قازاقستاننىڭ بىرنەشە ايماعىندا سۋ تاسقىنى بولىپ جاتىر

نۇر-سۇلتان. قازاقپارات - اعىمداعى تاۋلىكتە وڭىرلەردە تۇرعىن ۇيلەردى سۋ باسۋعا جول بەرىلگەن جوق، دەپ حابارلايدى قازاقپارات ءتىلشىسى ت ج مينيسترلىگىنىڭ رەسمي سايتىنا سىلتەمە جاساپ.

«قازىرگى ۋاقىتتا اقمولا جانە اقتوبە ايماقتارىنداعى وبلىستىق ماڭىزى بار جولداردىڭ 4 ۋچاسكەسىندە، قاراعاندى، اقمولا، اقتوبە، قوستاناي وبلىستارىنداعى جەرگىلىكتى ماڭىزى بار اۆتوجولداردىڭ 11 ۋچاسكەسىندە، اقتوبە وبلىسىنىڭ جەرگىلىكتى ماڭىزى بار ۋچاسكەسىندەگى ءبىر كوپىردە سۋ تاسقىنى بولىپ جاتىر»، - دەلىنگەن ۆەدومستۆونىڭ مالىمەتىندە.

اقمولا، اقتوبە، قاراعاندى وبلىستارىندا، نۇر-سۇلتان قالاسىندا جەرگىلىكتى اتقارۋشى ورگاندار مەن ت ج م كۇشتەرىمەن اۋلا اۋماقتارى مەن كوشەلەردەن 126,6 مىڭ تەكشە مەتر ەرىگەن قار سۋى سورىلعان. اقمولا، شىعىس قازاقستان، اقتوبە، قاراعاندى وبلىستارىندا ينەرتتى ماتەريالدارى بار 4895 قاپ توسەلدى. دەرەككوزدە بۇل جۇمىستارعا ت ج م، ءى ءى م، جەرگىلىكتى اتقارۋشى ورگانداردان، ۇكىمەتتىك ەمەس ۇيىمداردان 657 ادام، 156 تەحنيكا، 74 سۋ سورۋ قۇرالى جانە 5 ءجۇزۋ قۇرالى جۇمىلدىرىلعانى ايتىلادى.

اقمولا جانە شىعىس قازاقستان وبلىستارىندا سۋ تاسقىنىنا قارسى ءىس-شارالارعا (قاپتار توسەۋ، توپىراق ءۇيىپ بەكىتىلگەن جەرلەردى نىعايتۋ، ەرىگەن قار سۋىن سورۋ) 52859 جانە 68303 اسكەري بولىمدەرىنىڭ 55 قىزمەتشىسى مەن 6 تەحنيكاسى تارتىلدى.