ەلوردادا قارتتار ۇيىندە ءىز-ءتۇزسىز جوعالعان ايەل تابىلدى
بۇل تۋرالى نۇر-سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.
«وسى جىلدىڭ 6- ساۋىرىندە ەسىل اۋداندىق پوليتسيا باسقارماسىنا ەلوردا تۇرعىنى جۇگىنىپ، ءبىر كۇن بۇرىن ادىرنا كوشەسىندە ورنالاسقان «زابوتا» قارتتار ۇيىنەن شىعىپ كەتىپ قايتىپ ورالماعان تۋىسىن ىزدەۋگە جاردەمدەسۋدى ءوتىندى. جوعالعان ايەلدى ىزدەۋ جانە تۇرعان جەرىن انىقتاۋ ءۇشىن ەلوردالىق پوليتسيانىڭ جەكە قۇرامىنا باعىتتاما بەرىلدى. سونىمەن قاتار كومەككە ۆولونتەرلەر دە كەلدى. ەرىكتىلەر پوليتسياعا قول ۇشىن بەرىپ، كوپقاباتتى ۇيلەردىڭ اۋلالارىن، ادام كوپ جينالاتىن ورىنداردى، شاتىرلار مەن جەرتولەلەردى ءسۇزىپ شىقتى»، - دەپ اتاپ وتەدى دەپارتامەنتتەن.
ۆەدومستۆو مالىمەتىنشە، قابىلدانعان ءىس-شارالاردىڭ ارقاسىندا «LIDER. KZ» ۆولونتەرلەرى جوعالعان ايەلدى جەتىگەن كوشەسىنىڭ بويىنان تاۋىپ، تۋىستارىنا تاپسىرعان.
«ەرىكتىلەر جوعالعان بالالار مەن قارتتاردى ىزدەۋگە اتسالىسىپ، پوليتسياعا ۇلكەن جاردەم بەرەدى. ءتۇرلى توتەنشە جاعدايلاردا كومەكتەسەدى. سول ارقىلى ولار وزدەرىنىڭ ازاماتتىق ۇستانىمىن كورسەتىپ ءجۇر»، - دەدى نۇر-سۇلتان قالالىق پوليتسيا دەپارتامەنتىنىڭ كريمينالدىق پوليتسيا باسقارماسى باستىعىنىڭ ورىنباسارى اسحات يسەنوۆ.
