ۇلى بريتانيادا ىندەت قايت ءورشىدى. لوكداۋن جاريالانۋى مۇمكىن
اسىرەسە ەرەسەكتەر اراسىندا ناۋقاستانعاندار كوپ. ۇلتتىق ستاتيستيكا باسقارماسىنىڭ مالىمەتتەرىنشە، ميلليونداعان ادام ۆيرۋس جۇقتىرعان. ولاردىڭ تۇگەلدەي دەرلىگىنەن تەز تارايتىن وميكرون شتامىنىڭ بەلگىلەرى انىقتالعان. ۇلى بريتانيا ۇكىمەت باسشىسى ەگەر جاعداي كۇردەلەنسە، جاڭا لوكداۋن جاريالانۋى مۇمكىن ەكەندىگىن ايتادى.
عالىمجان قارامان ۇلى، ءتىلشى:
- وميكروننىڭ BA.1 جانە BA.2 تۇرلەرىنىڭ كەڭ تاراۋى عالىمداردىڭ الاڭداۋشىلىعىن تۋعىزۋدا. ناۋقاستاردىڭ 90 پروتسەنتى وسى شتامداردى جۇقتىرعانى بەلگىلى بولىپ وتىر. زەرتتەۋلەرگە سايكەس، جاستار مەن بالالار اراسىندا كوۆيدكە شالدىققانداردىڭ سانى ازايعانىمەن، ىندەتتىڭ ىلمەگىنە كوبىنە سوزىلمالى اۋرۋلارى بار 55-تەن اسقان ادامدار ءىلىنىپ جاتىر.
ۇلتتىق ستاتيستيكا باسقارماسى جۇرگىزگەن ساۋالناماعا سايكەس ناۋرىز ايىنىڭ سوڭىندا 5 ميلليونعا جۋىق بريتانيالىقتىڭ كوروناۆيرۋستى جۇقتىرعانى بەلگىلى بولدى. بۇل ونىڭ الدىنداعى اپتامەن سالىستىرعاندا جارتى ميلليوننان استام ادامعا كوپ. ال وتكەن جىلداعى رەكوردتىق كورسەتكىشپەن سالىستىرعاندا 25 مىڭ ادامعا عانا از. قازىر انگليا اۋرۋحانالارىندا 20 مىڭعا جۋىق ناۋقاس جاتىر. ۇلتتىق دەنساۋلىق ساقتاۋ قىزمەتىنە ايتارلىقتاي سالماق ءتۇسىپ، مەديتسينا ماماندارىنىڭ كۇشى سارقىلۋعا جاقىن.
ساففرون كوردەري، ۇلى بريتانيا ۇلتتىق دەنساۋلىق ساقتاۋ قىزمەتىنىڭ وكىلى:
- دەنساۋلىق ساقتاۋ جۇيەسىنىڭ شامادان تىس جۇكتەمەگە تاپ بولۋى ءبىزدى قاتتى الاڭداتادى. اۋرۋحانالاردا ناۋقاستارعا ارنالعان توسەك- ورىنداردىڭ كوپشىلىگى بوس ەمەس. ودان بولەك مەديتسينالىق قىزمەتكەرلەردىڭ جەتىسپەۋشىلىگى بايقالادى. جەدەل جاردەم قىزمەتى توتەنشە جاعدايعا قاراماستان قولدان كەلگەننىڭ ءبارىن جاساپ جاتىر. ءبىراق ناۋقاستار نوپىرىنە توتەپ بەرۋ وڭاي بولماي تۇر.
ىندەتتىڭ تارالۋى تەجەلمەسە دە ۇكىمەت كوروناۆيرۋستىق شەكتەۋلەردى الىپ تاستاۋ بويىنشا جوسپارلارىن جالعاستىرۋدا. قازىر قوعامدىق ورىنداردا ماسكا تاعۋ، كوپشىلىك شارالار كەزىندە كوۆيد- پاسپورت كورسەتۋ جانە ۇيدەن جۇمىس ىستەۋ مىندەتتى ەمەس. وعان قوسا ۇلى بريتانياعا ساپارلاتىپ كەلگەن جولاۋشىلار كوۆيد- تەستتىڭ تەرىس ناتيجەسىن كورسەتپەيدى. بۇدان بولەك كوۆيدتى انىقتايتىن جەدەل تەستتەر حالىق اراسىندا بۇرىنعىداي تەگىن تاراتىلمايتىن بولدى.
دجون كەمپبەلل، عالىم:
- قازىر بىرىككەن كورولدىكتە ىندەتتى جۇقتىرۋ جاعدايلارى كوبەيىپ جاتىر. اۆستراليادا دا وسىعان ۇقساس ەپيداحۋال قالىپتاستى. ال ا ق ش- تا جاعداي جاقىن كۇندەرى كۇردەلەنۋى مۇمكىن. بۇعان وميكروننىڭ ەكى جاڭا نۇسقاسى سەبەپ. ۇلتتىق دەنساۋلىق ساقتاۋ قىزمەتى كوروناۆيرۋسپەن اۋىراتىندارعا ارنالعان پالاتالاردى قايتا كوبەيتىپ جاتىر. ۇكىمەتتەگىلەر وسىنى ەسكەرە وتىرىپ، ءتيىستى شارا قابىلداۋلارى كەرەك دەپ ويلايمىن.
ۇلى بريتانيا پرەمەر- ءمينيسترى ەگەر جاعداي ۋشىقسا، تاعى دا لوكداۋن ەنگىزىلۋى مۇمكىن ەكەندىگىن ايتتى. ۇكىمەت حالىق دەنساۋلىعىن باستى باسىمدىقتار قاتارىنا قويادى، دەدى ول. ءبىراق بۇعان دەيىن بوريس دجونسون شەكتەۋلەر ەندى جاريالانبايدى دەپ مالىمدەگەن بولاتىن.
بوريس دجونسون، ۇلى بريتانيا پرەمەر- ءمينيسترى:
- بۇرىنعىدان دا قاۋىپتىرەك، بالالاردىڭ ءومىرىن جالمايتىن، تەجەۋدى تالاپ ەتەتىن جاڭا شتامدار پايدا بولۋى مۇمكىن. مەن ەشتەڭەنى دە جوققا شىعارعىم كەلمەيدى. ءبىراق قازىر حالىقتىڭ باسىم كوپشىلىگى ەكپە سالدىردى. سوندىقتان ونداي جاعداي بولمايدى دەپ ۇمىتتەنەمىن.
قۋانىشقا وراي، پاندەميانىڭ الدىڭعى تولقىندارىمەن سالىستىرعاندا كوۆيدتەن قايتىس بولعاندار كورسەتكىشى تومەنىرەك جانە ۆاكسينا سالدىرعاندار ءۇشىن وميكرون شتامى جەڭىلىرەك ءوتىپ جاتىر. ەلدە ءالسىز توپتارعا ەكپەنىڭ ءتورتىنشى كومپونەنتىن ەگۋ ناۋقانى باستالعاندىقتان كىسى ءولىمى از بولادى دەگەن ءۇمىت بار.
www.24.kz
