ۋكرايناداعى قارۋلى قاقتىعىس ۇزاققا سوزىلۋى مۇمكىن - ناتو
بريۋسسەلدەگى كەزدەسۋگە قاتىسقان اليانسقا مۇشە ەلدەر سىرتقى ىستەر مينيسترلەرىنىڭ پىكىرى وسىنداي. ناتو- نىڭ مالىمدەۋىنشە رەسەي كۇشتەرى ۋكراينانىڭ سولتۇستىگىنەن شىعىپ، شىعىسىنا قاراي شابۋىلداۋى ىقتيمال. ۇيىمنىڭ باس حاتشىسى يەنس ستولتەنبەرگ بۋچا مەن وزگە دە قالالارداعى قاتىگەزدىككە قاتىسى بارلاردى قاتاڭ جازالاۋ كەرەكتىگىن العا تارتتى.
سونىمەن قاتار، وداقتاس ەلدەر الداعى ۋاقىتتا ۋكرايناعا تانكىگە قارسى قارۋ، اۋە شابۋىلىنا قارسى قورعانىش جۇيەسى مەن وزگە دە قارۋ- جاراق، سونداي- اق، گۋمانيتارلىق، ءارى قارجىلاي كومەك كورسەتۋگە دايىن ەكەندىكتەرىن ءبىلدىردى.
يەنس ستولتەنبەرگ، ناتو باس حاتشىسى
– پۋتين العان بەتىنەن قايتپايتىن كورىنەدى. سوندىقتان كەز كەلگەن جاعدايعا دايىن بولۋ كەرەك. ۋكراينانى ءارى قاراي قولداپ، قابىلدانعان سانكتسيالاردى قاتاڭ ساقتاپ، قورعانىسىمىزدى ودان ءارى كۇشەيتكەنىمىز ءجون. ويتكەنى بۇل شيەلەنىس ۇزاققا سوزىلۋى مۇمكىن. بۇعان ءبارىمىز دە ءازىر بولعانىمىز ابزال.
ناتو- نىڭ شتاب- پاتەرىندەگى كەزدەسۋگە كەلگەن تۇركيا سىرتقى ىستەر ءمينيسترى ميەۆلۋت چاۆۋشوگلۋ بولسا، ماسكەۋ مەن كيەۆتىڭ كەلىسسوزدەرى جالعاسىن تاباتىنىنا ءۇمىتتى.
ميەۆليۋت چاۆۋشوگلۋ، تۇركيانىڭ سىرتقى ىستەر ءمينيسترى:
- ءبىز تاعى كەزدەسۋلەر وتەتىنىنە ءۇمىتتىمىز. بالكىم الدىمەن ۋكرينا مەن رەسەي دەلەگاتسيالارى، كەيىن ەكى ەلدىڭ سىرتقى ىستەر مينيسترلەرى دە ىمىراعا كەلۋ ءۇشىن جۇزدەسەر. ەكى جاق تا ۆلاديمير پۋتين مەن ۆلاديمير زەلەنسكييدىڭ كەزدەسۋى مۇمكىن ەكەنىنە سەنىم ءبىلدىرىپ وتىر. بۇعان تاراپتار بارىنشا ىقپال ەتۋى كەرەك.
www.24.kz
