شىمكەنت تۇرعىنى ءوزى جۇمىس ىستەيتىن مەكەمەگە قاراقشىلىق شابۋىل ۇيىمداستىرعان

شىمكەنت. قازاقپارات - شىمكەنتتە شاعىن نەسيە ۇيىمىنىڭ قىزمەتكەرى ءوزى جۇمىس ىستەيتىن مەكەمەگە قاراقشىلىق شابۋىل ۇيىمداستىرعان.

بۇل قىلمىسقا ول ۇرلىعىن جاسىرۋ ءۇشىن بارعان، دەپ حابارلايدى قازاقپارات ءتىلشىسى.

ەڭبەكشى اۋدانى پوليتسيا باسقارماسىنىڭ كەزەكشى بولىمىنە شاعىن نەسيە بەرۋ ۇيىمىنا شابۋىل جاسالعانى تۋرالى حابارلاما كەلىپ تۇسكەن.

ونداعى كاسسيردىڭ سوزىنشە، ساعات 18.30 شاماسىندا مەكەمەگە كوزىلدىرىك جانە مەديتسينالىق بەتپەردە كيگەن 30-35 جاستاعى ورتا بويلى ەر ادام كىرىپ، پىشاقپەن قورقىتىپ، 1 ميلليون تەڭگەگە جۋىق اقشانى الىپ كەتكەن.

سول كۇنى تەرگەۋشىلەر ق ر ق ك- ءنىڭ 192-بابىمەن («قاراقشىلىق») سوتقا دەيىنگى تەرگەۋدى باستادى.

ال كريمينالدىق پوليتسيانىڭ جەدەل ۋاكىلدەرى كۇدىكتىنىڭ جەكە باسىن انىقتاۋ بويىنشا بارلىق قاجەتتى ءىس-شارانى جۇرگىزدى.

سىرتقى قىزمەتتەردىڭ جەكە قۇرامىن باعدارلاپ، جاقىن ماڭداعى دۇكەندەردىڭ ساتۋشىلارى مەن كوپقاباتتى ۇيلەردىڭ تۇرعىندارىنان سۇراستىرىپ، سيپاتتاماسى بويىنشا فوتوروبوتتى قۇراستىردى.

كۇدىكتىنىڭ بەلگىلەرى بار باعدارلار كورشى وڭىرلەرگە دە جىبەرىلدى. ناتيجەسىندە ءبىر تاۋلىك ىشىندە پوليتسەيلەر كۇدىكتىنى ۇيىنەن ۇستاپ، پوليتسيا باسقارماسىنا جەتكىزگەن.

«سوتقا دەيىنگى تەرگەۋ بارىسىندا تەرگەۋشىلەر ۇرلىقتى جاسىرۋ ماقساتىندا كاسسيردىڭ قاراقشىلىقتى ءوزى ۇيىمداستىرعانىن انىقتادى. كومەككە ول ءوز تانىسىن تارتقان. قازىرگى ۋاقىتتا اتالعان جايت بويىنشا ق ر ق ك- ءنىڭ 419-بابى «كورىنەۋ جالعان ءسوز جەتكىزۋ» بويىنشا تەرگەۋ جۇرگىزىلۋدە»- دەلىنگەن شىمكەنت قالالىق پوليتسيا دەپارتامەنتىنىڭ باسپا ءسوز قىزمەتى تاراتقان حابارالامادا.