پرەزيدەنتكە قاستاندىق جاساماق بولعان كۇدىكتىگە قاتىستى سەنات ءتوراعاسى پىكىر ءبىلدىردى

نۇر-سۇلتان. قازاقپارات - سەنات ءتوراعاسى ماۋلەن اشىمبايەۆ ق ر پرەزيدەنتىنە قاستاندىق جاساماق بولعان شەتەل بارلاۋ اگەنتىنىڭ ۇستالۋىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

سەناتتىڭ جالپى وتىرىسىنان كەيىن تىلشىلەر پالاتا سپيكەرىنەن ق ر پرەزيدەنتىنە قاستاندىق جاساماق بولعان شەتەل بارلاۋ اگەنتىنىڭ ۇستالۋىنا قاتىستى سۇراق قويدى.

«قازىرگى جاعداي اقپاراتتىق تۇرعىدان وڭاي ەمەس. ءارتۇرلى اقپارات پەن فەيكتەر بار. سوندىقتان الەۋمەتتىك جەلىلەردەگى اقپاراتتارعا ۇستامدىلىقپەن قاراۋ كەرەك. ءبىرقاتار اقپارات كوزدەرىن قاراپ، زەردەلەگەن ءجون. سىزدەردىڭ سۇراقتارىڭىزعا توقتالسام، قاستاندىق قادامدارى تۋرالى جاۋاپ بەرە المايمىن. بۇل ماسەلەگە قاتىستى ۇلتتىق قاۋىپسىزدىك كوميتەتىنىڭ قىزمەتكەرلەرى تەرگەۋ امالدارى اياقتالعاننان كەيىن ناقتى اقپاراتتى بەرە الادى»، - دەدى م. اشىمبايەۆ.

وسى ورايدا سەنات ءتوراعاسى تەرگەۋدىڭ اياقتالعانىن كۇتۋ كەرەك ەكەنىن ايتتى.

«قازىر الەۋمەتتىك جەلىلەردە تاراپ جاتقان كەز كەلگەن اقپاراتقا سەنە سالۋعا بولمايدى. ولارعا سىن كوزبەن قاراعان ءجون. بىزگە ناقتى شىندىقتى تەرگەۋ جۇرگىزىپ جاتقان مەملەكەتتىك ورگان عانا ايتا الادى. ۇلتتىق قاۋىپسىزدىك كوميتەتى تەرگەۋ امالدارىن جۇرگىزىپ جاتىر. كۇدىكتى دەر كەزىندە ۇستالدى. زاڭ ءراسىمى بويىنشا تەرگەۋ جۇرگىزىلىپ جاتىر»، - دەدى ماۋلەن اشىمبايەۆ.

بۇدان بۇرىن حابارلانعانداي، 25-ناۋرىزدا ەلوردادا ق ر پرەزيدەنتىنە جانە ءبىرقاتار جوعارى لاۋازىمدى مەملەكەتتىك قىزمەتكەرلەرگە قاستاندىق جاساۋدى جوسپارلاعان شەتەلدىڭ بارلاۋ اگەنتى «ا» دەگەن قازاقستان ازاماتى ۇستالدى. ءبىر مەزگىلدە ول ارناۋلى جانە قۇقىق قورعاۋ ورگاندارى قىزمەتكەرلەرىنە قاتىستى تەرروريستىك اكتىلەر جاساۋدى جوسپارلاعان. الدىن الا تەرگەۋ بارىسىندا كۇدىكتى ق ر ازاماتى جوعارىدا كورسەتىلگەن ىستەردى شەتەل مەملەكەتىنىڭ تاپسىرماسى جانە مۇددەسىندە جاساعانىن مويىندادى.

قازىرگى كەزدە ۇ ق ك قىلمىستىق كودەكستىڭ 24-بابى 1-بولىگى (قىلمىسقا دايىندالۋ جانە قىلمىسقا وقتالۋ) جانە 255-بابى 4-بولىگىندە (تەرروريزم اكتىسى) كوزدەلگەن قىلمىستى جاساۋ فاكتىلەرى بويىنشا تەرگەۋ جۇرگىزۋدە.

اۆتور: رۋسلان عابباسوۆ