قازاقستاندا عىلىمدى قارجىلاندىرۋ ەكى ەسە ارتتى
ۇكىمەت وتىرىسىندا پرەمەر- مينيستر عىلىم سالاسىنداعى قىزمەتكەرلەردى كاسىبي مەرەكەسىمەن قۇتتىقتادى.
«بۇگىن ەلىمىز عىلىم كۇنىن اتاپ وتەدى. ەلىمىزدە وتاندىق عىلىمدى دامىتۋ جولىندا ەڭبەك ەتىپ جۇرگەن بارلىق قىزمەتكەرلەردى كاسىبي مەرەكەسىمەن قۇتتىقتايمىن! سىزدەرگە تىڭ عىلىمي جاڭالىقتار، جۇمىستارىڭىزعا زور تابىس جانە ساتتىلىك تىلەيمىن! بۇگىنگى ۇكىمەت وتىرىسىندا وتاندىق عىلىمدى دامىتۋ ماسەلەسىن قارايمىز»، - دەدى ءاليحان سمايىلوۆ ۇكىمەتتىڭ بۇگىنگى وتىرىسىندا.
ونىڭ ايتۋىنشا، ەلىمىزدە سوڭعى ەكى جىلدا رەسپۋبليكالىق بيۋدجەتتەن عىلىمدى قارجىلاندىرۋ شامامەن 2 ەسەگە ءوسىپ، 84 ملرد تەڭگەنى قۇرادى. ونىڭ ۇستىنە مەملەكەتتىك قارجىنى عىلىمي جوبالارعا ءبولۋ قۇزىرەتى عالىمداردىڭ وزدەرىنە بەرىلگەن.
«قازىر قازاقستاندىق عالىمداردىڭ عىلىمي جۇمىستارى كوبەيىپ كەلەدى. ولاردىڭ زەرتتەۋ ەڭبەكتەرى ەلىمىزبەن قاتار، شەت مەملەكەتتەردە دە لايىقتى باعالانىپ وتىر. مىسالى كوروناۆيرۋس ينفەكتسياسىنا قارسى ءوز ۆاكسيناسى بار 6 ەلدىڭ قاتارىندا قازاقستاننىڭ بولۋى وتاندىق عىلىمنىڭ الەۋەتى قانشالىقتى زور ەكەنىن كورسەتەدى. پاندەميا كەزىندە بۇل ۆاكسينانى كوپتەگەن ازاماتتارىمىز سالدىردى، ول باسقا ەلدەرگە دە جىبەرىلدى. QazVac-تىڭ باستى ارتىقشىلىعى - تيىمدىلىگى جوعارى، ءقاۋىپسىز ءارى جەڭىل وتەدى. ونىڭ ۇستىنە ۆاكتسينا ەرەكشە ساقتاۋ شارتتارىن قاجەت ەتپەيدى. ءبىز عىلىمعا جاڭا لەپ اكەلگەن ءوز ۆاكتسينامىزدى ماقتان تۇتامىز! بۇل - شىن مانىندە ءبىزدىڭ عالىمدارىمىزدىڭ ۇلكەن جەڭىسى!»، - دەدى ۇكىمەت باسشىسى.
ءوز سوزىندە ءا. سمايىلوۆ وتاندىق عىلىمنىڭ حالقىمىزدىڭ ءومىر ساپاسىن جاقسارتۋعا ەلەۋلى ۇلەس قوسۋى قاجەتتىگىن اتاپ ءوتتى.
«عىلىم سالاسىنداعى باعدارلامالىق قۇجاتتاردىڭ بارلىعى وسىعان باعىتتالعان. عالىمداردى قولداۋ، ينفراقۇرىلىمدى دامىتۋ، عىلىمدى ۆەدومستۆوارالىق ۇيلەستىرۋ جونىندەگى كەشەندى شارالار «سيفرلاندىرۋ، عىلىم مەن يننوۆاتسيالار ەسەبىنەن تەحنولوگيالىق سەرپىلىس» اتتى ۇلتتىق جوبادا كوزدەلگەن. ۇلتتىق جوبانى ىسكە اسىرۋ عالىمدار مەن ولاردىڭ عىلىمي جۇمىستارىنىڭ سانىن ارتتىرۋعا، زەرتتەۋ ينستيتۋتتارىنىڭ جابدىقتارىن جاڭارتۋعا مۇمكىندىك بەرەدى. وتكەن جىلدان بەرى جىل سايىن 500 عالىم الەمنىڭ جەتەكشى عىلىمي ورتالىقتارىنا بارىپ، تاعىلىمدامادان وتەدى»، - دەدى ول.
جىل سايىن «جاس عالىم» جوباسى اياسىندا 1000 گرانت بولىنەدى.
«ءبىز 2025 -جىلعا قاراي عىلىمدى قارجىلاندىرۋدا جەكەمەنشىك قارجىنىڭ ۇلەسىن %50 كە دەيىن ۇلعايتۋىمىز كەرەك. IT، مەديتسينالىق- بيولوگيالىق سالالاردا، اگروونەركاسىپتىك كەشەندە، «جاسىل» تەحنولوگيالاردا، تاۋ- كەن عىلىمى مەن مەتاللۋرگيادا 5 ءىرى عىلىمي- وندىرىستىك ورتالىق قۇرىلادى. بۇگىنگى تاڭدا وڭدەۋ ونەركاسىبىن دامىتۋ مەن جوعارى تەحنولوگيالىق وندىرىستەردى قۇرۋدا عىلىمنىڭ ءرولى ەرەكشە. بۇل ەڭبەك ونىمدىلىگى مەن حالىقتىڭ تابىسىن ارتتىرۋعا مۇمكىندىك بەرەدى»، - دەدى ءاليحان سمايىلوۆ.
