ا ق ش سانكتسيالاردىڭ قازاقستانعا اسەرىن بارىنشا جۇمسارتۋعا تىرىسادى – ق ر س ءى م
بۇل تۋرالى ا ق ش مەملەكەتتىك حاتشىسى ۋزرا زەيامەن كەزدەسۋدەن كەيىنگى بريفينگىدە ق ر سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين ايتتى، دەپ حابارلايدى قازاقپارات ءتىلشىسى.
«ماسەلە شىنىمەن دە وتە كۇردەلى، بايىپتى. قازىر عانا ا ق ش مەملەكەتتىك حاتشىسىنىڭ ورىنباسارى اتاپ وتكەندەي، ا ق ش رەسەيگە، ءبىرقاتار تۇلعاعا تەڭدەسسىز سانكتسيا سالىپ وتىر. ەلدەرىمىزدىڭ اراسىندا تەرەڭ ينتەگراتسيانىڭ، الەمدەگى ەڭ ۇزىن شەكارانىڭ بولۋىنا بايلانىستى بۇل سانكتسيالاردىڭ اسەرىنەن تىسقارى قالمايتىندىعىمىز ءسوزسىز. مۇنى قازىردىڭ وزىندە باعا قالىپتاسۋ ساياساتىنان، دۇكەندەردەگى احۋالدان بايقاپ جۇرسىزدەر»، - دەدى ءمينيستردىڭ ءبىرىنشى ورىنباسارى ب ا ق وكىلدەرىنىڭ ساۋالىنا وراي. ول قازاقستان ۇكىمەتى ا ق ش وكىلدەرىمەن بارلىق دەڭگەيدە قارقىندى كەلىسسوز جۇرگىزىپ جاتقانىن اتاپ ءوتتى.
«وسى ورايدا ا ق ش- قا وسىناۋ يكەمدىلىگى، ىنتىماقتاستىققا دايىندىعى ءۇشىن ريزاشىلىعىمدى بىلدىرگىم كەلەدى. سىرتقى ىستەر مينيسترلىگى قازىردىڭ وزىندە مۇددەلى تاراپتار كەلىسسوزىنىڭ بىرنەشە راۋندىن وتكىزدى. وعان قازاقستان تاراپىنان ەكونوميكا مەن قارجى سالاسىنا جۇمىلدىرىلعان مەملەكەتتىك ورگاندار، «اتامەكەن» ۇ ك پ وكىلدەرى، ا ق ش تاراپىنان ەلشىلىك، مەملەكەتتىك دەپارتامەنتى، وزگە دە ۆەدموستۆولارىنىڭ وكىلدەرى قاتىستى. اتالعان كونسۋلتاتسيالار بارىسىندا ءبىزدىڭ تاراپىمىزعا وسى سانكتسيالار كەزىندە نە ىستەۋمىزگە قاتىستى ەگجەي- تەگجەيلى جاۋاپ بەرىلدى. شىندىعىندا امەريكالىق تاراپ نارىقتارىمىزدىڭ، ەكونوميكامىزدىڭ ءوزارا تىعىز بايلانىستى ەكەنىن ءتۇسىنىپ وتىر جانە ولار سانكتسيالاردىڭ قازاقستاندىق ەكونوميكاعا اسەرىن بارىنشا جەڭىلدەتۋگە، تومەندەتۋگە تىرىسۋدا. بۇل باعىتتا جۇمىس ودان ارى دا جالعاسا بەرەدى»، - دەدى اقان راحمەتۋللين.
