پرەزيدەنت ت ر ك تۇسىرگەن «حالىققا قامقورلىق» اتتى دەرەكتى فيلم جارىق كوردى

نۇر- سۇلتان. قازاقپارات - «قازاقستان حالقىنا» قورىنىڭ قۇرىلعانىنا ءۇش اي بولدى. «حالىققا قامقورلىق» اتتى دەرەكتى فيلم وسى ۋاقىت ىشىندە قوردىڭ جۇمىسى قالاي جولعا قويىلعانىن باياندايدى، دەپ حابارلايدى قازاقپارات ءتىلشىسى.

«بۇل فيلم يىعىنا تۇسكەن اۋىرتپالىقتى قاباعىن شىتپاي ارقالاعان ارداقتى ازاماتتار، ولارعا اۋىر كەزدە قول ۇشىن سوزىپ كومەكتەسكەن جومارت جاندار جايىندا»، - دەپ باستالادى تۋىندى.

كورەرمەن فيلم بارىسىندا وسى قوردىڭ قۇرىلۋىنا تۇرتكى بولعان قاڭتار قاسىرەتىن تاعى ءبىر ەسىنە الادى. دەسانتتىق- شابۋىلداۋ باتالونىنىڭ كومانديرى ەركەبۇلان قارسىبەكوۆتىڭ جۇبايى سول مازاسىز كۇندەردى ءالى تولقۋسىز ەسكە الا المايدى. 5- قاڭتاردا جۇمىسىنا كەتكەن جولداسى اراعا 18 كۇن سالىپ قانا ۇيىنە ورالعان ەدى. ءدال سولاي قىزمەتىنە الاڭسىز كەتىپ، ورالماي قالعان ۇلاندار دا بار. رەسمي دەرەك بويىنشا، قاڭتار وقيعاسى كەزىندە 230 ادام قازا تاۋىپ، مىڭداعان ادام جاراقاتتانعان. قوردىڭ ءبىر باعىتى - وسى سىن ساعاتتا قوعامدىق ءتارتىپتى كۇزەتىپ ءجۇرىپ اجال قۇشقان اسكەريلەر مەن ساقشىلاردىڭ وتباسىنا كومەك قولىن سوزۋ.

«قازاقستان حالقىنا» قورى دەنساۋلىق ساقتاۋ، ءبىلىم بەرۋ جانە الەۋمەتتىك قولداۋ سالاسىنداعى ەڭ كۇردەلى ماسەلەلەردى شەشۋگە باعىتتالعان. فيلمگە ارقاۋ بولعان جانداردىڭ تاعدىرىنا، باسىنا تۇسكەن سىناققا قاراپ وتىرىپ، قوردىڭ قانداي جاۋاپتى ميسسيانى ارقالايتىنىن تۇسىنۋگە بولادى. مىسالى، اتىراۋ قالاسىنداعى ءۇش بالاسى بىردەي اۋىر دەرتكە شالدىققان وتباسىنىڭ قايسارلىعى ادامدى ويلانتپاي قويمايدى. ابىروي بولعاندا، مۇنداي اۋرۋدى ىرگەدەگى وزبەكستان ماماندارى ەمدەيتىن بولىپ شىققان.

«ءبىز ءار ءۇش اي سايىن حالىقتان اقشا جينايمىز. حالىقتىڭ كومەگىمەن، اعايىن- تۋمانىڭ كومەگىمەن 100 تەڭگەدەن، 200 تەڭگەدەن جينالعان قارجىمەن، ءوزىمىزدىڭ جيناعان قارجىمىزبەن سول جاققا بارىپ- كەلىپ جۇردىك. بۇرىن ءبىر ساپارعا 500-600 مىڭ كەتەتىن. ايا قىزىمىز پويىزعا شىدامايتىن بولعاندىقتان، ۇشاقپەن قاتىنايمىز»، - دەيدى ەرەكشە بالالاردىڭ اناسى ميرا حاديسوۆا.

پرەزيدەنت قاسىم- جومارت توقايەۆ بۇل قوردى قۇرۋ تۋرالى باستامانى العاش كوتەرگەن كەزدە ارفاندىق اۋرۋعا شالدىققان بالالارعا كومەك كورسەتىلۋى كەرەكتىگىن ايرىقشا اتاعان بولاتىن.

«ءبىز ارفاندىق اۋرۋلارمەن اۋىراتىن، ياعني سيرەك كەزدەسەتىن سىرقاتى بار ناۋقاس بالالارعا كومەك كورسەتۋ ءۇشىن كوپ جۇمىس ىستەدىك دەپ ويلايمىن. وسىنداي بالالاردى ءدارى- دارمەكپەن قامتاماسىز ەتۋ ءۇشىن 4 ميلليارد تەڭگە تولەدىك. دەنساۋلىق ساقتاۋ مينيسترلىگىمەن، جەرگىلىكتى اتقارۋشى ورگاندارمەن بىرگە تاعى دا ءدارى- دارمەكپەن قامتاماسىز ەتۋگە 14,7 ميلليارد تەڭگە تولەۋ كەرەك دەپ شەشتىك»، - دەيدى قوردىڭ باسقارما ءتوراعاسى بولات جامىشيەۆ.

تاعى ءبىر اتىراۋلىق مۇسا ەسىمدى ءبىر جاسار بالانىڭ جۇرەگىنە قاجەت وتانى ا ق ش، گەرمانيا، يزرايل جانە وڭتۇستىك كورەيا ەلدەرىنىڭ ماماندارى عانا جاساي الادى ەكەن. سۇلتاشيەۆتەر وتباسىنىڭ ەندىگى جالعىز ءۇمىتى وسى «قازاقستان حالقىنا» قورىندا.

بولات جامىشيەۆتىڭ ايتۋىنا قاراعاندا، قور قۇرىلعاننان بەرى شەتەلدە ەمدەلۋگە كومەك سۇراپ 300-دەن استام ءوتىنىش تۇسكەن. قور باسشىسى سونداي وتىنىشتەردىڭ نەگىزىندە ەكى بالانى وڭتۇستىك كورەيا مەن رەسەي استاناسىندا جۇرەككە وتا جاساتۋعا جىبەرگەلى وتىرعاندارىن مىسال ەتىپ كەلتىردى.

اۋتيزمگە شالدىققان بالاسىن ەمدەۋ جولىندا تىنباي ەڭبەكتەنىپ ءجۇرىپ سالانىڭ مىقتى مامانىنا اينالعان گۇلبارام ەرمۇحانوۆانىڭ باسىنداعى وقيعا دا دەرەكتى فيلمگە ارقاۋ بولعان.

«قازاقستان حالقىنا» قورىنىڭ قامقورلىعىنا ىلىككەندەردىڭ ءبىرى - قاراعاندى وبلىسى شەت اۋدانى اقسۋ- ايۋلى اۋىلىندا تۇراتىن الدابەرگەنوۆتەر وتباسى. وسى ءۇيدىڭ جاسى ەكىگە دە تولماعان ايسەزىم اتتى ءسابيى «بۇلشىقەت ارتروفياسى» دەيتىن سيرەك كەزدەسەتىن دەرتكە شالدىققان. اناسىنىڭ ايتۋىنشا، ءتىلى «اكە»، «انا» دەپ ايتۋعا كەلگەنىمەن، اياقتان تۇرۋ، ەتپەتتەپ جاتىپ، باسىن كوتەرۋ ازىرگە ارمان عانا. وسىنداي اۋىر دەرتتى باياۋلاتاتىن ءدارىنىڭ قۇنى - 1 ميلليارد تەڭگە. ونىڭ وزىندە جاسى ەكىگە تولىپ، سالماعى 13,5 كەلىگە جەتكەنشە سالىنىپ ۇلگەرۋى كەرەك. مەجەلى شاق جاقىنداعان سايىن اتا- انانىڭ ۋايىمى قالىڭداي بەرگەن. وسىنداي ساتتە «قازاقستان حالقىنا» قورىنان «بالالارىڭىزعا كومەك بەرىلەتىن بولدى» دەگەن اقجولتاي حابار جەتىپ، جانكەشتى جانداردىڭ ءۇمىتىن قايتا وياتىپتى.

«اقپان ايىنىڭ سوڭىندا «قازاقستان حالقىنا» قوعامدىق قورىنىڭ قامقورشىلىق كەڭەسى قاڭتار وقيعاسى كەزىندە قازا بولعان ازاماتتاردىڭ جاقىندارىنا 7 ميلليون تەڭگەدەن جاردەماقى تولەۋ تۋرالى شەشىم قابىلدادى. ەل تىنىشتىعىن قورعايمىز دەپ اۋىر جاراقات العان كۇش قۇرىلىمى قىزمەتكەرلەرى مەن قاڭعىعان وقتان جاپا شەككەن بالالاردىڭ اتا- انالارىنا 3 ميلليون تەڭگەدەن بولىنەتىن بولدى. ەل باسىنا كۇن تۋعاندا قۇرىلعان قوعامدىق قور ءالى دە كومەككە مۇقتاج تالاي جانعا قامقورشى بولۋعا دايىن» دەپ اياقتالادى فيلم.

اۆتور: ەسىمجان ناقتىباي