» تاقىرىبىندا» (گەرمانيا) ءبىلىمىن جەتىلدىردى. بيىل «ينسۋلت كەزىندە مەديتسينالىق كومەك كورسەتۋ» باعىتى بويىنشا 154 دارىگەر (نيەۆرولوگ، مەديتسينالىق رەابيليتولوگ، نەيروحيرۋرگ) جانە 220 ورتا مەديتسينالىق قىزمەتكەردى وقىتۋ كوزدەلگەن»، - دەپ دەپ جازادى پرەمەر-ءمينيستردىڭ ورىنباسارى.

ايتا كەتەيىك، ق ر دەنساۋلىق ساقتاۋ مينيسترلىگى جۇمىسقا تۇرۋ ءۇشىن مەديتسينالىق تەكسەرۋدەن ءوتۋ نەگە اقىلى ەكەنىن حابارلادى.