جاپوندىقتار گولوۆكيننىڭ ءوز شاپانىن مۋراتاعا جاپقانىن تالقىلاپ جاتىر

نۇر-سۇلتان. قازاقپارات - جاپونيادا گەننادي گولوۆكيننىڭ ءوز شاپانىن مۋراتاعا جاپقانى تالقىلانىپ جاتىر.

«كىمگە كوڭىلىڭ تولسا، سوعان سىيلا» دەگەن تاقىرىپپەن nikkansports.com سايتى ماقالا جاريالادى، دەپ حابارلايدى قازاقپارات ءتىلشىسى.

ماتەريالدا قازاقستاندىق بوكسشىنىڭ جەكپە-جەك بىتكەن سوڭ جانكۇيەرلەرگە العىس بىلدىرگەنى جازىلادى. سونداي-اق، گولوۆكيننىڭ ءوز شاپانىن قارسىلاسىنا جابۋ سەبەبىن بوكسشىنىڭ سوزىمەن تۇسىندىرەدى.

«مۋراتا ءجۇزى جىلى، جىميىپ جۇرەدى. وعان دەگەن جاقىندىقتى سەزىندىم جانە مەن ونى قاتتى قۇرمەتتەيمىن. مەن ونى كەرەمەت چەمپيون دەپ ەسەپتەيمىن. شاپان - قازاقتىڭ ۇلتتىق كيىمى. ونى ەڭ قۇرمەتتى ادامعا جاباتىن ءداستۇر بار. سول سەبەپتى، ونى مۋراتاعا جاپتىم»، - دەگەن گەننادي گولوۆكين.

ال news.yahoo.co.jp سايتى GGG ءوز شاپانىن تۇڭعىش رەت قارسىلاسىنا سىيلادى دەگەن دەرەك كەلتىرەدى.

«پروموۋتەر توم لەففلەردىڭ سوزىنشە، گولوۆكين ءبىرىنشى رەت ءوز شاپانىن كيگىزىپ تۇر. ول باتىل قارسىلىق كورسەتكەن جاپون باتىرىنا «بۇل مەنىڭ مۋراتاعا قۇرمەتىم» دەگەنى»، - دەپ جازىپتى.

قازاقستاندىق كاسىپقوي بوكسشى گەننادي گولوۆكين (41-1-1، 36 ك و) جاپونيانىڭ سايتاما قالاسىندا وتكەن كاسىپقوي بوكس كەشىندە شارشى الاڭ يەسى ريوتا مۋراتانى (16-2، 13 ك و) 9- راۋندتا نوكاۋتقا جىبەرگەن ەدى.