14:53, 08 - ءساۋىر 2022 | GMT +5
قىزىلوردادا جەڭىل كولىك جاياۋ جۇرگىنشىلەر جولىندا وقۋشى قىزدى قاعىپ كەتتى - ۆيدەو
قىزىلوردا. قازاقپارات - بۇگىن قىزىلوردا قالاسىندا جەڭىل كولىك جاياۋ جۇرگىنشىلەر جولىندا وقۋشى قىزدى قاعىپ كەتتى، دەپ حابارلايدى قازاقپارات ءتىلشىسى.
وقيعا وبلىس ورتالىعىنداعى ن. نازاربايەۆ داڭعىلى بويىندا تىركەلدى. جاياۋ جۇرگىنشىلەر جولاعىندا جولدان وتپەك بولعان وقۋشىنى جەڭىل كولىك قاعىپ كەتتى.
«اتالعان وقيعا ق ر قىلمىستىق كودەكسىنىڭ 345-بابىنىڭ 2-بولىگىمەن سوتقا دەيىنگى تەرگەپ- تەكسەرۋدىڭ ءبىرىڭعاي تىزىلىمىنە تىركەلدى. ءتيىستى ساراپتاما تاعايىندالىپ، انىقتاۋ جۇمىستارى جۇرگىزىلۋدە. كۇدىكتى ازامات قىزىلوردا قالالىق پوليتسيا باسقارماسىنا جەتكىزىلدى. وعان قاتىستى ەشقايدا كەتپەۋ تۋرالى بۇلتارتپاۋ شاراسى قولدانىلدى. جاس ءوسپىرىم وبلىستىق بالالار اۋرۋحاناسىنا جاتقىزىلدى»، - دەپ ءمالىم ەتتى قىزىلوردا قالالىق پوليتسيا باسقارماسىنان.
قىزىلوردا قالالىق ءبىلىم ءبولىمى وقۋشىنىڭ جاعدايى قالىپتى ەكەنىن حابارلادى. قازىر ول پالاتاعا شىعىپ ەم قابىلداۋدا.
