ورازا قازاسى نەمەسە قارىزى: ونى قالاي وتەيدى

نۇر-سۇلتان.قازاقپارات - ورازا قازاسىن ورازا ايتتىڭ ەكىنشى كۇنىنەن باستاپ وتەۋگە رۇقسات ەتىلەدى.

بەلگىلى سەبەپتەرمەن ورازاسىن بۇزعان مۇسىلماندارعا قازا بولعان ورازا كۇندەرىن وتەۋ مىندەتتەلگەن. ونىڭ شارتتارى قانداي؟ قازا ورازاسىن قاي كەستەگە قاراپ وتەۋگە بولادى؟

رامازان ايىنان كەيىن ورازانىڭ قازاسىن وتەيتىن كىسى كۇندەلىكتى ناماز كەستەسىن نەگىزگە الادى. دالىرەك ايتقاندا، تاڭ نامازى كىرگەن ۋاقىت اۋىز بەكىتۋ ۋاقىتى بولادى. سول ۋاقىتقا دەيىن سارەڭىزدى ءىشىپ- جەۋگە رۇقسات. ال كۇن تولىعىمەن باتىپ، اقشام نامازى ۋاقىتىنىڭ كىرۋى اۋىز اشار ۋاقىتىن بىلدىرەدى.

قازا ورازاعا نيەت قالاي جاسالادى؟

قازا ورازاسىنىڭ نيەتى الدىڭعى كۇننىڭ اقشام ۋاقىتىنان باستاپ، ەڭ كەش سارەسى ۋاقىتى بىتكەنگە دەيىنگى ارالىقتا جاسالۋى شارت. ارنايى نيەت- دۇعاسى جوق. ماسەلەن بىلاي نيەت ەتۋگە بولادى: «نيەت ەتتىم اللا ريزالىعى ءۇشىن وسى جىلعى رامازان ورازاسىنان قالعان پالەن كۇندىك (مىسالى، التى كۇندىك) قازا ورازامنىڭ ءبىرىنشى كۇنىن وتەمەككە (نەمەسە ەكىنشى، ءۇشىنشى…) ، ءحاليساليللاھي ءتاعالا». اۋىز اشاردا قازاقشالاپ تىلەك- دۇعاسىن جاساۋىنا بولادى.

قارىز ورازانى وتەۋ كەزىندە سارەسىگە تۇرا الماي قالسا، ەشتەڭە ىشپەستەن اۋىزىن بەكىتە بەرۋگە بولا ما؟

ەگەر تۇندە «ەرتەڭ قازا ورازا ۇستايمىن» دەپ نيەت ەتىپ جاتقان بولساڭىز، سارەسىگە تۇرا الماي قالعان جاعدايدا ەش ءنار تاتپاستان اۋىز بەكىتىپ قازانى ۇستاپ كەتە بەرەسىز. ال جاتاردا ونداي نيەت بولماعان بولسا، بۇل كۇن قازا ورازاعا سانالمايدا، ويتكەنى قازا ورازانىڭ نيەتى ەڭ كەش سارەسى ۋاقىتىندا جاسالۋى كەرەك.

جاتاردا ورازاعا نيەتى ەتپەسە، سارەسىگە ۇيىقتاپ قالعان جاعدايدا ەش ءنار تاتپاستان ءناپىل ورازاعا نيەت ەتسە رۇقسات پا؟

ءناپىل ورازاعا رۇقسات.

قارىز ورازانى قاي ۋاقىتقا دەيىن ۇستاپ ءبىتۋ قاجەت؟

حانافي ءمازھابىندا رامازان ورازاسىنىڭ قازاسىن وتەۋ ۋاقىتى شەكتەلمەگەن. ياعني كەلەسى رامازان ايىنا دەيىن نەمەسە ۇلگەرمەسەڭىز ودان كەيىنگى ۋاقىتتاردا وتەي الاسىز. دەگەنمەن، ۋاقىتتى سوزباي تەزىرەك وتەپ الۋعا تىرىسقان دۇرىس.

اقپارات كوزى: aqmeshit-zhastary.kz