د د س ۇ وميكرون شتامىنىڭ جاڭا تۇرىنە الاڭداپ وتىر
باسىلىمنىڭ مالىمەتىنشە، ۇيىم كوروناۆيرۋستىڭ وميكرون شتامىنىڭ ەكى جاڭا كىشى ءتۇرىن باقىلاپ جاتىر. دۇنيەجۇزىلىك دەنساۋلىق ساقتاۋ ۇيىمى BA.4 جانە BA.5 شتامدارىنىڭ جۇقپالى ەكەنىن انىقتاۋ ءۇشىن باعالاۋ تىزىمىنە قوسقانىن ايتتى.
«د د س ۇ قوسىمشا مۋتاتسيالارعا بايلانىستى جاڭا كىشى تۇرلەردى باقىلاۋدى باستادى، ولاردىڭ يممۋندىق قورعانىس الەۋەتىنە اسەرىن ءتۇسىنۋ ءۇشىن قوسىمشا زەرتتەۋ قاجەت»، - دەلىنگەن حابارلامادا.
سونىمەن قاتار، د د س ۇ باسشىسى تەدروس ادحانوم گەبرەيۋس الەمدە COVID-19 پاندەمياسىنىڭ ءالى اياقتالماعانىن ايتتى. ول سوڭعى اپتادا COVID-19-دان ءولىم سانى ازايىپ جاتقانىن، ءبىراق ۆيرۋس وتە جۇقپالى ەكەنىن، دامۋىن جالعاستىرىپ جاتقانىن ايتتى.
«COVID-19 پاندەمياسى ءالى اياقتالعان جوق. ول جۇعۋىن توقتاتپاعانشا پاندەميا ەش جەردە اياقتالمايدى»، - دەدى گەبرەيۋس.
سونىمەن قاتار، كوروناۆيرۋسقا قارسى شەكتەۋلەردىڭ جەڭىلدەتىلۋىنە بايلانىستى ينفەكسيا تەزىرەك تارالۋى مۇمكىن، بۇل ءوز كەزەگىندە جاڭا شتامداردىڭ پايدا بولۋىنا اكەلۋى مۇمكىن.
«ۆاكسينا ءومىردى ساقتاپ قالۋدىڭ ەڭ كۇشتى قۇرالى بولىپ قالا بەرەدى»، - دەدى ددۇ باسشىسى.
