ەلوردادا پوليتسيا ماس جۇرگىزۋشىنى كولىگىنە وق اتىپ توقتاتتى
7 -ءساۋىر كۇنى ساعات 03:52-دە پوليتسيا قىزمەتكەرلەرى تاۋەلسىزدىك داڭعىلى بويىمەن كەلە جاتىپ، جول قوزعالىسى ەرەجەسىن ورەسكەل بۇزعان Citroën كولىگىن بايقادى. كولىكتە مەملەكەتتىك تىركەۋ ءنومىرى دە بولماعان. پوليتسەيلەر كولىكتى توقتاتپاق بولدى. الايدا جۇرگىزۋشى توقتاۋدىڭ ورنىنا، كەرىسىنشە جىلدامدىقتى قوستى. وسىدان سوڭ پاترۋلدىك پوليتسيا جاساقتارى كولىكتى قۋا جونەلگەن.
جۇرگىزۋشى پوليتسيا قىزمەتكەرلەرىنىڭ كولىكتى توقتاتۋ تۋرالى زاڭدى تالابىن ورىنداماي، قاشىپ وتىرىپ كوكتال شاعىناۋدانىنا قاراي بۇرىلدى. پاترۋلدىكتەر كولىكتى تىلەنديەۆ داڭعىلىندا ونى قورشاپ الادى، الايدا جۇرگىزۋشى زاڭسىز ارەكەتىن توقتاتپاي، پوليتسيا كولىگىنە قارسى قوزعالدى. جول قوزعالىسىنىڭ باسقا قاتىسۋشىلارىنا قاۋىپ توندىرمەۋ ءۇشىن پوليتسيا قىزمەتكەرلەرى قىزمەتتىك قارۋ قولدانىپ، كولىك دوڭگەلەكتەرىن جارىپ توقتاتقان. قارۋ قولدانۋدان ەشكىم زارداپ شەككەن جوق. كولىك جۇرگىزگەن 21 جاستاعى ەر ادام قاماۋعا الىندى.
ساراپتاما قورىتىندىسى ونىڭ ماس كۇيىندە بولعانىن كورسەتتى. تەكسەرۋ بارىسىندا كولىكتەن رەسەيلىك مەملەكەتتىك تىركەۋ ءنومىرى تابىلدى. جاس ەر ادامنىڭ بۇعان دەيىن اكىمشىلىك جاۋاپكەرشىلىككە تارتىلعانى انىقتالدى. ءتارتىپ بۇزۋشىعا قاتىستى بىردەن 19 اكىمشىلىك حاتتاما تولتىرىلدى. كولىك ايىپپۇل تۇراعىنا قويىلدى. مامانداندىرىلعان اۋدانارالىق اكىمشىلىك سوتىنىڭ قاۋلىسىمەن ءتارتىپ بۇزۋشى 20 تاۋلىككە قاماۋعا الىندى، سونىمەن قاتار 7 جىلعا كولىك جۇرگىزۋ قۇقىعىنان ايىرىلدى.
اۆتور: زارينا تۋعانبايەۆا
