قىتايدا لوكداۋننان ازىق- تۇلىك تاپشىلىعى پايدا بولدى

نۇر- سۇلتان. قازاقپارات- 26 ميلليون حالقى بار شاڭحاي قالاسىنىڭ تۇرعىندارى ەكى اپتا بويى قاتاڭ لوكداۋندا وتىر، دەپ حابارلايدى «حابار 24».

سوڭعى كۇندەرى ايماقتا ىندەت جۇقتىرعانداردىڭ تاۋلىكتىك سانى 20 مىڭنان اسادى. وسىعان بايلانىستى وڭىردە ۋاقىتشا اۋرۋحانالار اشىلا باستاعان. جاعدايدىڭ ۋشىعۋىنا بايلانىستى تاۋار جەتكىزۋ جاعى قيىنداپ، تەڭىز پورتتارىنداعى جۇك كەمەلەرى تۇرالاپ قالدى. ال جەرگىلىكتى تۇرعىندار بولسا ازىق- تۇلىك تاپشىلىعىنا شاعىمدانا باستاعان. قازىر ونلاين تاپسىرىس بەرۋدىڭ ءوزى قيىنعا سوعۋدا. ساتۋشىلار دا باعانى كوتەرمەلەپ جىبەرگەن.

ماسەلەنى شەشۋ ءۇشىن جەرگىلىكتى بيلىك ايماققا 3 مىڭ جۇمىسشى تارتىپ وتىر. ازىرگە ساراپشىلاردىڭ بولجامى كوڭىل كونشىتپەيدى. ايتۋىنشا، ەپيداحۋالدىڭ ۋشىعۋى ەل ەكونوميكاسىنا اۋىر سوققى بولۋى مۇمكىن. ماماندار اۋرۋدىڭ تارالۋى مامىردا عانا باسەڭدەۋى مۇمكىن دەپ توپشىلايدى.