وتكەن ايدا جىلجىمايتىن مۇلىك ساۋداسى قىزا تۇسكەن - ريەلتورلار

نۇر-سۇلتان. قازاقپارات - قازاقستاندا جىلجىمايتىن مۇلىكتى ساتىپ الۋ-ساتۋ مامىلەلەرى سانى وسۋدە.

بۇل تۋرالى بىرىككەن ريەلتورلار قاۋىمداستىعى پرەزيدەنتىنىڭ كەڭەسشىسى نينا لۋكيانەنكو ايتىپ وتىر، دەپ حابارلايدى قازاقپارات ءتىلشىسى.

«ناۋرىزداعى جاعداي ازاماتتاردىڭ جىلجىمايتىن مۇلىك ساتىپ الۋعا دەگەن تالپىنىسى ساقتالعانىن كورسەتتى. بۇل ايدان جاسالعان كەلىسىمدەردىڭ سانى اقپان ايىمەن سالىستىرعاندا %45,6 ارتقان. بۇل از ەمەس»، - دەدى نينا لۋكيانەنكو قازاقپارات تىلشىسىمەن سۇحباتىندا.

ونىڭ پايىمىنشا، قارجى نارىعىنداعى تۇراقسىزدىق اسەرىنەن ادامدار جيناعان اقشاسىنىڭ قۇنىن ساقتاپ قالۋ ءۇشىن جىلجىمايتىن مۇلىككە سالۋعا تىرىسىپ جاتىر.

«بۇكىل زاتتىڭ باعاسى ءوسىپ، تەڭگە قۇنسىزدانعان كەزدە حالىقتىڭ جالپى ساتىپ الۋ قابىلەتى تومەندەيتىنىن بىلەدى. مۇنداي كەزدە ادامدار قولداعى اكتيۆتىڭ قۇنىن ساقتاپ قالۋعا تىرىسادى. جىلدار بويعى تاجىريبە ونىڭ بىردەن-ءبىر جولى جىلجىمايتىن مۇلىك ساتىپ الۋ ەكەنىن كورسەتكەن. قازىر الەم بويىنشا قارجى نارىعى وتە قۇبىلمالى. قولدا بار اكتيۆتىڭ قۇنىن ساقتاپ نەمەسە ەسەلەپ قالۋ ءۇشىن ىرگەلى ءبىلىم كەرەك. ال مۇنداي كەزدە اقشانى جىلجىمايتىن مۇلىككە سالۋ-كونۆەرۆاتيتى جول دەپ ايتار ەدىم. ول ءۇشىن اسقان ءبىر ءبىلىمىنىڭ قاجەتى جوق»، - دەدى ساراپشى.

سونداي-اق، ول ءساۋىر ايىنىڭ باسىندا دا ءبىرىڭعاي جيناقتاۋشى زەينەتاقى قورىنان الىنعان ءبىرجولعى تولەم ارقىلى جىلجىمايتىن مۇلىك كەلىسىمشارتىن جاساۋشىلاردىڭ كوپ تىركەلىپ جاتقانىن ايتادى.

ەسكە سالساق، 1- ساۋىردەن باستاپ 2022-جىلعا ەسەپتەلگەن زەينەتاقى جيناقتارىنىڭ ەڭ تومەنگى جەتكىلىكتىلىك شەگى كۇشىنە ەندى.