الماتى زووباعىندا كەنگۋرۋ دۇنيەگە كەلدى

الماتى. قازاقپارات - الماتى قالالىق زووباعىندا لاۋرا مەن مارات اتتى كەنگۋرۋ جۇبى جاڭا ءتولدى ومىرگە اكەلدى، دەپ حابارلايدى قازاقپارات ءتىلشىسى.

زووباقتىڭ باسپا ءسوز قىزمەتىنەن حابارلاعانداي، كەنگۋرۋدىڭ ءدال قاي كۇنى تۋعانىن انىقتاۋ قيىن بولىپ تۇر.

سەبەبى، كەنگۋرۋ ءتولى وتە كىشكەنتاي، كولەمى نەبارى 25 م م بولادى. ول تۋىلا سالىپ، اناسىنىڭ قالتاسىنا ورمەلەپ شىعىپ، سوندا جارتى جىل بويى ءوسىپ-جەتىلەدى.

كىشكەنتاي كەنگۋرۋدىڭ ومىرگە كەلگەنىن زووباق قىزمەتكەرلەرى اناسىنىڭ ءجۇرىس-تۇرىسى، مىنەز-قۇلقىنان بايقاپ، تۇسىنگەن.

«كىشكەنتاي كەنگۋرۋ شامامەن قاڭتاردا تۋعان. ءبىراق، ءبىز ونى تەك ناۋرىزدا عانا، اناسىنىڭ قالتاسىنان باسىن شىعارا باستاعان كەزدە بايقادىق. بۇل - لاۋرا مەن ماراتتىڭ ءتورتىنشى ءتولى. ولار سۋسيىرلارعا قاراما-قارسى قورشاۋدا تۇرادى. كىشكەنتاي كەنگۋرۋدى دۇرىستاپ قاراپ، جىنىسىن انىقتاۋىمىز كەرەك. ونىڭ ەسىمىن ءالى قويعان جوقپىز. ءوز ۇسىنىس-نۇسقالارىڭىزدى جولداپ، جازبالارىڭىزدا پىكىر قالدىرىڭىزدار. كەنگۋرۋگە قارايتىن كيپەرلەر ۇناعان ەسىمدى وزدەرى تاڭداپ الادى»، - دەپ جازدى زووباق ۇجىمى Instagram پاراقشاسىندا.

ەسكە سالايىق، بۇعان دەيىن الماتى زووباعىندا زەبرالار جۇبىندا ءتورتىنشى الا قۇلىن ومىرگە كەلگەن ەدى. سونداي-اق، زووباققا لاماتۇقىمداس ەرەكشە جانۋار مەن امۋر جولبارىستارى اكەلىنگەن بولاتىن.