گۋاڭجوۋ تۇرعىندارى كارانتيننەن قاۋىپتەنىپ، ازىق- تۇلىكتى مولىنان ساتىپ الىپ جاتىر

بەيجىڭ. قازاقپارات - قىتايدىڭ وڭتۇستىگىندەگى گۋاندۋن پروۆينسياسىنداعى گۋاڭجوۋ قالاسىنىڭ تۇرعىندارى وسى ءىرى قالادا كوروناۆيرۋسقا شالدىعۋ وقيعالارىنىڭ كوبەيۋىنە بايلانىستى ازىق-تۇلىك قورىن جيناقتاۋعا تىرىسىپ جاتىر، دەپ حابارلايدى قازاقپارات.

قىتايلىق ب ا ق جازۋىنشا، جەرگىلىكتى شەنەۋنىكتەردىڭ مەگاپوليستە ازىق- تۇلىك قورى جەتكىلىكتى ەكەندىگى تۋرالى مالىمدەمەسىنە قاراماستان، گۋاڭجوۋداعى كەيبىر بازارلار مەن ءبىرقاتار كوتەرمە ساۋدا دۇكەندەرىندە حالىقتىڭ ازىق-تۇلىكتى كوپتەپ الىپ جۇرگەنى بايقالعان. گۋاڭجوۋدىڭ حالقى تىعىز ورنالاسقان بايۋن اۋدانىندا عانا جارىم- جارتىلاي كارانتين ەنگىزىلگەن. وندا كوۆيد شەكتەۋلەرى ايماقتاعى 3,7 ميلليون حالىقتىڭ 5 مىڭعا جۋىق تۇرعىنىنا قاتىستى بولدى.

وسى ارادا، قۇرلىقتىق قىتاي پروۆينتسيالارىنىڭ كوپشىلىگىن جايلاعان COVID-19 ۆيرۋسىنىڭ كەيدە ءورشىپ تۇرۋى شامامەن 18 ميلليون حالقى بار گۋاڭجوۋدى ازىق- تۇلىكپەن قامتاماسىز ەتۋگە كەرى اسەرىن تيگىزۋدە. دۇيسەنبى كۇنى وتكەن بريفينگتە بەيجىڭ بيلىگى جۇرتشىلىقتى قىتاي استاناسىن ازىق- تۇلىكپەن قامتاماسىز ەتۋ جاعىنان قازىرگى جاعدايدىڭ تۇراقتى جانە ولار جەتكىلىكتى مولشەردە ەكەنىنە سەندىردى.

وتكەن تاۋلىكتە بەيجىڭدە COVID-19 ينفەكسياسىن جۇقتىرۋدىڭ ءتورت وقيعاسى انىقتالدى. دۇيسەنبى كۇنى قىتاي ۇكىمەتى ايماق بيلىگىن جۇك تاسىمالىنىڭ كەدەرگىسىز قوزعالىسىن قامتاماسىز ەتۋگە جانە كولىك جولدارىن دالەلدى سەبەپسىز جاپپاۋعا ۇندەگەن حابارلاما تاراتقان. رەسمي ستاتيستيكا بويىنشا، 10-ساۋىردە گۋاڭجوۋدا كوروناۆيرۋس جۇقتىرۋدىڭ 27 جەرگىلىكتى وقيعاسى تىركەلدى. ءوز كەزەگىندە، قىتاي ماتەريگىندە توعىزىنشى كۇن قاتارىنان اۋرۋعا شالدىعۋدىڭ ەڭ جوعارى رەسمي كورسەتكىشى تىركەلگەن شانحاي قالاسىندا وتكەن تاۋلىكتە COVID-19 ينفەكتسياسىن جۇقتىرۋدىڭ 23 مىڭنان استام جەرگىلىكتى وقيعاسى تىركەلدى.