قىتايدىڭ توعىز پروۆينتسياسىندا حالىق سانى ازايىپ جاتىر
2021 -جىلدىڭ قورىتىندىسى بويىنشا، قىتايدىڭ توعىز پروۆينتسياسىندا، سونىڭ ىشىندە حىبىي، جياڭسۋ، حۋنان، حۋبەي، شانسي، حيلۋڭجياڭ جانە باسقالارىندا حالىقتىڭ تابيعي ازايۋى بايقالعان. قىتاي ساراپشىلارى قازىر دەموگرافيا سالاسىندا نەگاتيۆتى تەندەنسيالار قالىپتاسىپ جاتقانىن اتاپ ءوتتى.
«قىتايدا تۋۋ دەڭگەيى عاسىردان استام ۋاقىت بويى تومەندەيدى دەپ بولجاۋعا بولادى. «ءۇشىنشى بالا» ساياساتى كەيبىر ماسەلەلەردى جەڭىلدەتۋى مۇمكىن، ءبىراق ول قىسقا مەرزىمدى پەرسپەكتيۆادا تەندەنتسيانى وزگەرتپەيتىن شىعار»، - دەدى قىتايلىق دەموگراف حۋان ۆەنچجەنا «حۋانتسيۋ شيباو» گازەتىنە.
ونىڭ ايتۋىنشا، تۋۋ دەڭگەيى جوعارى اۋداندار نەگىزىنەن ۋربانيزاتسيا دەڭگەيى تومەن قىتايدىڭ ءبىرقاتار باتىس جانە ورتالىق ايماقتارىندا ورنالاسقان. دەموگرافتار قىتاي حالقىنىڭ ازايۋىن بالا تۋۋ جاسىنداعى جاستار مەن ايەلدەر سانىنىڭ ازايۋىمەن، سونداي- اق مەديتسينالىق قىزمەت پەن بىلىمگە جۇمسالاتىن ۇلكەن شىعىندارعا بايلانىستى بالالى بولعىسى كەلمەيتىن جاستار سانىنىڭ وسۋىمەن تۇسىندىرەدى. سونىمەن قاتار، ەلدە اجىراسۋدىڭ جوعارى دەڭگەيى بايقالادى.
قىتاي ۇلتتىق ستاتيستيكا بيۋروسىنىڭ مالىمەتى بويىنشا، 2021 -جىلى تۋۋ كوەففيتسيەنتى 1000 ادامعا شاققاندا 7,52 قۇرادى. 2020 -جىلى بۇل كوەففيتسيەنت 8,52 بولعان. 2021 -جىلى قىتاي بيلىگى وتباسىلارعا ءۇش بالا تابۋعا رۇقسات بەردى. بۇل شارا دەموگرافيالىق قۇرىلىمدى جاقسارتۋ جانە ەل حالقىنىڭ قارتايۋىنا قارسى ستراتەگيانى ىسكە اسىرۋ ءۇشىن قابىلداندى.
ەسكە سالا كەتەيىك، 1970 -جىلداردىڭ اياعىنان باستاپ ق ح ر- دا بالا تۋۋدى شەكتەۋگە باعىتتالعان قاتاڭ دەموگرافيالىق ساياسات جۇرگىزىلدى. كەيبىر جاعدايلاردى ەسەپكە الماعاندا، وتباسىلارعا تەك ءبىر بالا تابۋعا عانا رۇقسات ەتىلدى.
اۆتور: اقبوپە ءابدراسۋل
