يمپورت تەڭگە باعامىنا ۇنەمى قىسىم جاسايدى - ۇلتتىق بانك
«يمپورتتان ۆاليۋتا باعامىنا قىسىم ءاردايىم بولادى. بۇل - ونى تولەۋدە يمپورتتىڭ شەتەل ۆاليۋتاسىنا سۇرانىس تۋدىراتىندىعىمەن بايلانىستى. الايدا، مۇندا قازاقستاندىق ەرەكشەلىكتەردى دە ەسكەرۋ قاجەت. بۇل دەگەنىمىز: ارالىق جانە ينۆەستيتسيالىق يمپورتتىڭ كەيبىر بولىگى شەتەلدىك تىكەلەي ينۆەستيتسيا ارقىلى قارجىلاندىرىلادى. ياعني، يمپورت كولەمى ىشكى ۆاليۋتا نارىعى ارقىلى وتپەيتىندىكتەن، ولار تەڭگە باعامىنا قىسىم كورسەتپەيدى. ىشكى نارىقتاعى ۆاليۋتاعا سۇرانىستى ارالىق جانە ينۆەستيتسيالىق يمپورتتىڭ فيسكالدىق شىعىستار مەن شەتەلدىك ينۆەستيتسيا قارجىلاندىرمايتىن بيزنەس قاراجاتى ەسەبىنەن ساتىپ الىناتىن بولىگى، سونداي-اق تۇتىنۋ يمپورتى تۋدىرادى»، - دەيدى دەپارتامەنت ديرەكتورى.
ونىڭ ايتۋىنشا، ارالىق جانە ينۆەستيتسيالىق تاۋارلار يمپورتى ولاردى ءارى قاراي پايدالانۋدىڭ تيىمدىلىگىمەن اقتالادى، سەبەبى، ول ىشكى ءوندىرىستىڭ دامۋىنا ىقپال ەتەدى. تۇتىنۋ تاۋارلارىنان ءبىز يمپورتتى اۋىستىرۋ جانە سول ارقىلى ايىرباستاۋ باعامىنا قىسىمدى تومەندەتۋ مۇمكىندىگىن كورەمىز.
كەيبىر سالىستىرمالى تۇردە قاراپايىم پوزيتسيالاردى - رەسۋرستاردى ءتيىمدى ءارى ۇتىمدى پايدالانۋ ارقىلى ەل ىشىندە دە شىعارۋعا بولار ەدى. مۇنداي تاۋارلارعا، مىسالى، قانت، الما، شۇجىق، قۇس ەتى، تۇرمىستىق حيميا، كيىم-كەشەك پەن اياق كيىمدى جاتقىزۋعا بولادى.
وسىلايشا، 2021-جىلى تۇتىنۋ يمپورتىنىڭ ايتارلىقتاي ۇلكەن كولەمدە جەتكىزىلۋى شەتەل ۆاليۋتاسىنا دەگەن سۇرانىستىڭ ارتۋىنا ىقپال ەتكەن نەگىزگى فاكتورلاردىڭ ءبىرى بولدى.
«رەسەي - قازاقستاننىڭ نەگىزگى ساۋدا سەرىكتەستەرىنىڭ ءبىرى. ونىڭ 2021-جىلعى يمپورتتاعى ۇلەسى %42 دى قۇرادى (سوڭعى 5 جىلدا ورتا ەسەپپەن - %38). بيىل يمپورت قانشالىقتى ازايادى نەمەسە ول جالپى قىسقارۋى مۇمكىن بە، بۇل - سانكسيالاردىڭ كولەمى مەن ۇزاقتىعىن، الەمدىك ينفلياتسيانىڭ ديناميكاسىن، باسقا لوگيستيكالىق تىزبەكتەرگە تەز ارادا قايتا باعىتتاۋ مۇمكىندىگىن، حالىقتىڭ ساتىپ الۋ قابىلەتىن جانە رەسەيدىڭ بەلگىلى ءبىر تاۋار توپتارىن شىعارۋعا ىشكى تىيىمدارىن قامتيتىن ءارتۇرلى فاكتورلارعا بايلانىستى بولادى.
مىسالى، وتكەن جىلى يمپورتتىڭ باسىم بولىگى رەسەيلىك اۆتوموبيلدەر مەن ولاردىڭ جابدىقتارىنان قۇرالعان بولاتىن. الايدا، بۇگىنگى سانكتسيالىق شەكتەۋلەرگە بايلانىستى رەسەي فەدەراتسياسىنداعى اۆتوموبيل زاۋىتتارى جابىلىپ جاتىر.
بۇل، البەتتە، ءبىزدىڭ نارىققا دا ىقپال ەتپەي قويمايدى. تاعى ءبىر مىسال رەتىندە كەلتىرەيىن، رەسەي قانت ەكسپورتىن توقتاتتى. سونداي-اق شەت ەلدەردەن اكەلىنەتىن تاۋارلاردىڭ ءبىر بولىگى بىزگە رەسەي اۋماعى ارقىلى جەتكىزىلەتىن. بۇل جەردە تاۋار باعاسىن كوتەرىپ جىبەرەتىن سولتۇستىك كورشىمىزدەگى ينفلياتسيا قارقىنىن دا ەسكەرۋ قاجەت»، - دەيدى ازات وسكەنبايەۆ.
بارلىعى ۆاليۋتا باعامىنا، ەكى ەل اراسىنداعى ينفلياتسيالىق ديففەرەنسيالعا، لوگيستيكالىق تىزبەكتەگى احۋالعا جانە رەسەيدەن بەلگىلى ءبىر تاۋارلاردى شىعارۋعا تىيىم سالۋدىڭ ودان ءارى قالاي قالىپتاساتىنىنا بايلانىستى بولادى. ونىڭ سوزىنە سەنسەك، ءساۋىر ايىنىڭ سوڭىندا جاريالاناتىن 2022-جىلدىڭ ءبىرىنشى توقسانىنداعى تولەم بالانسىن الدىن الا باعالاۋ كەزىندە بۇل سۇراققا اناعۇرلىم ناقتىراق جاۋاپ بولادى.
