نۇر-سۇلتاندا ءوزىن ورتەگەن ايەلدىڭ جاعدايى اۋىر

نۇر-سۇلتان. قازاقپارات - ەلوردادا ىشكى ىستەر مينيسترلىگى عيماراتىنىڭ الدىندا ءوزىن ورتەگەن ايەلدىڭ قازىرگى جاعدايى بەلگىلى بولدى، دەپ حابارلايدى قازاقپارات ءتىلشىسى.

نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتىنە سىلتەمە جاساپ.

«1990 -جىلى تۋعان ايەل دەنەسىنىڭ كەيبىر بولىكتەرىن كۇيىك شالعان. جەدەل جاردەم زارداپ شەگۋشىنى №1-كوپبەيىندى قالالىق اۋرۋحاناعا جەتكىزدى. پاتسيەنت شوكقا قارسى پالاتاعا جاتقىزىلىپ، ونى كومبۋستيولوگ، رەانيماتولوگ، توكسيكولوگ، تەراپيەۆت ماماندار قاراپ شىقتى. ناۋقاستىڭ جاعدايىنىڭ اۋىرلىعىن ەسكەرە وتىرىپ، ول كۇيىك شوگى، كۇيىكتىڭ اۋدانى مەن جاراقاتتىڭ تەرەڭدىگى ايتارلىقتاي بولعاندىقتان رەانيماتسيا بولىمىنە جاتقىزىلدى»، - دەلىنگەن حابارلامادا.

دەنساۋلىق ساقتاۋ باسقارماسىنىڭ مالىمەتىنشە، قازىر پاتسيەنتكە تولىققاندى مەديتسينالىق كومەك كورسەتىلىپ جاتىر.

«ناۋقاس و ا ر ي ت قىزمەتكەرلەرىنىڭ باقىلاۋىندا. ونىڭ دەنساۋلىق جاعدايى ءالى دە اۋىر دەپ باعالانىپ وتىر»، - دەيدى ۆەدومستۆودان.

بۇعان دەيىن نۇر-سۇلتان قالاسىندا ءوزىن ورتەگەن ايەلدىڭ اۋرۋحاناعا جاتقىزىلعانىن حابارلاعان ەدىك. كەيىن الماتى پوليتسياسى ءوزىن ورتەگەن ايەل ايىپتاعان قارجى پيراميداسىنا قاتىستى تۇسىنىك بەردى.