ينفلياتسيانى ۇستاپ تۇرۋعا قاجەتتى قۇرالدار بار - ۇكىمەت باسشىسى

نۇر-سۇلتان. قازاقپارات - ۇكىمەتتىڭ الدىنداعى كۇردەلى مىندەتتىڭ ءبىرى - ينفلياتسيانى ۇستاپ تۇرۋ.

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«جالپى العاندا، ەلىمىزدىڭ الەۋمەتتىك- ەكونوميكالىق دامۋىنا شەكتەۋ شارالارىنىڭ اسەرىن بارىنشا ازايتا الدىق. بۇل جۇمىستى جالعاستىرۋىمىز كەرەك. بىزبەن كورشىلەس ەلدەردىڭ ەكونوميكاسىنا سانكتسيالاردىڭ ىقپالى كۇشەيە ءتۇستى. سونىمەن قاتار، ۇكىمەتتىڭ الدىنداعى كۇردەلى مىندەتتىڭ ءبىرى - ينفلياتسيانى ۇستاپ تۇرۋ. ناۋرىز ايىنىڭ قورىتىندىسى بويىنشا ەلىمىزدەگى جىلدىق ينفلياتسيانىڭ دەڭگەيى 12 پايىزدى قۇرادى»، - دەدى ۇكىمەت باسشىسى.

ءاليحان سمايىلوۆتىڭ پايىمىنشا، وعان ءبىرىنشى كەزەكتە، ءبىزدىڭ ساۋدا جاساپ وتىرعان سەرىكتەس ەلدەردەگى ينفلياتسيانىڭ ءوسۋى مەن الەمدىك ازىق- تۇلىكتىڭ قىمباتتاۋى تىكەلەي اسەر ەتكەن.

«بىرىككەن ۇلتتار ۇيىمى ازىق- تۇلىك جانە اۋىل شارۋاشىلىعى ۇيىمىنىڭ مالىمەتى بويىنشا بيىلعى ناۋرىز ايىنداعى ازىق- تۇلىك باعاسىنىڭ الەمدىك يندەكسى 159 پايىزدىق تارماققا دەيىن ءوسىپ، سوڭعى 30 جىلدا بولماعان ەڭ جوعارى دەڭگەيگە جەتكەن. الەمدە نەگىزىنەن ءداندى داقىلدارعا، وسىمدىك مايىنا، قانتقا، ەت پەن ءسۇت ونىمدەرىنە باعا ءوسىپ كەتكەن. بۇل ءبىزدىڭ نارىققا دا تىكەلەي اسەر ەتىپ وتىر»، - دەدى ول.

وسى ورايدا ۇكىمەت باسشىسى ەل پرەزيدەنتىنىڭ تاپسىرماسى بويىنشا 2022-2024 -جىلدارعا ارنالعان ينفلياتسيا دەڭگەيىن باقىلاۋ جانە تومەندەتۋ بويىنشا كەشەندى شارالار ىسكە اسىرىلىپ جاتقانىن ايتتى.

«ينفلياتسيانى ۇستاپ تۇرۋ ءۇشىن قاجەتتى قۇرالدار بار. مەملەكەتتىك ورگاندار مەن اكىمدىكتەر ولاردى ءتيىمدى پايدالانىپ، بۇل ماسەلەنى ەرەكشە نازاردا ۇستاۋى ءتيىس»، - دەدى پرەمەر- مينيستر.