پەتروپاۆلدىق زەينەتكەر قالا ورتاسىنان مينا تاۋىپ الدى

پەتروپاۆل. قازاقپارات - پەتروپاۆلدا ەر ادام گاراجدار ماڭىنان مينا تاۋىپ الدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆل تۇرعىنى ميناعا ۇقساس توت باسقان كۇماندى مەتالدى وتكەن سەنبى كۇنى كەشكە تامان جامبىل كوشەسىندەگى گاراجدار ماڭىنان تاۋىپ الدى. جارىلعىش زات سول جەردەگى اعاشتىڭ تۇبىندە جاتقان. زەينەتكەر بۇل تۋرالى بىردەن جاقىن ماڭداعى ۋچاسكەلىك پوليتسيا پۋنكتىنە بارىپ حابارلاعان. وقيعا ورنىنا تابىلعان زاتتى تەكسەرۋ ءۇشىن س ق و پوليتسيا دەپارتامەنتىنىڭ قىزمەتكەرلەرى مەن شۇعىل قىزمەتتەر جەتتى. ولار كەلگەنگە دەيىن توڭىرەك قورشاۋعا الىنىپ، قاۋىپسىزدىك شارالارى جاسالدى.

ماماندار سىرتىنا قاراپ، تابىلعان زاتتىڭ قاتتى كورروزياعا ۇشىراعان تانكىگە قارسى مينا بولۋى مۇمكىن ەكەنىن توپشىلاعان. تياناقتى تەكسەرۋ مەن زەرتتەۋدەن سوڭ بولجام راستالىپ، جارعىش تەحنيك- ماماندار ونى جويۋ ءۇشىن ارنايى كولىككە سالىپ الىپ كەتتى. كەيىن پوليسيا قىزمەتكەرلەرى 6637 اسكەري ءبولىمىنىڭ پوليگونىندا جارىلعىش زاتتى جويدى. جارعىش تەحنيك- مامانداردىڭ ايتۋىنشا، تابىلعان زات - وقىتۋعا ارنالعان مينا. قاتتى توت باسقاندىقتان جانە سىرتقى تاڭبالارى بولماعاندىقتان، مينانىڭ ناقتى قاي جىلى شىعارىلعانىن انىقتاۋ مۇمكىن ەمەس. پوليتسەيلەر بۇل زاتتاردىڭ سىرتىن توت باسىپ، شىرىسە دە قاۋپى جوعارى ەكەنىن ەسكەرتەدى. ىشىندە جارىلعىش زات بولۋى مۇمكىن. بۇنداي زاتتاردى تاۋىپ العان جاعدايدا بىردەن ىشكى ىستەر ورگاندارىنا حابارلاۋ قاجەت. پوليسيا قىزمەتكەرلەرى كەلگەنگە دەيىن ونى ورنىنان قوزعاپ، قولمەن ۇستاۋعا بولمايدى.